Ysay 23 - An Bibel Kernewek 20234 (Kernewek Kemmyn)

Profoesans a-dro dhe Tyr

¹ Profoesans a-dro dhe Tyr. Oulyewgh, a worholyon Tarshish; rag gwastys yw, heb chi, heb porth. Dhiworth pow Kyprus yw diskudhys dhedha.

² Tewewgh, annedhysi an arvor, marchons Sidon; yth esa dha gannasow ow tremena dres an mor

³ war dhowrow meur; greun Shihor o hy threvas, askorr an Nil; hag yth es marchont an kenedhlow.

⁴ Kemmer meth, Sidon, rag an mor re gewsis, kastell an mor, ow leverel, ‘Ny veuv yn lavur na ny dhineythis, ny vegis gwer grev na ny veythris gwyrghesow.’

⁵ Pan dheu an nowodhow dhe Ejyp, i a vydh yn angoes war dherivas Tyr.

⁶ Treusewgh dhe Tarshish, oulyewgh, annedhysi an arvor!

⁷ Yw homma acheson agas lowena, neb a veu hy dallethvos dhiworth an dydhyow koth, ha'y threys a's dros a-bell dhe driga?

⁸ Piw a gusulyas hemma erbynn Tyr, neb a ri kurunyow, neb yw hy marchons pennternedh, ha'y henwerthoryon yw an re enorys a'n nor?

⁹ Arloedh an luyow a'n kusulyas, rag uvelhe goeth an splannder oll, ha rag shamya oll an re enorys a'n nor.

¹⁰ Tremen dre dha dir avel an Nil, myrgh Tarshish; rag ny'th eus kay byth moy.

¹¹ Ev re ystynnas y leuv war an mor, ev re shakyas gwlaskordhow. An Arloedh re erghis erbynn Kanan dhe dhistrui hy hastylli.

¹² Ev a leveris, Ny lowenhydh byth moy, a wyrghes arweskys myrgh Sidon; sav, treus dhe Kyprus; ynwedh ena ny vydh powes dhis.

¹³ Mirewgh orth pow an Kaldeanys; nyns yns i pobel na fella; Assyria a'n destnas rag goedhviles. I a dhrehevis aga thouryow-esedhva, ha destryppya aga palesyow, ha'y wul magor.

¹⁴ Kynewgh, gorholyon Tarshish, rag agas skons yw gwastys.

¹⁵ Y'n jydh na Tyr a vydh ankevys deg ha tri-ugens blydhen, kepar ha dydhyow unn myghtern. Orth diwedh tri-ugens blydhen y hwyrvydh dhe Tyr kepar ha'n gan a-dro dhe'n hora:

¹⁶ Tann sowtri, ke a-dro dhe'n sita, ty hora ankevys; son daffar kerdyn yn ta, kan kanow pals, rag may fi kovhes.

¹⁷ Orth diwedh tri-ugens blydhen, an Arloedh a visit Tyr. Hi a dhehwel dh'y gober, ha gul horyans gans oll gwlaskordhow an bys war enep an nor.

¹⁸ Hy gwayn ha'y gober a vydh sans dhe'n Arloedh; ny vydh kuntellys na gwithys, mes hy gwayn a vydh rag an re a drig a-rag an Arloedh, rag lanwes boes ha dillas splann.