Romanyon 15 - An Bibel Kernewek 20234 (Kernewek Kemmyn)

Ples Re Erell, a-der Dha Blesya dha Honan

¹ Y tegoedh dhyn ni neb yw krev perthi difygyow an re wann, heb omblesya.

² Plegyn ni, peub ahanan, dh'y gentrevek rag da, rag y dhrehevel.

³ Rag ny omblesya Krist; rag dell yw skrifys, ‘Kabel an re a'th kabla a goedhas warnav.’

⁴ Rag pypynag a veu skrifys kyns a veu skrifys rag agan dyski, rag may hwrellen der agan perthyans ha dre gonfort an skryptors, kavoes govenek.

⁵ Re rollo dhywgh an Duw a berthyans hag a gonfort may fewewgh yntredhowgh y'n keth kessenyans herwydh Krist Yesu,

⁶ rag may hwormollowgh war-barth gans unn ganow Duw ha Tas agan Arloedh Yesu Krist.

An Aweyl rag Yedhewon ha'n Kenedhlow War-barth

⁷ Kemmerewgh ytho an eyl y gila, par dell re'gas kemmeras Krist rag glori Duw.

⁸ Rag y lavarav dhywgh y teuth Krist ha bos menyster dhe'n re drodreghys rag gwirder Duw, rag surhe an ambosow a veu res dhe'n tasow,

⁹ ha rag may hwormolla an kenedhlow Duw rag y dregeredh. Dell yw skrifys, ‘Rakhenna my a vynn dha wormel yn mysk an kenedhlow ha kana dhe'th hanow jy’;

¹⁰ hag arta ev a lever, ‘Lowenhewgh, A genedhlow oll, gans y bobel!’

¹¹ hag arta, ‘Gormelewgh an Arloedh, an kenedhlow oll, hag a'n gormeles an poblow oll!’

¹² Hag arta Ysay a lever, ‘Gwreydhenn Yesse a dheu, neb a sev dhe rewlya an kenedhlow, ynno an kenedhlow a's tevydh govenek.’

¹³ Re'gas lanwo an Duw a wovenek a bub lowender hag a gres yn krysi, rag may palshahowgh yn govenek dre alloes an Spyrys Sans.

An Charj dhe Powl avel Aweyler

¹⁴ Ha surhes ov ow honan, ow breder, yn agas kever, hwi ynwedh dhe vos leun a dhader, lenwys a bub godhvos, had abel dhe ri kusul an eyl dh'y gila.

¹⁵ Ha my a skrifas dhywgh moy hardh, yn rann dhe dhri dh'agas kov, der an ras a veu res dhymm gans Duw,

¹⁶ rag may fiv vy menyster Yesu Krist dhe'n kenedhlow, avel oferyas dhe aweyl Yesu Krist rag may fo offrynn an kenedhlow kemmeradow, sanshes gans an Spyrys.

¹⁷ Bostya a'm beus yn Yesu Krist rag an gonis rag Duw.

¹⁸ Rag ny vynnav bedha kewsel a-dro dhe dravyth a-der an pyth a wrug Krist ynnov dhe wul an kenedhlow gostydh, dre er ha der ober,

¹⁹ dre alloes toknys ha marthusyon, dre alloes Spyrys Duw, bys may hyllyn kowlwul pregoth aweyl Yesu Krist dhiworth Yerusalem hag yn kylgh bys yn Illyrikum,

²⁰ yndella fest ow strivya pregoth an aweyl, y'n tylleryow ma na veu henwys Krist kyns, rag na dhreheffen war sel onan arall,

²¹ mes dell yw skrifys, ‘An re ma na veu pregewthys dhedha a wel, ha'n re na glewsons a wra konvedhes.’

Towl Powl dhe Vos dhe Rom

²² Yndella fest yn fenowgh lettys veuv na dheuth vy dhywgh.

²³ Mes lemmyn nyns eus tyller dhymm y'n ranndiryow ma, ha hwans re'm beu a dhos dhywgh nans yw nebes blydhynyow,

²⁴ pan wrylliv vyajya dhe Spayn. Rag govenek a'm beus, pan dremenav dresowgh, a'gas gweles ha genowgh dhe vos dannvenys war ow fordh, wosa my dhe vos lenwys ahanowgh yn rann.

²⁵ Mes lemmyn my a dhe Yerusalem ow menystra dhe'n syns.

²⁶ Rag da o gans Makedonia hag Aghaia provia nebes rag an voghosogyon yn mysk an syns yn Yerusalem.

²⁷ Rag da o gansa ha kendonoryon dhedha yns, rag mar kevrenna an kenedhlow gansa yn aga thaklow spyrysel, y tegoedh dhedha ynwedh yn taklow a'n kig menystra dhedha.

²⁸ War-lergh gorfenna hemma ytho ha war-lergh selya dhedha an frut ma, yth av dredhowgh dhe Spayn;

²⁹ ha my a woer, pan dhyffiv, y hwrav dos dhywgh yn leunder bennath Krist.

³⁰ My a'gas pys, a vreder, der agan Arloedh Yesu Krist, ha dre gerensa an Spyrys may striffyowgh genev yn agas pysadow dhe Dhuw a'm govis,

³¹ rag may fiv delivrys a'n dhiskryjygyon yn Yudi ha may fo ow gonis rag Yerusalem degemmeradow dhe'n syns,

³² rag may tyffiv dhywgh yn lowender dre vodh Duw ha powes genowgh.

³³ Ha'n Duw a gres re bo genowgh hwi oll. Amen.