Ysay 24 - An Bibel Kernewek 20234 (Kernewek Kemmyn)

Breus ow Tos war an Norvys

¹ Awotta'n Arloedh ow gwastya an norvys ha'y dhistrui, ha difasya y enep, ha skattra y drigoryon.

² Hag y fydh an keth tra rag an bobel ha'n oferyas, rag an gwas ha'n mester, rag an vaghteth ha'y mestres, rag an prener ha'n gwerther, rag an prester ha'n chevisyer, rag an kresysor ha'n kendoner.

³ An norvys a vydh difeythys glan ha kowlrevnys, rag an Arloedh re gewsis an ger ma.

⁴ An nor a gyn hag a wedher, an bys a dhesygh hag a wedher; pobel ughel an norvys a wannha.

⁵ An nor yw defolys yn-dann y annedhysi; rag i re gammdremenas erbynn an laghys, ha chanjya an ordenans; i re dorras an kevambos a dhur bys vykken.

⁶ Rakhenna molleth a dhevor an nor, ha'y annedhysi a berth aga hessydhyans. Rakhenna lehes yw annedhysi an nor, ha nebes yw gesys.

⁷ Gwin nowydh a dhesygh ha'n gwinbrenn a wedher; oll an re yw heudh aga holonn a hanas.

⁸ Joy an tabourigow a hedh, tros an re lowen a dhifyk, ha joy an sowtri a hedh.

⁹ Ny evons gwin gans kan; korev yw hwerow dhe'n re a'n yv.

¹⁰ An sita a dheray yw terrys dhe'n dor; pub chi yw deges, ma na yll denvyth entra.

¹¹ I a oul rag gwin y'n stretys; oll lowena a dewlha, heudhder yw pellhes dhiworth an tir.

¹² Euth yw gesys y'n sita, an yetys yw brewys yn magoryow.

¹³ Yndellma y hwyrvydh yn kres an nor, yn mysk an poblow, kepar dell yw olewennow shakys dhiworth olewbrenn, kepar ha gesigow an grappys pan worfenn an drevas.

¹⁴ I a dhrehav aga lev, ha garma gans lowena; i a gri dhiworth an howlsedhes a-dro dhe veuredh an Arloedh.

¹⁵ Rakhenna y'n howldrevel ri glori dhe'n Arloedh; hanow an Arloedh, Duw Ysrael, yn ynysow an mor.

¹⁶ Dhiworth finyow an nor ni a glew kanow, splannder dhe'n Gwiryon. Yn-medhav, Tanowhes ov, tanowhes, go-vy! Traytours a drayt, traytours a drayt yn pur dhevri.

¹⁷ Euth, ha'n pytt, hag antell warnas, annedhyas an norvys!

¹⁸ Piwpynag a fio dhiworth tros an euth a goedh y'n pytt, ha piwpynag a yskynno dhiworth an pytt a vydh kechys y'n vaglenn. Rag fenestri an ughelder yw igerys ha selyow an norvys a gren.

¹⁹ An norvys yw dralys glan, an norvys yw folsys kwit, an norvys yw shakys yn harow.

²⁰ An norvys a drebuch avel penn-medhow, ha leska avel kryllas. Y gammweyth yw poes warnodho; ev a goedh, heb sevel namoy.

²¹ Y'n jydh na an Arloedh a gessydh lu an re ughel usi a-ugh, ha myghternedh an tir usi war an dor.

²² I a vydh kuntellys war-barth avel prisnoryon yn pytt, deges yn dorvagh, ha wosa lies dydh i a vydh kessydhys.

²³ An loer a's tevydh meth ha'n howl a vydh shamys; rag Arloedh an luyow a reyn yn menydh Sion hag yn Yerusalem, ha glorifiys vydh a-rag y henavogyon.