Yeremia 25 - An Bibel Kernewek 20234 (Kernewek Kemmyn)

Deg Blydhen ha Tri-ugens a Gethneth

¹ An ger hag a dheuth dhe Yeremia a-dro dhe bobel Yuda, y'n peswora blydhen Yehoyakim mab Yosia myghtern Yuda, hag o kynsa blydhen a Nebukadnessar myghtern Babylon,

² hag a gewsis Yeremia dhe oll pobel Yuda, ha dhe oll an annedhysi a Yerusalem, ow leverel:

³ A-dhia drydhegves blydhen Yosia mab Amon myghtern Yuda, bys y'n jydh ma, henn yw an tressa blydhen warn ugens, ger an Arloedh re dheuth dhymm, ha my re gewsis dhywgh yn tiwysyk, mes ny woslewsowgh.

⁴ Ha kyn tannvonas an Arloedh dhywgh oll y servysi an brofoesi, orth aga dannvon arta hag arta, ny woslewsowgh na ny blegsowgh agas skovarn dhe glewes.

⁵ I a leveris, ‘Treylyewgh lemmyn pubonan a'y fordh dhrog hag a dhrogedh agas gwriansow, ha trigewgh y'n tir a ros an Arloedh dhywgh ha dh'agas tasow bys vykken ha bynnari;

⁶ ha nag ewgh war-lergh duwow erell dh'aga servya ha'ga gordhya, ha na'm provokewgh dhe sorr gans ober agas diwleuv. Ena ny'gas pystigav.’

⁷ Mes ny woslewsowgh orthiv, yn-medh an Arloedh, ma'm provoksowgh dhe sorr gans ober agas diwleuv, dh'agas pystik agas honan.

⁸ Rakhenna yndellma y lever Arloedh an luyow: Drefenn na woslewsowgh orth ow geryow,

⁹ otta, my a dhannvon ha kemmeres oll teyluyow an gogledh, yn-medh an Arloedh, ha Nebukadnessar myghtern Babylon, ow gwas, ha my a's dre erbynn an tir ma hag erbynn y annedhysi, hag erbynn oll an kenedhlow ma usi a-derdro, ha my a wra aga sakra dhe dhistruyans, ha gul dhedha bos euth, ha hwibana, ha magoryow bys vykken.

¹⁰ Ynwedh my a gemmer a-dhiworta lev lowender ha lev lowena, lev an gour pries ha lev an venyn bries, son an meyn melin ha golow an gantol.

¹¹ An tir oll ma a vydh ynyal ha gwast, ha'n kenedhlow ma a serv myghtern Babylon deg blydhen ha tri-ugens.

¹² Ha pan vydh diwedh dhe'n deg blydhen ha tri-ugens, my a gessydh myghtern Babylon ha'n genedhel na, yn-medh an Arloedh, rag aga anewnder, ha tir an Kaldeanys, ha'y wul difeyth bys vykken.

¹³ Ha my a dhre war an tir na oll ow geryow a leveris er y bynn, pup-tra yw skrifys y'n lyver ma, a brofoesas Yeremia erbynn oll an kenedhlow.

¹⁴ Rag i a vydh gwrys kethyon gans lies kenedhel ha myghternedh veur, i ynwedh; ha my a attal dhedha herwydh aga gwriansow hag ober aga diwleuv.

Hanaf Sorr Duw

¹⁵ Rag yndellma y lever an Arloedh, Duw Ysrael dhymm: Kemmer hanaf gwin an sorr ma a'm leuv, ha gwra dhe bub kenedhel, ma'th tannvonav, y eva.

¹⁶ Hag i a yv ha trebuchya, drefenn an kledha a wrav vy y dhannvon yntredha.

¹⁷ Ena my a gemmeras an hanaf a-dhiworth leuv an Arloedh, ha gul dhe bub kenedhel eva, le ma'm dannvonas an Arloedh:

¹⁸ Yerusalem ha sitys Yuda ha'ga myghternedh ha'ga fennsevigyon, dh'aga gul magor, ynyalder, hwibana ha molleth, dell yns hedhyw;

¹⁹ Faro myghtern Ejyp, ha'y servysi, ha'y bennsevigyon, ha'y bobel oll;

²⁰ hag oll an bobel gemmyskys, hag oll myghternedh pow Us, hag oll myghternedh pow an Filistysi, hag Ashkelon, ha Gaza, hag Ekron ha remenant Ashdod;

²¹ Edom, ha Moab, ha'n Ammonysi;

²² hag oll myghternedh Tyr, hag oll myghternedh Sidon, ha myghternedh an ynysow usi dres an mor;

²³ Dedan, ha Tema, ha Buz, hag oll myns yw treghys blew aga thalyow;

²⁴ hag oll vyghternedh Arabia, hag oll myghternedh an bobel gemmyskys ma'th yw treghys blew aga thalyow;

²⁵ hag oll myghternedh Zimri, hag oll myghternedh Elam, hag oll myghternedh an Medys;

²⁶ hag oll myghternedh a'n gogledh, pell hag ogas, an eyl wosa y gila, hag oll gwlaskordhow an bys, usi war enep an nor: ha myghtern Sheshak a'n yv war aga lergh.

²⁷ Ena ty a lever dhedha, Yndellma y lever Arloedh an luyow, Duw Ysrael: Evewgh, bedhewgh medhow ha hwyja, ha koedhewgh ha na sevewgh namoy, drefenn an kledha a dhannvonav dhywgh.

²⁸ Ha mar naghons kemmeres an hanaf a'th leuv dhe eva, ena ty a lever dhedha, Yndellma y lever Arloedh an luyow: Res yw dhywgh eva!

²⁹ Otta, yth esov ow talleth dri drogedh war an sita may feu ow hanow gelwys warnedhi, hag a vydhowgh digeredh yn tien? Ny vydhowgh digeredh, rag yth esov ow kelwel kledha erbynn oll annedhysi an nor, yn-medh Arloedh an luyow.

³⁰ Ty, ytho, profoes er aga fynn oll an geryow ma, ha leverel dhedha: An Arloedh a us a'n ughelder, hag a'y drigva sans ev a re y lev; ev a us yn krev erbynn y annedh, ha garma, avel an re a drett an grappys, erbynn oll annedhysi an nor.

³¹ Tros a dheu bys yn penn an bys, rag an Arloedh a'n jeves ken erbynn an kenedhlow; ev a enter yn vreus erbynn kig oll; hag ev a worr an debeles dhe'n kledha, yn-medh an Arloedh.

³² Yndellma y lever Arloedh an luyow: Otta, drogedh a yn-rag a genedhel dhe genedhel, ha korwyns meur a vydh difunys a bella rannow an nor.

³³ An re ledhys gans an Arloedh a vydh y'n jydh na a'n eyl penn an nor bys y'n penn arall. Ny vydh kynvann ragdha, ha ny vydhons kuntellys na ynkleudhys; i a vydh kawgh war enep an nor.

³⁴ Oulyewgh, hwi vugeledh, ha kria; omrolyewgh yn lusu, hwi arlydhi an flokk; rag dydhyow agas ladhva ha'gas keskar yw devedhys, ha hwi a goedh avel lester teg.

³⁵ Ha ny'n jevydh an vugeledh fordh dhe fia, ha ny vydh diank dhe arlydhi an flokk.

³⁶ Lev kri an vugeledh, hag oulyans arlydhi an flokk! Rag an Arloedh a dhistru aga feurva,

³⁷ ha'n korlannow a gres a vydh gwastys drefenn sorr fers an Arloedh.

³⁸ Ev re asas y govva avel lew; rag aga thir yw ynyal drefenn kledha an arwasker, ha drefenn y sorr fers an Arloedh.