Nwɛr a Luk 19 - Abanyom LP New Testament Portions

Jisɔs na Sakiyɔs mfora taksi

¹ Jisɔs ayɛl na Jɛriko ajɔ seng.

² Ɛbɛl nɛnom wurang yɔ anyina arɛ Sakiyɔs, ajɔl ntobɛsi nfora a taksi, ajɔl ɛfang nɛ.

³ Ajɔl sɛb arɛ ayɛn ligan nɛ yɔ Jisɔs arenɔ, ajɔl ɛkpede nɛ amalam ayɛnɛ ateb ɛbɔngɛ anɛ.

⁴ Fɔyɔ ɛkerɔ abɛna aji na ɔsi bi ɛbɔngɛ anɛ aji yur mbɛl arɛ ayɛnɛ, ateb Jisɔs ajɔl seng na mba yifɔ.

⁵ Naji Jisɔs arirɔ na ɛkɛbɛ mfom yifɔ, abri na libo abong atɔgɛ, “Sakiyɔs, budi kakab. Mɛ na jɔl na ɛtɛk ɛja ɛlɛl.”

⁶ Sakiyɔs asubi abudi aba kpera wɛ na ɛyɛba litem.

⁷ Anɛ kpakpa ba ayɛnɔ akuma numi arɛ, “Alitum njɔla njɛna nɛ na ɛtɛk nema abeɔfɛm.”

⁸ Sakiyɔs atum ayema abong atɔg Tata, “Bri, Tata! Mɛ na banga nsɔl ɛma mfom ɛbal nkarɛ akpak fana mbonga nyɔ, mɛ nɔ fɛng nim nɛ awiawi na tore nkpe wɛ nkpɛlɛ ɛni ɔkon bi nkɔlɔ.”

⁹ Jisɔs abong atɔgɛ, “Ɛlɛl ɔnyangɛ ɛgba ba na ɛtɛk jifa, ateb arɛ nɛnom yɔfa titi, mɔn a Ɛbram yɔ.

¹⁰ Ateb arɛ Mɔn a Nɛnom abal arɛ aba sɛb afɛngɛ anyangɛ ba alɔ tan.”

Ligan ɔbangɛ barɔgantom woba

¹¹ Naji ajɔl wɛ yonge atong, Jisɔs asɔra ɛsi atob abɔ ligan, ateb ajɔl alagɛ Jɛrusɛlɛm anɛ ajɔl kɛrɛ arɛ Ɔtol Ɔsɔwɔ ɛlag jog fɔ tutu.

¹² Wɛ abong: “Nɛnom wurang yɔ ajogɔ ɔgu bi atol ajil lijɛn na ndabamba ɛjiba arɛ abɔbɛ ɔtol nig afɛngɛ njim.

¹³ Fɔyɔ akogɔ barɔgantom abɛ woba akarɛ abɔ ɛkpuga woba abong atɔg abɔ arɛ, ‘Ba kɔ akpuga yafa wun ɔjɛn arɛ tɛtɛ mɛ fɛngɛ njim.’

¹⁴ “Ajɔlam kɔr anɛ abɛ, fɔyɔ atomɔ nteb ɔteb arɛ aji tɔgɛ arɛ ‘wur wɛ ɛkpɛlam sɛb mɔng ntol ɔwura.’

¹⁵ “Abɔbɛ ɔtol afɛngɛ njim akuri, atom arɛ akog barɔgantom abɛ ba wɛ akarɛ akpuga aba, wɛ abib abɔ nseng yi abɔ alɔ li na akpuga yafɔ.

¹⁶ “Ngbɔga mba aba, bong atɔgɛ, ‘Nsɔjama njo, ngba bɛl nseng ɛkpuga woba na ɛkpuga ya ɔkarɔ nɔ mam.’

¹⁷ “Ndɛnjo afanga, ‘Gafola, ɛteng ndɔgalitom ɔma! Ateb arɛ ɔkpe ɛkagasik na asusuga nsɔl, kɔ ɛjiba woba wɔ ɔbabɛ.’

¹⁸ “Ɛtɔna aba bong atɔgɛ, ‘Nsɔjama njo, ngba bɛl nseng ɛkpuga bɛrɔn na akpuga ya ɔkarɔ mam.’

¹⁹ “Ndɛ njo afanga, ‘Wɔ kɔ ɛjiba bɛrɔn wɔ ɔbabɛ.’

²⁰ “Ndɔgalitom yɔ ngɔ aba bong atɔgɛ, ‘Nsɔjama njo, nga akpuga aya nkɔl ɛjag mbɔma mbɔb mbir.

²¹ Mɛ njɔl wa bɛ, ateb wɔ ɔre nkora nɛnom, ɔyege ji ɔdɛnɔ kag, ɔfuga ji ɔdɛnɔ bim.’

²² “Ndɛ njo afanga, ‘Mɛ na kɔ alom aya nama, wɔ mbeb aligbɛna ndɔgalitom, wɔ ɔnyinyi arɛ mɛ nkora nɛnom yɔ, mɛ nyege ji ndɛnɔ kag, nfuga ji ndɛnɔ bim.

²³ Bɛjom ji ɔdɛnɔ kag akpuga ama na njo ɛtore akpuga, na ngara yi nɔ fɛngɛ njim na kɔ akpuga ma na nseng?’

²⁴ “Abong atɔg anɛ ba ayemɔ fɔ, ‘Tabɛ wɛ akpuga yafɔ ɔkarɛ nɛ yɔ akpenɔ ɛkpuga woba.’

²⁵ “Abɔ abong atɔgɛ, ‘Nsɔjira njo, ɛyogyoge akpe ɛkpuga woba!’

²⁶ “Wɛ afanga, ‘Mɛ ntɔga wa ndɛ nɛ yɔ akpenɔ alɛ kpɛ kpɛlɛ, nɛ yɔ adɛnɔ bɛl, ɛjɔl ji akpenɔ alɛ tatabɛ.

²⁷ Anɛ ba ajing abama bafɔ ba adɛg sɛb arɛ mɛ njɔl ntol abɔ, ba na abɔ fa wun ɔyol abɔ na libri ɛlama.’”

Jisɔs ayɛl na Jɛrusɛlɛm mɔng ntol

²⁸ Naji Jisɔs alɔ bong fɛb, atum agbɔ mba na Jɛrusɛlɛm.

²⁹ Naji arirɔ alagɛ ɛjiba Bɛtfeg na ɛjiba Bɛtani na Ɛwɔng Ɔlif, atom batɔnanjim abɛ abal, abong atɔg abɔ.

³⁰ “Ba sɔng na ɛjiba ji ɛreanɔ wun na ɔsi, mɔng wun ɔyɛla wun ɔla yɛn mɔn ɛnyinya mɔng atugɔ, ji nɛ awiawi adɛdɛ koma, fungi wun ɔkɔ ɔba naji fa.

³¹ Nɛ awiawi alɔ bib wun, ‘Ɛker nan wun ɔfungi?’ Ba tɔgɛ arɛ, ‘Tata yɔ asɛba.’ ”

³² Anɛ ba atomɔ ajil ayɛn anɔ mɔng ngara yi Jisɔs abɔngɔ

³³ Naji ajɔlɔ fungi mɔn ɛnyinya, nfɔngɛ abib abɔ, “Ɛker nan yɔ wun ɔfungi mɔn ɛnyinya ɔfɔ?”

³⁴ Abɔ afanga, “Tata yɔ asɛba.”

³⁵ Akɔ mɔn ɛnyinya aba karɛ Jisɔs, ayalɛ wɛ abɔma atab Jisɔs akone.

³⁶ Naji asenga, anɛ ayalɛ abɔma abɔ na mba.

³⁷ Naji arirɔ alagɛ Jɛrusɛlɛm na mfom yi mba ajɔlɔ ji ɛwɔng Ɔlif, batɔnanjim abɛ akuma njege Ɔsɔwɔ na ɛyɛbalitem na nyura lilom ateb akpɔga ɛsi a nsɔl kpakpa ya abɔ alɔ yɛn.

³⁸ Abɔ abong, “Lifola ɛjɔl na ntol yɔ abalɔ na mbeng a Tata!” “Likɔna na libonta na lijega li ɛyurɔyura!”

³⁹ Asi anɛ ba Farasi na ɛbɔngɛ jifɔ atɔg Jisɔs, “Nteteba, tɔg batɔnanjim aba alɔ ɛyɔg!”

⁴⁰ Jisɔs afanga abɔ arɛ, “Mɛ ntɔga wun, abɔ alɔ lɔ ɛyɔg atal ala kuma nkɔna.”

Jisɔs alul abangɛ Jɛrusɛlɛm

⁴¹ Naji arirɔ alagɛ Jɛrusɛlɛm ayɛn ɛjiba akuma nlula abangɛ,

⁴² abong, “Arenɔ arɛ wun ɔnyinɔnyi ɛlɛl ji ɛla ba na likɔna, batig ana ali wun bir.

⁴³ Ngara anɔnga alaga yi anɛ ba ɔjing abina ala si ɛga akag wun na lika, atob wun asibi agba wun akak.

⁴⁴ Ala wun rungi na abɔn abina na ɔnwɔlɛ bi ɛga. Ɛjɔl lital trang ɛnim sa li ɛla koma na ntɛm, ateb arɛ wun ɔrengam ngara yi Ɔsɔwɔ abalɔ arɛ aba anyangɛ wun!”

Jisɔs ayɛl na Njo Ɔsɔwɔ

⁴⁵ Jisɔs ayɛl na Njo Ɔsɔwɔ, akuma nkama anɛ ba ajɔlɔ gore nsɔl.

⁴⁶ Wɛ abong atɔg abɔ arɛ, “Agba yɛlɛ na nwɛr Ɔsɔwɔ, ‘Ɛtɛk ɛjama ɛla jɔl ɛtɛk ɔrɔ, wun ɔgba fɛngɛ ɔkɔ ɔbom ɛtɛk awaju!’ ”

⁴⁷ Kpakpa afo Jisɔs ajɔl teb anɛ na Njo Ɔsɔwɔ. Atol a balemanjɔm akarɛ Ɔsɔwɔ, ba teba ajing ya Mosis na atobɛsi anɛ ajɔl sɛb arɛ ayolɛ.

⁴⁸ Amalam ayɛn mba yi alɛ yol, ateb arɛ anɛ kpakpa ajɔl sɛb arɛ ayog alom ayɛ.