Niverow 20 - An Bibel Kernewek 20234 (Kernewek Kemmyn)

Mernans Miryam, ha Dowrow Meriba

¹ Ha mebyon Ysrael, an kuntelles oll, a dheuth a-ji dhe wylvos Sin y'n kynsa mis, ha'n bobel a wortas yn Kadesh; ha Miryam a verwis ena, hag a veu ynkleudhys ena.

² Lemmyn nyns esa dowr rag an kuntelles; hag i a omguntellas war-barth erbynn Moyses hag erbynn Aron.

³ Ha'n bobel a genkias gans Moyses ow leverel, ‘A marwen pan verwis agan breder a-rag an Arloedh!

⁴ Prag y tresys kemmynieth an Arloedh a-berth y'n gwylvos ma, may ferwyn omma, ha ni ha'gan chatel?

⁵ Ha prag y hwrussys dhyn dos yn-bann yn-mes a Ejyp, dh'agan dri dhe'n tebel dyller ma? Nyns yw tyller rag hasa has, na figys, na gwinbrennyer, na greunavalow; ha nyns eus dowr dh'y eva.’

⁶ Ena Moyses hag Aron eth a-dhiworth lok an gemmynieth dhe dharas tylda an kuntelles, ha koedha war aga fas. Ha golewder an Arloedh a omdhiskwedhas dhedha,

⁷ ha'n Arloedh a leveris dhe Moyses:

⁸ Kemmer an welenn, ha dri an kuntelles war-barth, ty hag Aron dha vroder, ha kewsewgh orth an garrek a-rag aga lagasow ha hi a re hy dowr; yndellma ty a dhre dowr yn-mes a'n garrek ragdha; yndellma ty a re diwes dhe'n kuntelles ha'ga chatel.

⁹ Ytho Moyses a gemmeras an welenn esa a-dherag an Arloedh, dell worhemmynnis dhodho.

¹⁰ Ena Moyses hag Aron a guntellas an gemmynieth war-barth a-rag an garrek, hag ev a leveris dhedha, ‘Klewewgh lemmyn, a dus dhiwostydh; a wren ni dri dowr ragowgh yn-mes a'n garrek ma?’

¹¹ Ha Moyses a dhrehevis y dhorn ha gweskel an garrek gans y welenn diwweyth; ha dowr a dheuth yn-mes yn lanwes, ha'n kuntelles a evas, ha'ga chatel.

¹² Ha'n Arloedh a leveris dhe Moyses ha dhe Aron, ‘Drefenn na dres'sowgh ynnov, dhe'm sanshe yn lagasow mebyon Ysrael, rakhenna ny vydhowgh ow tri an gemmynieth ma y'n tir re res dhedha.’

¹³ An re ma yw dowrow Meriba, le may kenkias mebyon Ysrael gans an Arloedh, ha dredha ev a brovas y vos sans.

Edom a Nagh Kummyas Tremena

¹⁴ Moyses a dhannvonas kannasow a Kadesh dhe vyghtern Edom, ‘Yndellma y lever dha vroder Ysrael: Ty a woer oll an anken yw hwarvedhys dhyn:

¹⁵ fatell eth agan tasow yn-nans dhe Ejyp, hag yth esen trigys yn Ejyp termyn hir; ha'n Ejyptianys a'gan dyghtyas yn harow, ha'gan tasow.

¹⁶ Ha pan grisyn war an Arloedh, ev a glewas agan lev, ha dannvon el, ha'gan dri yn-mes a Ejyp; hag ottani yn Kadesh, sita war amal dha diredh.

¹⁷ Lemmyn gas ni dhe dremena dres dha dir. Ny dremenyn der an gwel na der an gwinlannow, na ny wren eva dowr a buth; ni a wra mos yn fordh-veur an myghtern, ny dreylyn a-denewen dhe'n dyghow na dhe'n kledh, bys pan dremensyn dha diredh.’

¹⁸ Mes Edom a leveris dhodho, ‘Ny dremenowgh, ma na dhyffiv gans an kledha er dha bynn.’

¹⁹ Ha mebyon Ysrael a leveris dhodho, ‘Ni a gerdh der an fordh-veur; ha mar evyn a dha dhowr, my ha'm chatel, ena my a'n pe; gas vy unnweyth dhe dremena war droes, travyth moy.’

²⁰ Mes ev a leveris, ‘Ny dremenowgh.’ Hag Edom a dheuth yn-mes er aga fynn gans pobel niverus, ha gans dorn grev.

²¹ Yndellma Edom a naghas ri fordh dhe Ysrael der y diredh; ytho Ysrael a dreylyas a-dhiworto.

Mernans Aron

²² Hag i a dravalyas a-dhiworth Kadesh, ha mebyon Ysrael, an kuntelles oll, a dheuth dhe venydh Hor.

²³ Ha'n Arloedh a gewsis orth Moyses hag orth Aron yn menydh Hor, war amal pow Edom, ow leverel,

²⁴ ‘Aron a vydh kuntellys dh'y bobel; rag ny wra entra an tir re res dhe vebyon Ysrael, drefenn hwi dhe rebellya erbynn ow gorhemmynn orth dowrow Meriba.

²⁵ Kemmer Aron hag Eleazar y vab, ha'ga dri dhe venydh Hor;

²⁶ ha diwisk y dhillas a-dhiwar Aron, ha'ga gorra war Eleazar y vab; hag Aron a vydh kuntellys dh'y bobel, hag a verow ena.’

²⁷ Moyses a wrug dell worhemmynnis an Arloedh; hag i a yskynnas menydh Hor yn golok an kuntelles oll.

²⁸ Ha Moyses a dhiwiskas a-dhiwar Aron y dhillas, ha'ga gorra war Eleazar y vab; hag Aron a verwis ena war benn an menydh. Ena Moyses hag Eleazar a dhiyskynnas a'n menydh.

²⁹ Ha pan welas an kuntelles oll bos Aron tremenys, oll chi Ysrael a oelas rag Aron deg dydh warn ugens.