Lavarow Koth 7 - An Bibel Kernewek 20234 (Kernewek Kemmyn)

Gwarnyans erbynn Avoutres

¹ Ow mab, gwith ow geryow ha tresor ow gorhemmynnow genes;

² gwith ow gorhemmynnow ha bewa, gwith ow dyskas avel bew dha lagas;

³ kolm i war dha vysies, skrif i war legh dha golonn.

⁴ Lavar dhe furneth, ‘Ty yw ow hwoer’, ha hanw konvedhes dha gar-ogas;

⁵ rag ma'th wittho dhiworth an venyn lows, dhiworth an venyn estren gans hy geryow smodh.

⁶ Rag orth fenester ow chi my a viras war-ves der ow lattis,

⁷ ha my a welas ynter an re sempel, hag aspia ynter an wer yowynk gour yowynk diboell,

⁸ ow tremena der an stret yn ogas dh'y hornell, owth holya an fordh dh'y chi,

⁹ yn tewlwolow, y'n gorthugher, yn termyn an nos, hag y'n tewlder.

¹⁰ Hag otta, benyn a'n met, gwiskys avel hora, fel hy holonn.

¹¹ Trosek yw, ha gorth, ny worta hy threys tre;

¹² lemmyn y'n stret, lemmyn y'n varghas, hag orth pub kornell hi a gontrewayt.

¹³ Hi a'n ses hag a amm dhodho, ha gans min tont hi a lever dhodho:

¹⁴ ‘Yma genev an kig gesys dhiworth sakrifisow ow offrynn kres; hag y'n jydh hedhyw re dylis ow ambosow;

¹⁵ ytho re dheuvev yn-mes rag metya orthis, rag dha hwilas yn fen, ha my re'th kavas.

¹⁶ My re afinas ow growedhva gans pallennow, kolghesow liwek a sendal Ejyptek;

¹⁷ My re velyshas ow gweli gans myrr, aloes ha sinnamon.

¹⁸ Deus, bedhen medhwys a gerensa bys y'n myttin, gwren ni tastya war-barth an plesours a gerensa.

¹⁹ Rag nyns usi ow gour tre, gyllys yw yn vyaj pell;

²⁰ ev a dhug yalgh a arghans ganso; dhe'n loer leun ev a dheu tre.’

²¹ Gans lavarow ardhynus hi a'n denn; gans hy diwweus smodh hi a'n dyn.

²² Distowgh ev a's hol, par dell a an ojyon dhe'n ladhva, po dell yw karow synsys fast yn maglenn

²³ bys pan wra seth gwana y avi; dell fysk edhen yn maglenn, ha ny woer ev kost hemma dhe vos y vewnans.

²⁴ Ha lemmyn, A vebyon, goslowewgh orthiv, ha bedhewgh hewoel dhe eryow ow ganow.

²⁵ Na as dha golonn dhe dreylya a-denewen dh'y fordhow, na wander yn hy hynsyow;

²⁶ rag hi re fethas lies den goliys; ha diniver yw oll an re a ladhas hi.

²⁷ Hy chi yw an fordh dhe ifarn, ow tiyskynna dhe jambouryow ankow.