Mark 12 - An Bibel Kernewek 20234 (Kernewek Kemmyn)

Parabolenn an Winlann ha'n Diogyon

¹ Hag ev a dhallathas kewsel orta dre barabolennow: ‘Unn den a blansas gwinlann, ha gorra ke a-dro dhedhi, ha palas pytt dhe'n winwask ha drehevel tour, ha'y settya dhe diogyon, hag ena vyajya yn-kerdh.

² Hag yn termyn an drevas ev a dhannvonas kethwas dhe'n diogyon, may tegemmerra a-dhiworth an diogyon rann a drevas an winlann.

³ Mes i a'n dalghennas, ha'y gronkya, ha'y dhannvon dhe-ves gwag y dhiwla.

⁴ Hag arta ev a dhannvonas dhedha kethwas arall; hag i a'n kronkyas war an penn, ha'y dhespitya.

⁵ Hag ev a dhannvonas onan arall; ha henna i a'n ladhas; ha lower arall, ow kronkya re hag ow ladha re.

⁶ Yth esa dhodho hwath unn mab karadow; ev a'n dannvonas dhedha wortiwedh, ow leverel, “Gul vri a'm mab i a wra.”

⁷ Mes an diogyon na a leveris an eyl dh'y gila, “Hemm yw an her; deun, ledhyn ev, ha'n ertach a vydh dhyn ni.”

⁸ Hag i a'n kemmeras ha'y ladha, ha'y dewlel yn-mes a'n winlann.

⁹ Ytho pandr'a wra arloedh an winlann? Dos a wra ha distrui an diogyon, ha ri an winlann dhe re erell.

¹⁰ A ny redsowgh hwi an skryptor ma: “An men hag a veu skonys gans an weythoryon, henn yw gwrys pennmen an korn;

¹¹ gans an Arloedh y feu hemma gwrys, ha marthys yw yn agan dewlagas”?’

¹² Hag i a hwila settya dalghenn ynno, mes own a's teva a'n routh, rag i a wodhva ev dhe gewsel an barabolenn er aga fynn i, hag i a'n gasas, ha mos dhe-ves.

Ri Trubyt dhe Sesar

¹³ Hag i a dhannvonas dhodho re a'n Fariseow ha'n Herodianys, may hallens y vaglenna yn y lavarow.

¹⁴ Ha pan dheuthons yn-medhons dhodho, ‘Mester, ni a woer ty dhe vos gwir, ha ny'th teur mann a dhenvyth; rag ny virydh orth fas tus, mes ty a dhysk fordh Duw yn gwiryonedh. Yw lafyl ri trubyt dhe Sesar, po nag yw? A ren ni po na ren?’

¹⁵ Mes ev, owth aswonn aga falsuri, a leveris dhedha, ‘Prag y'm prevowgh vy? Drewgh dhymm dinerenn, may hallav hy gweles.’

¹⁶ Ytho i a's dros, hag yn-medh ev dhedha, ‘Piw a bew an imaj ma ha'n pennskrifa?’ Yn-medhons dhodho, ‘Sesar.’

¹⁷ Ha Yesu a leveris dhedha, ‘Attelewgh dhe Sesar an taklow yw dhe Sesar ha dhe Dhuw an taklow yw dhe Dhuw.’ Ha marth a's tevo anodho.

Govynn a-dro dhe'n Dasserghyans

¹⁸ Hag y teuth dhodho Sadukeow, neb a lever nag eus dasserghyans, hag yth esens ow kovynn orto, ow leverel,

¹⁹ ‘A Vester, Moyses a skrifas ragon, Mar merow broder neb den, ha gasa gwreg a-dhelergh, heb gasa flogh, y vroder a dal kemmeres an wreg, ha maga askorr dh'y vroder.

²⁰ Yth esa seyth broder; ha'n kynsa a gemmeras gwreg, ha pan verwis, ny asas askorr.

²¹ Ha'n nessa a's kemmeras, hag y ferwis heb gasa askorr; ha'n tressa kekeffrys;

²² ha'n seyth, ny assons askorr. Yn tiwettha oll an wreg a verwis y'n keth vaner.

²³ Y'n dasserghyans, pan sevons, piw anedha a's pew yn gwreg? Rag an seyth a's kemmeras yn gwreg.’

²⁴ Yn-medh Yesu dhedha, ‘A nyns yw drefenn na wodhowgh naneyl an skryptors, na galloes Duw, y kammdybowgh hwi yn hemma?

²⁵ Rag i pan dhasserghons a'n re varow, ny dhemmedhons, na ny vydhons demmedhys mes yth ens i avel eledh y'n nevow.

²⁶ Hag a-dro dhe'n re varow, i dhe vos drehevys, a ny redsowgh yn lyver Moyses, a-dro dhe'n bos, fatell gewsis Duw dhodho, ow leverel, My yw Duw Abraham, ha Duw Ysak, ha Duw Yakob?

²⁷ Nyns yw ev Duw an re varow, saw a'n re vew; hwi a gammdyp meur!’

An Gorhemmynn Meur

²⁸ Hag onan a'n skribys a dheuth yn-rag, ha wosa goslowes orta ow tisputya war-barth, hag ow kweles ev dhe worthybi dhedha yn ta, ev a wovynnas orto, ‘Py yw an kynsa gorhemmynn oll?’

²⁹ Yesu a'n gorthybis, ‘An kynsa yw, “Klew, A Ysrael; an Arloedh agan Duw yw unn Arloedh;

³⁰ ha ty gwra kara dha Arloedh Duw gans oll dha golonn, gans oll dha enev, gans oll dha vrys, ha gans oll dha nerth.” Hemm yw an kynsa gorhemmynn.

³¹ An nessa yw hemma, “Ty gwra kara dha gentrevek kepar dell omgerydh dha honan.” Nyns eus gorhemmynn arall brassa es an re ma.’

³² An skriba a leveris dhodho, ‘Yn ta, Mester, ty re gewsis an gwiryonedh, “Onan yma, ha nyns eus arall marnas ev”,

³³ hag “y gara gans oll an golonn, ha gans oll an skians, ha gans oll an enev, ha gans oll an nerth”, ha “kara y gentrevek kepar hag ev y honan”, hemm yw moy ages oll an offrynnow kowlleskys ha'n sakrifisow.’

³⁴ Ha Yesu, ow kweles ev dhe worthybi yn fur, a leveris dhodho, ‘Nyns osta pell a-dhiworth gwlaskor Duw.’ Ha ny lavasa denvyth govynn travyth orto na fella.

Govynn a-dro dhe Vab Davydh

³⁵ Ha Yesu a worthybis ha leverel, hag ev ow tyski y'n tempel, ‘Fatell yw, y lever an skribys Krist dhe vos mab Davydh?

³⁶ Davydh y honan a gewsis der an Spyrys Sans, “An Arloedh a leveris dhe'm Arloedh, ‘Ty esedh a'n barth dhyghow dhymm, erna worriv dha eskerens yn-dann dha dreys.’ ”

³⁷ Yma Davydh y honan orth y elwel Arloedh; ha fatell, ytho, ymava mab dhodho?’ Ha'n routh veur a woslowi orto yn lowen.

Kuhudhans an Skribys

³⁸ Hag ev a leveri yn y dhyskas, ‘Bedhewgh war a'n skribys, neb a gar kerdhes a-dro yn gwiskas hir, hag a gar salusyansow y'n marghasow,

³⁹ ha penn-esedhow y'n synagys, ha penn-esedhow y'n kevewiow,

⁴⁰ neb a lenk chiow an gwedhwesow, hag a wra pysadow hir yn fayntys; an re ma a's tevydh dhe voy dampnasyon.’

Offrynn an Wedhwes

⁴¹ Hag ev a esedhas a-dal an arghow, hag a weli fatell esa an routh ow tewlel mona y'n argh. Ha lies den rych a dewli meur.

⁴² Hag unn wedhwes voghosek a dheuth, ha hi a dewlis ynni dew vita, henn yw ferdhynn.

⁴³ Hag ev a elwis dhodho y dhyskyblon ha leverel dhedha, ‘Yn hwir y lavarav dhywgh, y hwrug an wedhwes voghosek ma tewlel moy ages oll an re erell esa ow tewlel y'n arghow.

⁴⁴ Rag i oll a wrug tewlel a'ga lanwes, mes hi a'y edhomm a wrug tewlel myns a's teva, oll hy fygans.’