Salmow 34 - An Bibel Kernewek 20234 (Kernewek Kemmyn)

Salm a Davydh, pan omwul bos mus a-dherag Abimelek, ma'n tewlis ev mes, hag ev eth alena.

¹ My a vennik an Arloedh pup-prys; y wormola a vydh prest y'm ganow.

² Ow enev a wra y vost y'n Arloedh; an re hwar a glew anodho, ha lowenhe.

³ Meurhewgh an Arloedh genev vy, hag ughelhyn ni y hanow war-barth.

⁴ My a hwilas an Arloedh, hag ev a worthybis dhymm, ha'm delivra dhiworth pup-tra a borthav own anodho.

⁵ Mirewgh orto ha dewynnewgh gans joy; ena ny wra agas fasow perthi meth.

⁶ An den truan ma a elwis, ha'n Arloedh a glewas, ha'y sawya a'y ankenyow oll.

⁷ El an Arloedh a gamp a-dro dhe'n re a berth own anodho hag ev a's delirv.

⁸ Gwrewgh tastya ha gweles an Arloedh dhe vos da; gwynnvys an den a hwila skovva ynno ev.

⁹ Perthewgh own a'n Arloedh, hwi y syns ev, rag ny fyll travyth dhe'n re a berth own anodho.

¹⁰ An lewyon yowynk yw yn esow hag i a berth nown, mes ny fyll travyth dha dhe'n re a hwila an Arloedh.

¹¹ Dewgh, hwi fleghes, goslowewgh orthiv; my a dhysk dhywgh own an Arloedh.

¹² Py den eus neb yw hwansek dhe vewnans, hag a vynn dydhyow pals rag may hwello da?

¹³ Gwith dha daves rag drog, ha'th tiwweus rag leverel falsuri.

¹⁴ Treyl dhiworth drog, ha gwra da; hwila kres, ha'y helghya.

¹⁵ Yma dewlagas an Arloedh war an re wiryon, ha'y dhiwskovarn troha'ga kri.

¹⁶ Yma fas an Arloedh erbynn an re a wra drog, dhe gisya aga hovadh dhiworth an norvys.

¹⁷ An re wiryon a arm, ha'n Arloedh a glew, ha'ga delivra dhiworth aga ankenyow oll.

¹⁸ Yma an Arloedh ogas dhe'n re trogh aga holonn, hag ev a selow an re keudhesik aga spyrys.

¹⁹ Meur yw ankenyow an den gwiryon, mes an Arloedh a'n delirv dhiworta oll.

²⁰ Ev a syns y eskern oll; nyns yw onan anedha brewys.

²¹ Droktra a ladh an tebelwas, ha'n re a gas an den gwiryon a vydh kessydhys.

²² An Arloedh a dhaspren enev y wesyon; ha ny vydh kessydhys denvyth a'n re a hwila skovva ynno ev.