Nwɛr a Luk 18 - Abanyom LP New Testament Portions

Ligan li nkal a nkuanɛ na namabilam

¹ Jisɔs atob batɔnanjim abɛ ligan ateb abɔ arɛ ajɔ kag ɔrɔ kpakpa ngara adɛ jɔ arɛrɛ mbɔ.

² “Na ɛjiba jirang ɛbɛl namabilam yɔ adɛnɔ jɔ abɛ Ɔsɔwɔ nig akɛrɛ anɛ.

³ Na ɛjiba ji fɔ ɛtɔb ɛbɛl nkal akuanɛ yɔ ajɔl ba na agɛ agɔrɛ wɛ, ‘Lam ɛlam ɛjama kam na nɛ ɔjing ɔma.’

⁴ “Na ɛkɛbɛ ngara namabilam yɔfɔ ajɔl tɛtɛn, na nkulsi abong atɔg ɛlɛ, ‘Ɛjɔl mɛ ndɛ bɛ Ɔsɔwɔ nig ndɛ mbri anɛ,

⁵ Naji nkal a nkuanɛ yɔfa afege mam ayɔ, mɛ na wɛ karɛ ɔnɔ na ɛlam ɛjɛ naji adɛ kpɛ ba aba afegemam ayɔ.’ ”

⁶ Fɔyɔ Tata abongɔ arɛ, “Yog ji ɛbe namabilam yɔfa abongɔ.

⁷ Batig Ɔsɔwɔ anim teg akarɛ anɛ abɛ ɔnɔ ba arera ɛfente na alagtu akoga wɛ? Wɛ ala rungi ngara arɛ anyangɛ abɔ ɛ?

⁸ Mɛ ntɔga wun, wɛ ateg akarɛ abɔ ɔnɔ kakab. Ngara yi Mɔn a Nɛnom alɔ ba ala yɛyɛn ntamɛ na ɛyeng ɛ?”

Ligan li nɛ a Farasi na Nfora taksi

⁹ Jisɔs atob ligan atɔg anɛ ba akɛrɛ arɛ abɔ are ja afɛngɛ abri anɛ bangɔ adanga:

¹⁰ “Ɔfo brang, anɛ abal ajil na Njo Ɔsɔwɔ aji ɔrɔ nkaga, nɛ wurang nɛ a Farasi yɔngɔ nfora ataksi.

¹¹ Nɛ a Farasi atum ayema akak ɔrɔ: ‘Ɔsɔwɔ, mɛ na kag sam, ateb mɛ ndeyam mɔng anɛ bangɔ, mɛ nwaju arig, mɛ nɛ a abeɔfɛm arig, mɛ nim kara na nkal a nɛ. Mɛ ndeyam mɔng nfora taksi yɔfɔ.

¹² Mɛ njɔla ɔrɛm njal na mfo ɛbal na ɛrida, nsɔl ɛma yi mɛ nkpenɔ njɔga mbanga na mfom woba nyege mfom yirang nkarɛ wa.’

¹³ “Nfora ataksi ayema dagdagɛ. Abriam na libo, arom ɔbɔ na ngan abong, ‘O Ɔsɔwɔ, mɛ nfele wa ndɔn, mɛ nɛ abeɔfɛm yɔ!’

¹⁴ “Mɛ ntɔga wa, nfora taksi yɔ akurɔ na ɛtɛk na nsɛrɛ na libri Ɔsɔwɔ, nɛ a farasi arig. Anɛ ba ataba liabɔ ayura ala rɛda abɔ, anɛ ba abudi liabɔ ala tab abɔ ayura.”

Jisɔs akarɛ abɔnsɛ lifola

¹⁵ Anɛ abal na abɔn abɔ arɛ Jisɔs akone abɔ abɔ. Naji batɔnanjim abɛ ayɛnɔ asidi abɔ,

¹⁶ Jisɔs akog abɔnsɛ bafɔ atu ɛlɛ abong arɛ, “Nɔng abɔnsɛ aba na gama ɔtɔb kpɛ sidi abɔ ateb arɛ Ɔtol Ɔsɔwɔ ɛre ɛkarɛ anɛ mɔng abɔ.

¹⁷ Mɛ ntɔga wun ɛtete nɛ awiawi yɔ adɛnɔ kɔ Ɔtol Ɔsɔwɔ mɔng mɔnsɛ anim ma yɛl.”

Ɛfang nɛ

¹⁸ Ntobɛsi a Ju abib Jisɔs arɛ, “Nɔba nteteba, bɛjom ji mɛ na lem mbɛl likpen nsinsi?”

¹⁹ Jisɔs afanga wɛ arɛ, “Ɛker nan wɔ ɔkoga mam nɔba? Nɛ sang yɔ arenɔ nɔba ndɛg Ɔsɔwɔ nanting.

²⁰ Wɔ ɔyinyi ajing Ɔsɔwɔ: ‘Ɔtɔb kar na nkal anɛ, ɔtɔb yol anɛ, ɔtɔb yu ɛju, ɔtɔb yema njim akem, kponi nsɔja na nija.’ ”

²¹ Nɛnom yɔfɔ afanga, “Mɛ nɔnga mboma ajing yafa fɛb tatab ji njɔlɔ njangkon.”

²² Naji Jisɔs ayogɔ jifa, abong atɔgɛ, “Ɛkpe ɛjom jirang ji ɛlɔ sa ji ɔla lem. Gore nsɔl ɛya fɛb wɔ ɔkɔ akpuga yafɔ ɔkarɛ akpak, wɔ ɔla bɛl afang na libo, wɔ ɔba tɔna mam.”

²³ Naji nɛnom yɔfɔ ayogɔ agbɔ awuma, ateb arɛ ajɔl ɛfang nɛ.

²⁴ Jisɔs abri wɛ abong, “Ɛla jɔl nkore ɛjom arɛ ɛfang nɛ ayɛl Ɔtol Ɔsɔwɔ!

²⁵ Ɛla jɔl ndɛra ɛjom ɛkarɛ nfɔng alud na ɛbanga nga arɛ ɛfang nɛ ayɛl Ɔtol Ɔsɔwɔ.”

²⁶ Anɛ ba ayogɔ wɛ abib, “Ba nɛ yɔ ala fɛngɛ abɛl ɔnyangɛ?”

²⁷ Jisɔs afanga, “Ji ɛreanɔ nkore ɛjom ɛkarɛ anɛ arɛ alem ɛre ndɛra ɛjom ɛkarɛ Ɔsɔwɔ.”

²⁸ Pita abong arɛ, “Wur ɛgba da abɔ na nsɔl kpakpa ɛtɔna wa.”

²⁹ Jisɔs abong atɔg abɔ, “Mɛ ntɔga wun ɛtete, nɛ awiawi yɔ atumɔ ɛtɛk ɛjɛ asa, afi nkal ɔwɛ, afi abɔnyɛn abɛ afi ba ndɛ na nyɛn afi abɔn abɛ na ateb Ɔtol Ɔsɔwɔ

³⁰ ala bɛl ɛgbem ɛgbem na likpen lifa na likpen nsinsi na ɛyeng ji ɛbaga.”

Jisɔs akpɛ bong abangɛ liku ɛlɛ

³¹ Jisɔs atab batɔnanjim abɛ woba na abal aji na nkɛ abong atɔg abɔ, “Bayok! wur ɛfe na Jɛrusɛlɛm mfom yi kpakpa nsɔl yi ba yɛna amir ayɛlɔ abangɛ Mɔn a Nɛnom ɛla jɔl ɛtete.

³² Alɛ dabɔ akarɛ anɛ ba Jɛntal. Alɛ kli amin, ato wɛ, asu atɛl awuri wɛ,

³³ adu wɛ, akurɛ yol. Na mfo ɛra anyimi na liku.”

³⁴ Kpakpa nsɔl yi ajɔl bong ɛtegam ɛsar batɔnanjim abɛ. Ji ɛjogɔ na nsɔl yi ajɔl bong ɛsaram abɔ. Ajɔlam kun ji ajɔl bong abangɛ.

Jisɔs alem naga amir yɔ alɛma nsɔl ayɛn

³⁵ Naji Jisɔs alɔ sa kpekpede arir Jɛriko, ɛbɛl naga amir a nɛnom yɔ ajɔlɔ na nkɛ a mba alɛma nsɔl.

³⁶ Naji ayogɔ ɛyɔg ɛbɔngɛ anɛ ɛsenga, Wɛ abib, “Bɛjom ji ɛgbɔga?”

³⁷ Abɔ atɔgɛ, “Jisɔs yɔ Nasarɛt yɔ asenga.”

³⁸ Wɛ akɔn gbogbo, “Jisɔs! Mɔn a Defid, nɔng mɛ nfele wa ndɔn!”

³⁹ Anɛ ba ayemɔ na ɔsi ajɔ wɛ tɔg arɛ adɛ ɛyɔg, fɔyɔ atorɔ ajɔ kɔn gbogbo, “Mɔn a Defid, nɔng mɛ nfele wa ndɔn!”

⁴⁰ Jisɔs ayema atɔg abɔ arɛ akɔ wɛ aba nanɛ. Naji nɛnom yɔfɔ arirɔ kpekpede, Jisɔs abibɛ,

⁴¹ “Bɛjom ji wɔ ɔsɛba arɛ mɛ nem nkara?” Wɛ afanga, “Tata, mɛ nsɛba ndɛ mɛ nyɛn.”

⁴² Jisɔs abong atɔgɛ, “Yɛn! Ntamɛ ɛya agba wa lem ɔnɔb.”

⁴³ Fɔ tutu akuma nyɛna, wɛ atɔna Jisɔs, atiga Ɔsɔwɔ. Naji anɛ kpakpa ayɛnɔ akuma Ɔsɔwɔ ntiga titi.