Romanyon 12 - An Bibel Kernewek 20234 (Kernewek Kemmyn)

An Bewnans Nowydh yn Krist

¹ My a'gas pys, a vreder, dre druedhow Duw, may proffyowgh agas korf avel sakrifis bew, sans, plegadow dhe Dhuw, hag yth yw agas gwir wonis spyrysel;

² ha na vedhewgh keskonformys orth an oes ma, mes bedhewgh dasformys dre nowydhheans an brys, rag may preffowgh pandra yw bodh Duw, hag yw da ha plegadow ha perfydh.

³ Rag y lavarav der an ras res dhymm dhe beub usi yn agas mysk na'n jeffo tybyansow ughel dres an pyth y tegoedh y dybi, mes may typpo gans brys sevur, herwydh an myns a fydh a rannas Duw dhodho.

⁴ Rag dell y'gan beus yn unn korf lies esel, mes heb bos dhe'n eseli oll an keth gweythres,

⁵ yndella ni, pals dell on, unn korf on yn Krist ha pub huni eseli an eyl a'y gila.

⁶ Ha dhyn ni rohow herwydh an gras re beu res dhyn, hag i dihaval: neb a brofoes, re brofoesso herwydh myns an fydh;

⁷ neb a serv, re serfyo; neb a dhysk, re dhysko;

⁸ neb a gennerth, re gennertho neb a gevrenn, re gevrenno yn sempledh; neb a hembronk, re hembronko yn tiwysyk; neb a dhiskwa tregeredh, re bo gans lowena.

Rewlys an Bewnans Kryjyk

⁹ Gwres kerensa bos gwiryon; kesewgh an drog, glenewgh orth an da;

¹⁰ ow kara an eyl y gila, yn keskerensa, ow kesstrivya an eyl gans y gila ow tiskwedhes enor;

¹¹ yn diwysykter heb sygerneth, yn spyrys owth enowi, ow servya an Arloedh,

¹² yn govenek ow lowenhe, yn galar ow tiskwedhes perthyans, ow pesya yn tiwysyk yn pysadow,

¹³ ow provia rag edhommow an syns, ow siwya helder.

¹⁴ Bennigewgh an re a'gas helgh, bennigewgh ha na vollethewgh.

¹⁵ Lowenhewgh gans an re a lowenha, oelewgh gans an re a oel;

¹⁶ bedhewgh yn akord an eyl gans y gila; heb gul vri a'n taklow ughel, mes dhe'n re uvel ow plegya; na vedhewgh goethus.

¹⁷ Na attelewgh drog dhe dhenvyth orth drog; prederewgh a daklow da a-rag tus oll;

¹⁸ Mar kyllir, myns may hyllowgh, ow hwilas kres gans tus oll.

¹⁹ Na omdhialewgh, hwi garadowyon, mes rewgh le dhe gonnar Duw; rag skrifys yw, ‘Dial yw dhymm, my a attal’, yn-medh an Arloedh.

²⁰ Mes pella, ‘Mars eus nown dhe'th eskar, mag e; mars eus syghes dhodho, ro diwes dhodho; rag ow kul hemma ty a worr bern a golennow bew war y benn.’

²¹ Na vedhewgh fethys gans an drog, mes fethewgh an drog gans an da.