Lavarow Koth 4 - An Bibel Kernewek 20234 (Kernewek Kemmyn)

Kusul Tas

¹ Klewewgh, a vebyon, dyskans tas, ha goslowewgh may kyffowgh konvedhes.

² Rag my a re dhywgh dyskas da; na esewgh ow dyskans.

³ Pan en vy mab gans ow thas, tender, ha'n unn vab yn golok ow mamm,

⁴ ev a'm dyski hag a leveri dhymm, ‘Gas dhe'th kolonn synsi fast ow geryow; gwith ow gorhemmynnow, ha bewa.

⁵ Kav furneth, kav konvedhes: na ankov, ha na dreyl dhiworth geryow ow ganow.

⁶ Na's gas, ha hi a'th with; kar hi, ha hi a wra goelyas warnas.

⁷ Dalleth furneth yw hemma; kav furneth, ha pypynag a gyffi, kav konvedhes;

⁸ Gwra hy chershya, ha hi a'th ughelha; hi a vynn dha enora mara's byrlydh.

⁹ Hi a worr war dha benn garlont teg, hi ri dhis kurun deg.’

Gwarnyans dhe Omwitha y'n Fordh Ewn

¹⁰ Klew, ow mab, ha degemmer ow geryow, may fo blydhynyow dha vewnans lies.

¹¹ My re dhyskas dhis an fordh a furneth; my re'th hembronkas yn hynsyow ewnhynseth.

¹² Pan gerdhydh, ny vydh dha gerdhes lettys; ha mar poenydh, ny drebuchydh.

¹³ Syns fast dyskans, na as ev dhe vos dhe wari; gwith e, rag ev yw dha vewnans.

¹⁴ Na enter hyns an dhrogoberoryon, ha na gerdh yn fordh an debeles.

¹⁵ Gas hi, na a warnedhi, treyl dhiworti ha tremen yn-rag.

¹⁶ Rag ny yllons koska marnas i a wra drogober; aga hosk yw kemmerys dhe-ves marnas i a wra dhe nebonan trebuchya.

¹⁷ Rag i a dheber an bara a dhroktra, hag eva an gwin a freudh.

¹⁸ Mes hyns an re wiryon yw haval dhe wolow dydh-tardh, hag a splann dhe splanna ha dhe splanna bys yn hanter-dydh.

¹⁹ Fordh an debeles yw haval dhe dewlder down; ny wodhons an pyth may trebuchons warnodho.

²⁰ Ow mab, goslow dhe'm geryow; pleg dha skovarn dhe'm lavarow.

²¹ Na gas i dhe skapya a'th tewlagas; gwith i a-berth y'th kolonn.

²² Rag bewnans yth yns dhe'n re neb a's kyv, ha sawment dhe oll y gig.

²³ Gwith dha golonn gans oll hewoelder, rag anedhi y teu dallethvaow bewnans.

²⁴ Gorr dhiworthis kammgows, ha gorr kammder an dhiwweus pell dhiworthis.

²⁵ Mires dha dhewlagas poran war-rag, ha sett kreghyn dha dhewlagas kompes a-ragos.

²⁶ Bydh war a hyns dha dhewdroes, ena dha fordhow a vydh sur.

²⁷ Na dreyl, naneyl dhe'n dyghow na dhe'n kledh; treyl dha droes dhe-ves a dhrog.