Romanyon 3 - An Bibel Kernewek 20234 (Kernewek Kemmyn)

¹ Ytho py les eus dhe'n Yedhow? Pyth yw dader an trodreghyans?

² Meur war bub fordh. Wostalleth an Yedhewon a's teves gwitha lavarow Duw.

³ Pandra, mars o nebes anedha dislel? A dhomhwel aga dislelder lelder Duw?

⁴ Kammenn vyth! Bedhes Duw gwir kyn fo pub den fals, dell yw skrifys, ‘Rag may fi prevys ewn y'th heryow ha tryghi pan vi breusys.’

⁵ Mes mar tiskwa agan droktra ewnder Duw, pandr'a wren leverel? Duw dhe vos anewn pan y'gan kessydh yn sorr? (Avel den y kowsav.)

⁶ Kammenn vyth! Poken fatell allsa Duw breusi an bys?

⁷ Mes mar palsha gwirder Duw dh'y wolewder der ow falsuri, prag yth esov hwath ow pos kuhudhys avel peghador?

⁸ Ha prag na wrer drog rag may teffo da? – dell y'gan kuhudh nebes ni dhe leverel yn unn sklandra. Aga dampnya yw teg.

Nyns yw Nagonan Vyth Gwiryon

⁹ Pandra ytho? On ni an Yedhewon byth dhe well? Nag on kammenn; rag my re guhudhas bos pub den, keffrys an Yedhewon ha'n Grekys, yn-dann alloes pegh,

¹⁰ dell yw skrifys, ‘Nyns yw onan vyth gwiryon, na, nagonan vyth;

¹¹ ny gonvedh denvyth, ny hwila denvyth Duw.

¹² Peub re dreylyas dhe denewen, war-barth galsons i kamm; ny wra da, nagonan vyth.

¹³ Aga bryansenn yw bedh igor. I a doell gans aga thaves. Yma venim serf yn-dann aga diwweus.

¹⁴ Leun yw aga ganow a vollothow ha hwerowder.

¹⁵ Skav yw aga threys dhe skoellya goes,

¹⁶ yn aga hynsyow yma terroes ha galar,

¹⁷ ha'n hyns a gres ny aswonnsons.

¹⁸ Nyns eus own a Dhuw a-rag aga dewlagas.’

¹⁹ Lemmyn ni a woer, pypynag a lavarro an lagha kewsys yw dhe'n re usi yn-dann an lagha, rag may fo pub ganow deges, ha rag may fo an bys oll yn-dann vreus Duw.

²⁰ Rag ny vydh denvyth justifiys der oberow an lagha, a-ban dheu aswonnvos pegh der an lagha.

Ewnder dre Fydh

²¹ Mes lemmyn ewnder Duw re beu diskwedhys a-der gans an lagha, kyn hwrug an lagha ha'n brofoesi doen dustuni anodho,

²² ewnder Duw dre fydh yn Yesu Krist rag oll hag a grys. Rag nyns eus dibarth;

²³ rag oll re beghas, hag i a fyll a hedhes dhe wordhyans Duw,

²⁴ justifiys yns gans y ras yn ro, der an daspren usi yn Krist Yesu,

²⁵ neb a worras Duw yn-rag avel tregeredhva dre fydh yn y woes, dhe dhiskwedhes y ewnder, ow kasa heb kessydhyans an peghosow re bia gwrys kyns;

²⁶ henn o dhe brevi y'n eur ma ev y honan dhe vos gwiryon hag ev dhe justifia neb a'n jeves fydh yn Yesu.

²⁷ Ytho ple'ma agan bostya? Eskes yw. Drefenn py lagha? Lagha an oberow? Na, drefenn lagha fydh.

²⁸ Rag ni a syns den dhe vos justifiys dre fydh a-der der oberow an lagha.

²⁹ Po unnsel dhe'n Yedhewon yw ev Duw? A nyns yw ev Duw an kenedhlow ynwedh? Yw, a'n kenedhlow ynwedh,

³⁰ drefenn Duw dhe vos onan; hag ev a justifi an re a's teves trodreghyans war sel aga fydh ha'n re antrodreghys der aga fydh.

³¹ A dhomhwelyn an lagha gans fydh? Kammenn vyth! Yn konter, ni a venten an lagha.