Nwɛr a Luk 15 - Abanyom LP New Testament Portions

Ligan li njɔra yi atanɔ

¹ Bafora taksi na balema abeɔfɛm abal agba arɛ ayog Jisɔs.

² Anɛ ba Farasi na bateba ajing akuma numi, “Nɛnom ɔfa akpera balema abeɔfɛm aliga nsɔl na abɔ.”

³ Fɔyɔ Jisɔs atobɔ abɔ ligan lifa:

⁴ “Arenɔ arɛ nɛ wurang fa akpe njɔra atil arɔn yɔ yirang atanɔ. Anim tum atil ani na liko na ɛni yi asalɔ na ɛmɛ aji sɛb yirang yi alɔ tan tɛtɛ ayɛnɛ?

⁵ Alɔ yɛnɛ, litem ɛlɛ yɛbɛ atabɛ akone na ɛkpakpak.

⁶ Akuri na ɛyɛba litem na ɛtɛk. Aji kog atɛm abɛ na anɛ ba nkɔn tɛk arɛ, ‘Litem ɛyɛbɛ wun nanama, mɛ ngba yɛn njɔra ɛma yi atanɔ.’

⁷ Ntɔga wun ndɛ ntakpa ɛyɛba litem ala jɔl na libo ateb naji nɛ wurang alɔ gbɔ ndɔn na abeɔfɛm aseng anɛ atil ani na liko na ani ba arenɔ ateng anɛ ba adɛg sɛb arɛ agbɔ ndɔn.

Ligan li ɛkpuga ji ɛtanɔ

⁸ “Ɛlɔ jɔl arɛ nɛnkal akpe ɛkpuga woba yɔ ɛkpuga jirang ɛtanɔ. Wɛ anim nwɔlɛ ɛnwɔlɛ, afenge ɛtɛk kpakpa asɛb ɛnɔbnɔbɛ tɛtɛ ayɛnɛ?

⁹ Alɔ yɛn akog atɛm na anɛ ba nkɔn tɛk ɛyɛ arɛ, ‘Litem ɛyɛbɛ wun nanama, mɛ ngba yɛn ɛkpuga ɛjama ji ɛtanɔ.’

¹⁰ Na mba yifɔ titi, ɛyɛba litem ɛla jɔl na bateb ɔteb Ɔsɔwɔ ateb naji nɛ wurang alɔ gbɔ ndɔn.”

Ligan li mɔn yɔ lom yɔ atanɔ

¹¹ Jisɔs asɔra ɛsi abonga arɛ, “Ɛbɛl nɛnom wurang yɔ abɛlɔ abɔn abalom abal.

¹² Mɔnsɛ abong atɔg ndɛ, ‘Tata, kam mbanga nsɔl ɛma.’ Wɛ abanga nsɔl akarɛ abɔ.

¹³ “Ɛkaram mɔnsɛ yɔfɔ atab nsɔl kpakpa yi akpenɔ, atum lijɛn na ndabamba aji li ɛwo.

¹⁴ Naji alɔ li akpuga ya fɔ fɛb, fɔyɔ nkore ɔgba abalɔ na ɛjiba jifɔ, nsɔl ɛkingɛ.

¹⁵ Fɔyɔ akɔlɔ ɛlɛ aji karɛ nɛ wurang na ɛjiba jifɔ, yɔ ajɔl wɛ tom arɛ aji lɛ akog na ɛgbɛ ɛjɛ.

¹⁶ Ajɔl sɛb arɛ ali nsɔl yi akog, titi nɛ san yɔ ajɔl wɛ karɛ ɛjom ajiaji.

¹⁷ “Na nkulsi atore akun ɛlɛ, abong atɔg ɛlɛ, ‘Barɔgantom ba nsɔjama kpakpa akpe nsɔl yi aliga ɛsaga ɛrik mɛ nde fa njal alagam yol!

¹⁸ Mɛ na fɛngɛ njim nji na ji nsɔjama nji tɔgɛ ndɛ, Tata, mɛ ngba lem abeɔfɛm mbangɛ libo nana.

¹⁹ Mɛ nkpɛlam foma yɔ alam kog arɛ mɔn ɔwa kɔ mam mɔng barɔgantom aba wurang.’

²⁰ Fɔyɔ atumɔ ayema afɛngɛ naji ndɛ. “Naji akpenɔ re na ndabamba, nsɔjɛ ayɛnɛ ndɔn afele wɛ nanɛ; abɛna aji kɔn mɔn ɔwɛ akpera wɛ akugɛ nyɔ.

²¹ “Mɔn abong atɔgɛ arɛ, ‘Tata, mɛ ngba lem abeɔfɛm mbangɛ libo nana. Mɛ mkpɛlam foma yɔ alam kog arɛ mɔn ɔwa.’

²² “Ndɛ abong atɔg barɔgantom abɛ arɛ, ‘Baba kakab! Na ɛteng ɛleba wun ɔba yɔbɛ wɛ. Ɔkagɛ ɛbel na nyig ɔbɔ na akpagata na ata ayɛ.

²³ Ba na ntakpa nfɔng wun ɔyol. Ɛlem likag ɛrang.

²⁴ Ateb mɔn ɔma akpɔkpɔ batig are na likpen; wɛ atatan alitore ayɛnɛ.’ Abɔ akuma nranga.

²⁵ “Na ngara yi fɔ mɔnyɛn ɔwɛ yɔ kol ajɔl ngɔ na ɛgbɛ. Naji ajɛnɔ alagɛ ɛtɛk ayog bisɛ ɛkoba anɛ abina.

²⁶ Wɛ akog ndɔgalitom wurang abibɛ, ‘Bɛjom ji ɛgbɔga?’

²⁷ Wɛ afanga, ‘Mɔnyɛn ɔwa agba ba,’ fɔyɔ nsɔja alɔ yol ntakpa nfɔng arɛ anɛ arang ateb arɛ afɛngɛ akuri na nsɛrɛ.

²⁸ “Mɔnyɛn ɔwɛ yɔ ɔkol arag litem atɛn nyɛla na ɛtɛk; nsɔjɛ ajog aba kuma wɛ ngɔrɛ.

²⁹ Wɛ afanga nsɔjɛ arɛ, ‘Bri! Na anya yafa fɛb nema litom nkarɛ wa mɔng njo nka tɛnamtɛn ajiaji ji ɔtomɔmam. Wɔ mam ɔkategam ɔkarɛ na mɔn a mbol arɛ mɛ nkɔ nrang na atɛm abama.

³⁰ Mɔn ɔwa yɔ fa yɔ alɔ li nsɔl ɛya na abakal asasa naji alɔ akuri na ɛtɛk ɔli yol ntakpa nfɔng ɔkarɛ!’

³¹ “Nsɔjɛ abong atɔgɛ arɛ, Mɔn ɔma, wɔ ɔre fa na nama kpakpa ngara. ajiaji ji mɛ nkpenɔ ɛre ɛkara.

³² Nɔngɛ wur ɛrang ɛfɛngɛ ɛyɛbɛ litem, ateb mɔnyɛn ɔwa akpɔkpɔ batig are na likpen; atatan ali tore ayɛnɛ.”