Salmow 64 - An Bibel Kernewek 20234 (Kernewek Kemmyn)

Dhe vester an keur. Salm a Davydh.

¹ Klew ow lev, A Dhuw, y'm krodhvol; gwith ow bewnans rag own a'n eskar.

² Kudh vy rag kusul gel an debeles, rag freudh an dhrogoberoryon,

³ neb a lymmas aga thaves avel kledha, hag a dewlis lavarow hwerow avel sethow;

⁴ rag may tennons yn keladow erbynn an den divlam; desempis i a denn er y bynn, heb perthi own.

⁵ I a ynni aga honan dhe dhregynn; i a omgusul a gudha antylli, hag yn-medhons, ‘Piw a wel?’

⁶ I a hwila anewnderow, i a gudh aga brasow. Kowses gour ha'y golonn yw down.

⁷ Mes Duw a denn y seth er aga fynn; desempis i a vydh goliys.

⁸ Ytho ev a's diswra drefenn aga thavosow aga honan; seul a's gwel a shak an penn.

⁹ Ha pub den oll a berth own, ha derivas gweythres Duw, ha prederi yn town a'y ober ev.

¹⁰ An den gwiryon a lowenha y'n Arloedh, hag a hwila skovva ynno ev. Re vostyo oll an re yw ewn aga holonn.