Romanyon 14 - An Bibel Kernewek 20234 (Kernewek Kemmyn)

Na Vreus Dha Vroder

¹ Ha neb yw gwann y'n fydh, degemmerewgh e heb dadhla a-dro dhe dybyansow.

² Onan a grys y hyll dybri pup-tra, mes an den gwann ny dheber saw unnsel losow;

³ na wres neb a dheber skornya ev neb na dheber, ha na wres neb na dheber breusi ev neb a dheber, rag Duw re'n degemmeras.

⁴ Piw os jy hag a vreus servont den arall? A-rag y vester y honan y sev po y koedh. Ha skoedhys vydh, rag Duw a yll gul dhodho sevel.

⁵ Unn den a syns unn jydh gwell ages dydh arall, ha den arall a syns pub dydh par. Bedhes peub sur yn y vrys y honan.

⁶ Neb a syns dy'goel, dhe'n Arloedh y'n syns, ha neb a dheber, dhe'n Arloedh y teber rag yth aswonn gras dhe'n Arloedh; ha neb na dheber, ny dheber ev dhe'n Arloedh hag ev a aswonn gras dhe Dhuw.

⁷ Ny vew nagonan ahanan dhodho y honan ha ny verow nagonan dhodho y honan.

⁸ Mar pewyn, dhe'n Arloedh y pewyn ha mar merwyn, dhe'n Arloedh y ferwyn; ytho bewa po merwel mar kwren, dhe'n Arloedh yth on.

⁹ Rakhenna Krist a verwis ha dasvewa, rag may fe Arloedh an re varow ha'n re vew.

¹⁰ Prag y freusydh dha vroder, po prag y skornydh dha vroder? Rag ni oll a wra sevel a-rag barr Duw.

¹¹ Rag skrifys yw, ‘Dell vewav, yn-medh an Arloedh, pub glin a wra plegya dhymmo vy ha pub taves a wormel Dhuw.’

¹² Ytho peub ahanan a re akont dhe Dhuw yn y gever y honan.

Na Wra dhe'th Vroder Trebuchya

¹³ Ytho na vreusyn an eyl ahanan y gila mes breusyn yn kynsa na worryn men trebuchya po maglenn yn fordh an broder.

¹⁴ My a woer ha gwrys sur ov gans an Arloedh Yesu, nag yw travyth kemmyn dredho y honan, mes gans an den a dyb y vos kemmyn, kemmyn yw.

¹⁵ Mes mara'n jevydh dha vroder offens der an pyth a dhybrydh, ny gerdhydh na fella yn kerensa. Na as dha voes dhe dhistrui nebonan may ferwis Krist a'y wovis.

¹⁶ Ytho na as may fo agas da dampnys.

¹⁷ Rag nyns yw gwlaskor Duw dybri nag eva mes ewnder ha kres ha lowender y'n Spyrys Sans;

¹⁸ neb a serv Krist yndella yw plegadow gans Duw ha kevys da gans tus.

¹⁹ Holyn ytho taklow a gres ha'n taklow may trehav dredha an eyl y gila.

²⁰ Na dhistru a-barth boes ober Duw. Pup-tra yw glan yn tevri mes kamm yw nebonan dhe wul may trebucchyo re erell der an pyth a dheber ev.

²¹ Ewn yw bos heb dybri kig po eva gwin po bos heb gul travyth hag a wra may trebucchyo dha vroder.

²² An fydh a'th eus, gwith hi ragos dha honan a-rag Duw; gwynnvys neb na omvreus y'n pyth yw da ganso.

²³ Mes neb a'n jeves dout, dampnys yw ev mar teber, rag ny'n gwra a fydh; rag oll na dheu a fydh yw pegh.