Lavarow Koth 23 - An Bibel Kernewek 20234 (Kernewek Kemmyn)

¹ Pan esedhydh dhe dhybri gans rewlyas, dissern dour an pyth usi a-ragos;

² ha gorr kollell dhe'th vryansenn mars os den gans ewl a voes.

³ Na yeun war-lergh boesow sawrek an rewlyas, rag henn yw boes hag a doell.

⁴ Na lavur re rag mayth ylli ha bos rych, bydh fur, ha hedh.

⁵ Pan wel dha dhewlagas rychys, gyllys yw, rag distowgh ev a gemmer diwaskell dhodho y honan, ow nija avel er war-tu ha'n ebron.

⁶ Na dheber bara an den kraf; na yeun war-lergh y voes sawrek;

⁷ rag avel den ow rekna an kost, yndella yth yw. ‘Deber hag yv!’ yn-medh ev dhis, mes, nyns usi y golonn genes.

⁸ Ty a hwyj an temmik re dhyb'sys, ha skoellys vydh dha geryow hweg.

⁹ Na gews yn klewans foll, rag ev a dhispres doethter dha eryow.

¹⁰ Na dhile men-kov koth, na enter yn parkow omdhivasow.

¹¹ Rag aga Dasprenyas yw krev; ev a bled aga hen er dha bynn.

¹² Dro dha golonn dhe dhyskans, ha'th skovarn dhe eryow a wodhvos.

¹³ Na skon a ri dyskybleth dhe vaw; mara'n gweskydh gans gwelenn, ny verow.

¹⁴ Mara'n gweskydh gans an welenn, ty a with y enev dhiworth ifarn.

¹⁵ Ow flogh, mars yw dha golonn fur, ow holonn ynwedh a vydh lowen.

¹⁶ Ow diwloneth a lowenha pan wra dha dhiwweus kewsel an pyth yw ewn.

¹⁷ Na as dha golonn dhe berthi avi a beghadoryon, mes bes yn own an Arloedh oll an jydh.

¹⁸ Y fydh termyn ow tos yn surredi, ha ny vydh dha wovenek treghys dhe-ves.

¹⁹ Klew, ow mab ha bydh fur, led dha golonn war an hyns ewn.

²⁰ Na vydh yn mysk an dus yw omres dhe win, nag yn mysk an dus a dheber re a gig;

²¹ rag an penn-medhow ha'n argasenn a dheu dhe voghosogneth, ha kosk a'n gwisk yn kloutys.

²² Goslow orth dha das a'th tineythis, ha na dhispres dha vamm pan vo hi koth.

²³ Pren gwiryonedh ha na'n gwerth, pren furneth, dyskans ha konvedhes.

²⁴ Tas an den gwiryon a lowenha yn feur, ha neb a dhineyth flogh fur a'n jevydh joy anodho

²⁵ Re bo dha das ha'th vamm lowen, ha re lowenhaho neb a'th omdhuk.

²⁶ Ow mab, ro dhymmo vy dha golonn, ha gwithes dha dhewlagas ow fordhow.

²⁷ Rag hora yw pytt down, ha benyn estren yw puth ynn.

²⁸ Rag hi a gontrewayt avel lader, hag a ynkress an avoutroryon yn mysk tus.

²⁹ Piw a'n jeves guw? Piw a'n jeves galar? Piw a'n jeves kedrynnow? Piw a'n jeves goliow heb acheson? Piw a'n jeves dewlagas wythiek?

³⁰ An re hag a hok pell orth an gwin, an re usi ow mos dhe assaya podigow a win kemmyskys.

³¹ Na vir orth gwin pan yw rudh, pan derlenter y'n hanaf, ow mos yn-nans yn smodh.

³² Y'n diwedh ev a vrath avel sarf, hag a wan avel nader.

³³ Dha dhewlagas a wel taklow astranj, ha'th kolonn a gews lavarow treus.

³⁴ Ty a vydh avel den a wrowedh yn kolonn an mor, avel den a wrowedh war benn gwern.

³⁵ Ty a lever, ‘I a'm gweskis, mes ny berthis vy payn. I a'm kronkyas, mes ny'n godhvev. P'eur tifunav? My a hwila diwes moy.’