Salmow 115 - An Bibel Kernewek 20234 (Kernewek Kemmyn)

¹ Na ro dhyn ni, A Arloedh, na ro dhyn ni an gordhyans, mes dhe'th hanow jy, a-barth dha dregeredh ha'th wiryonedh.

² Prag y lever an kenedhlow ‘Ple'ma aga Duw?’

³ Mes agan Duw, yma ev y'n nevow; ev re wrug kekemmys a vynnas.

⁴ Aga imajys yw arghans hag owr, ober diwleuv den.

⁵ Ganow a's teves, mes ny gewsons; dewlagas a's teves, mes ny welons.

⁶ Diwskovarn a's teves, mes ny glewons; dewfrik a's teves, mes ny vlasons.

⁷ Diwleuv a's teves, mes ny davons; treys a's teves mes ny gerdhons; ny gewsons der aga bryansenn

⁸ An re a's gwra yw kehaval dhedha; hag ynwedh oll an re a drest ynna.

⁹ A Ysrael, trest y'n Arloedh; ev yw aga gweres ha'ga skoes.

¹⁰ A ji Aron, trest y'n Arloedh; ev yw aga gweres ha'ga skoes.

¹¹ Hwi neb a berth own a'n Arloedh, trestyewgh y'n Arloedh; ev yw aga gweres ha'ga skoes.

¹² An Arloedh re borthas kov ahanan, hag ev a'gan bennik; ev a vennik chi Ysrael, ev a vennik chi Aron.

¹³ Ev a vennik an re a berth own a'n Arloedh, kekeffrys byghan ha bras.

¹⁴ An Arloedh a'gas moghha moy ha moy, hwi ha'gas fleghes.

¹⁵ An re bennigys gans an Arloedh owgh hwi, formyer nev ha nor.

¹⁶ An nevow yw nevow an Arloedh, mes an nor re ros ev dhe vebyon den.

¹⁷ Ny wormel an re varow an Arloedh, naneyl oll an re a dhiyskynn dhe daw.

¹⁸ Mes ni a vennik an Arloedh alemma rag ha bys vykken. Gormelewgh an Arloedh.