Ysay 64 - An Bibel Kernewek 20234 (Kernewek Kemmyn)

¹ Unnweyth a kwrelles skwardya an nevow ha dos yn-nans, ha'n menydhyow ow krysya a-ragos!

² Kepar dell wra tan enowi kewydh ha gul dhe dhowr bryjyon, diyskynn dhe wul dha hanow aswonnys dhe'th eskerens, may krenno a-ragos an kenedhlow!

³ Pan wrussys taklow euthyk na waytsyn, ty a dheuth yn-nans, ha'n menydhyow a grysyas a-ragos.

⁴ A-henys tus ny glewas, na ny woslowas skovarn, na ny welas lagas duw marnas ty, neb a ober ragdho ev neb a'n gorta.

⁵ Ty a vet ganso ev neb a lowenha ha gul ewnder, neb a berth kov ahanas y'th fordhow. Otta, ty a sorras, ha ni a begha prest; mar siwyn dha fordhow, ni a vydh sawys.

⁶ Ni oll yw avel tra avlan, hag avel kweth woesek yw oll agan gweythyow gwiryon; ni oll a wedher avel delenn, ha'gan kammweythresow a'gan deg dhe-ves avel gwyns.

⁷ Nyns eus denvyth a elow war dha hanow na strivya dhe gavoes dalghenn ynnos; rag ty re gudhas dha fas ragon, ha'gan delivra yn leuv agan kammweythresow.

⁸ Ha lemmyn, Arloedh, ty yw agan Tas. Ni yw an pri, ha ty yw agan priweythor; ni oll yw ober dha leuv.

⁹ Na sorr dres eghenn, A Arloedh, ha na borth kov a anewnder bys vykken. Otta mir, ni oll yw dha bobel.

¹⁰ Dha sitys sans re dheuth ha mos gwylvos, Sion yw gwylvos, ha Yerusalem yw ynyalder.

¹¹ Agan chi sans ha gloryus, le may hwre agan tasow dha wormel yw leskys gans tan, hag oll agan tylleryow teg re dheuth ha bos magoryow.

¹² Yn despit dhe'n taklow ma, a omfronnydh, A Arloedh? A dewydh, ha'gan arwaska dres eghenn?