Yowann 1 - An Bibel Kernewek 20234 (Kernewek Kemmyn)

An Ger Gwrys Kig

¹ Y'n dalleth yth esa an Ger, hag yth esa an Ger gans Duw, ha'n Ger o Duw.

² Yth esa ev y'n dalleth gans Duw.

³ Pup-tra a veu gwrys ganso, ha hebdho ny veu gwrys travyth a veu gwrys.

⁴ Ynno yth esa bewnans, ha'n bewnans o golow mab-den;

⁵ ha'n golow a splann y'n tewlder, ha ny wrug an tewlder y fetha.

⁶ Yth esa den, dannvenys dhiworth Duw, Yowann y hanow.

⁷ Ev a dheuth rag dustuni, dhe dhoen dustuni a'n golow, rag may kryssa pub den oll dredho ev.

⁸ Nyns o ev an golow na, mes ev a dheuth dhe dhoen dustuni a'n golow.

⁹ Yth esa an gwir wolow hag a wolow pub den, ow tos y'n bys.

¹⁰ Yth esa ev y'n bys, ha'n bys a veu gwrys ganso, ha ny'n aswonnis an bys.

¹¹ Ev a dheuth dh'y byth y honan, ha ny'n degemmeras y dus y honan.

¹² Mes kemmys a'n degemmeras, dhedha y ros ev galloes dhe vos fleghes Duw, dhe'n re a grys yn y hanow ev,

¹³ an re na veu genys a woes, nag a vynnas kig, nag a vynnas gour, mes a Dhuw.

¹⁴ Ha'n Ger a veu gwrys kig hag a drigas yn agan mysk, ha ni a welas y wolewder, golewder avel dhe'n unn Vab dineythys a'n Tas, leun a ras hag a wirder.

¹⁵ Yowann a dhug dustuni anodho hag a grias, ow leverel, ‘Hemm o neb a leveris vy anodho, Neb a dheu war ow lergh re dheuth ha bos a-dheragov, rag yth esa ev kyns es dell esen vy.’

¹⁶ Rag a'y leunder ni oll re dhegemmeras, ha gras war ras;

¹⁷ rag an lagha a veu res dre Moyses; gras ha gwirder a dheuth dre Yesu Krist.

¹⁸ Denvyth ny welas Duw bythkweth; an unn Vab dineythys, neb usi yn askra an Tas, ev re'n diskudhas.

Dustuni Yowann Besydhyer

¹⁹ Ha hemm yw dustuni Yowann, pan dhannvonas an Yedhewon oferysi ha Levysi dhodho dhiworth Yerusalem, dhe wovynn orto, ‘Piw osta?’

²⁰ Hag ev a gonfessyas, ha ny naghas; mes ev a gonfessyas, ‘Nyns ov vy an Krist.’

²¹ Hag i a wovynnas orto, ‘Piw ytho? Osta Elias?’ Yn-medh ev, ‘Nag ov vy.’ ‘Osta an profoes?’ Hag ev a worthybis, ‘Nag ov.’

²² Ena yn-medhons dhodho, ‘Piw osta, may hyllyn ri gorthyp dhe'n re a'gan dannvonas? Pandr'a leverydh a-dro dhis dha honan?’

²³ Yn-medh ev, ‘My yw lev onan ow kria y'n gwylvos, “Gwra hyns an Arloedh kompes”, dell leveris Ysay an profoes.’

²⁴ An re dannvenys a veu dhiworth an Fariseow.

²⁵ Hag i a wovynnas orto ha leverel dhodho, ‘Prag ytho y pesydhydh mar nyns osta an Krist, nag Elias, na'n profoes?’

²⁶ Yowann a worthybis dhedha ow leverel, ‘My a vesydh gans dowr: mes yn agas mysk y sev nebonan na aswonnowgh;

²⁷ ev yw neb a dheu war ow lergh, ma nag ov vy gwiw dhe dhigelmi kroen y eskis.’

²⁸ An taklow ma a hwarva yn Bethani a'n tu arall dhe'n Yordan, mayth esa Yowann ow pesydhya.

Oen Duw

²⁹ Ternos ev a welas Yesu ow tos dhodho hag yn-medh ev, ‘Awotta Oen Duw neb a gemmer dhe-ves peghadow an bys.

³⁰ Hemm yw neb a leveris anodho, “War ow lergh y teu gour neb re dheuth ha bos a-dheragov, rag yth esa a-ragov.”

³¹ Ha ny'n aswonnis vy; mes rakhenna yth ov vy devedhys, ow pesydhya yn dowr: rag may fo ev diskwedhys dhe Ysrael.’

³² Ha Yowann a dhustunias ow leverel, ‘My a welas an Spyrys ow tos yn-nans dhiworth nev kepar ha kolomm, hag ev a wortas warnodho.

³³ Ha ny wrugavy y aswonn, mes neb a'm dannvonas dhe vesydhya yn dowr, ev a leveris dhymm, “Neb may hwelydh an Spyrys ow tos yn-nans warnodho hag ow kortos warnodho, hemm yw neb a vesydh gans an Spyrys Sans.”

³⁴ Ha my a welas hag a dhustunias hemma dhe vos Mab Duw.’

An Kynsa Dyskyblon

³⁵ Ternos, Yowann a sevis arta, ha dew a'y dhyskyblon.

³⁶ Hag ow mires orth Yesu ow kerdhes yn-medh ev, ‘Awotta Oen Duw!’

³⁷ Ha'n dhew dhyskybel a'n klewas ow kewsel, hag i a holyas Yesu.

³⁸ Ha Yesu a dreylyas ha'ga gweles owth holya, ha leverel dhedha, ‘Pandr'a hwilowgh?’ Yn-medhons dhodho, ‘Rabbi (henn yw dhe styrya, Dyskador), ple'th esos trigys?’

³⁹ Yn-medh ev dhedha, ‘Dewgh, ha gwelowgh.’ Ytho i a dheuth ha gweles le mayth esa trigys, hag a wodrigas ganso an jydh na; rag y feu a-dro dhe'n degves eur.

⁴⁰ Androw broder Simon Peder a veu onan a'n dhew neb a glewas Yowann ha neb a wrug y holya.

⁴¹ Ev a gavas y vroder y honan Simon yn kynsa hag yn-medh ev dhodho, ‘Ni re gavas an Messia’, (yw treylys, Krist).

⁴² Ev a'n dros dhe Yesu. Yesu a viras orto ha leverel, ‘Ty yw Simon mab Yowann. Ty a vydh henwys Kefas’ (yw treylys, Karrek).

Galow Felip ha Nathanael

⁴³ Ternos ev a vynnas mos dhe Alile, hag ev a gavas Felip. Ha Yesu a leveris dhodho, ‘Hol vy.’

⁴⁴ Ha Felip o dhiworth Bethsaida, sita Androw ha Peder.

⁴⁵ Felip a gavas Nathanael ha leverel dhodho, ‘Ni re'n kavas neb a skrifas Moyses hag ynwedh an brofoesi anodho y'n lagha, Yesu mab Yosep, a Nazareth.’

⁴⁶ Hag yn-medh Nathanael dhodho, ‘A yll travyth da dos mes a Nazareth?’ Yn-medh Felip dhodho, ‘Deus ha gwel.’

⁴⁷ Yesu a welas Nathanael ow tos dhodho hag yn-medh ev anodho, ‘Awotta Ysraelyas yn hwir, ma nag eus ynno gil!’

⁴⁸ Yn-medh Nathanael dhodho, ‘Fatell y'm aswonnydh?’ Yesu a worthybis dhodho, ‘Kyns Felip dhe'th helwel, my a'th welas yn-dann an figbrenn.’

⁴⁹ Nathanael a worthybis dhodho, ‘Rabbi, ty yw Mab Duw, ty yw Myghtern Ysrael.’

⁵⁰ Yesu a worthybis ha leverel dhodho, ‘Drefenn my dhe leverel dhis, “My a'th welas yn-dann an figbrenn”, a wredh krysi? Ty a wel taklow brassa es henna.’

⁵¹ Hag yn-medh ev dhodho, ‘Yn hwir, yn hwir y lavarav dhywgh, hwi a wel nev igerys, hag eledh Duw owth yskynna ha diyskynna war Vab an den.’