Salmow 140 - An Bibel Kernewek 20234 (Kernewek Kemmyn)

Dhe vester an keur. Salm a Davydh.

¹ Gwra ow delivra, A Arloedh, dhiworth an tebelwas; gwith vy rag an gour garow,

² neb a dewl droktowlow yn aga holonn, ha pub dydh oll i a sord breselyow.

³ I re lymmas aga thaves avel sarf; yma venim nadres yn-dann aga diwweus. Sela.

⁴ Gwith vy, A Arloedh, rag diwleuv an tebelwas; gwith vy rag an gour garow, neb a dewl towlow dhe wul dhe'm treys trebuchya.

⁵ An re woethus re gudhas maglenn er ow fynn, ha gans kerdyn ystynn roes, i re worras antylli ragov ryb an fordh. Sela.

⁶ My a leveris dhe'n Arloedh, ‘Ow Duw osta jy; klew lev ow govynnadow, A Arloedh.

⁷ A Arloedh Duw, nerth ow selwyans, ty re beu skoes dhe'm penn yn dydh an gas.

⁸ Na wront, A Arloedh, mynnas an tebelwas; na wra dh'y dhroktowl spedya. Sela.

⁹ ‘An re a omsett a-dro dhymm a dhrehav aga fennow; gwres dregynn aga diwweus aga fetha.

¹⁰ Koedhes warnedha kolennow bew leskys; bedhens i tewlys yn pollow leysek ma na yskynnons arta.

¹¹ Na vedhes fastys y'n tir an gour a gews sklander; gwres droktra helghya an gour garow dhe derroes.’

¹² My a woer y hwra an Arloedh pledya ken an den gwann, ha mentena gwir an voghosogyon.

¹³ Sur, an re wiryon a woer gras dhe'th hanow; an re ewnhynsek a drig a-dheragos.