Lavarow Koth 8 - An Bibel Kernewek 20234 (Kernewek Kemmyn)

Galow Furneth

¹ A ny elow furneth, a ny dhrehav konvedhes hy lev?

² War an tylleryow ughel ryb an fordh, y'n hynsyow hi a sev;

³ ryb an yetow a-rag an dre, yn entrans an porthow hi a gri yn ughel:

⁴ ‘Dhywgh, A wer, yth esov ow kelwel, hag ow kri yw dhe vebyon den.

⁵ A hwi sempel, dyskewgh felder; A dus foll, re'n konvettho agas kolon.

⁶ Klewewgh, rag y kowsav taklow gwiw, ha dhiworth ow diwweus y teu taklow ewn;

⁷ rag ow ganow a gews gwiryonedh; droktra yw tra gasadow dhe'm diwweus.

⁸ Oll geryow ow ganow yw gwiryon; nyns eus travyth gwius na kamm ynna.

⁹ I oll yw kompes dhe neb a gonvedh hag ewn dhe'n re hag a gyv godhvos.

¹⁰ Kemmer ow dyskans yn le arghans, ha godhvos kyns owr dewisys;

¹¹ rag furneth yw gwell ages koral, ha ny yll jowel vyth bos hevelebys dhedhi.

¹² ‘My, furneth, a drig gans sotelneth, hag y kavav godhvos ha doethter.

¹³ Own an Arloedh yw kasa; goeth ha balghder ha'n fordh a dhroktra ha kows treus a gasav.

¹⁴ My a'm beus kusul dha ha gwir alloes, my a'm beus konvedhes ha nerth.

¹⁵ Dredhov myghternedh a reyn, ha rewloryon a orden an pyth yw ewn;

¹⁶ dredhov pennternedh a rewl, ha pennsevigyon, oll myns a wovern yn ewn.

¹⁷ My a gar an re a'm kar, ha'n re a'm hwila yn fen a'm kyv

¹⁸ Yma rychys hag enor genev, kevoeth ow pesya ha sewena.

¹⁹ Ow froeth yw gwell ages owr, ages owr fin, ha'm gwayn ages arghans dewisys.

²⁰ Yn fordh ewnder y kerdhav, dre hynsyow a wirvreus,

²¹ ow ri rychys dhe'n re a'm kar, hag ow lenwel aga thresorvaow.

Rann Furneth y'n Kreasyon

²² ‘An Arloedh a'm formyas avel dalleth y ober, kyns y wreythresow a-henys.

²³ Kyns an oesow y feuv furvys, y'n dalleth, kyns bosva an norvys.

²⁴ Pan nag esa downderyow y feuv genys yn gloesow, pan nag esa fentynyow leun a dhowr.

²⁵ Kyns an menydhyow dhe vos settys yn aga le, kyns an breow y feuv genys,

²⁶ kyns ev dhe wruthyl an norvys gans y welyow, po an kynsa a weres an norvys.

²⁷ Pan settyas an nevow yn aga le, yth esen vy ena, pan dhelinyas kylgh war enep an downvor,

²⁸ pan fastyas an ebron a-wartha, pan ros nerth dhe fentynyow an downvor,

²⁹ pan ros y ordenans dhe'n mor, rag na dremenna an dowrow y worhemmynn, pan verkyas selyow an norvys,

³⁰ ena yth esen vy rybdho, avel mester-ser, hag y fedhen vy y dhelit pub-dydhyek, ow lowenhe a-ragdho pup-prys,

³¹ ow lowenhe yn y norvys annedhys ha'm delit a veu gans mebyon den.

³² ‘Ha lemmyn, a vebyon, goslowewgh orthiv, gwynnvys an re hag a with ow fordhow.

³³ Klewewgh dyskans ha bedhewgh fur, ha na wrewgh y nagha.

³⁴ Gwynnvys an den hag a woslow orthiv, ow koelyas pub dydh war ow yet, ow kwitha war bostow ow darasow.

³⁵ Rag neb a'm kyv a gyv bewnans hag ev a'n jeves favour a'n Arloedh.

³⁶ Mes neb a fyll ow havoes a shynd y enev y honan, kemmys a'm kas a gar ankow.’