Lavarow Koth 19 - An Bibel Kernewek 20234 (Kernewek Kemmyn)

¹ Gwell yw den boghosek hag a gerdh yn ewnhynsek, ages den yw treus yn y gows hag yw foll.

² Nyns yw da rag den bos heb godhvos, ha neb a fysk gans y dhewdroes a gyll y fordh.

³ Follneth den a wra y fordh kamm, ha'y golonn a serr orth an Arloedh.

⁴ Rychys a wra kowetha nowydh pals, mes den boghosek yw diberthys dhiworth y gentrevek.

⁵ Nyns a fals dhustunier heb kessydhyans, ha ny dhienk gowleveryas.

⁶ Lies a hwila favour den hel, ha pub huni yw koweth dhe wour a re rohow.

⁷ Oll breder an boghosek a'n kas: kemmys moy yth a y gowetha dhiworto. Ev a's helgh gans geryow mes nyns esons i ena.

⁸ Neb a'n jeves furneth a gar y enev y honan, neb a with konvedhes a sewen.

⁹ Nyns a fals dhustunier heb kessydhyans, ha gowleveryas a dhe goll.

¹⁰ Ny dhelledh foll dhe vewa yn studh a balster, kemmys le keth dhe reynya war bennsevigyon.

¹¹ Skians da a wra den lent dhe serri, hag yth yw glori dhodho skonya a aswonn kammwrians.

¹² Konnar myghtern yw avel lew owth usa, mes y favour yw avel gluth war an gwels.

¹³ Mab foll yw diswrians dh'y das, ha'n kedrynna a wreg yw avel glaw ow devera heb fin dre do syger.

¹⁴ Chi ha pythow yw eretons dhiworth tasow mes gwreg poellek yw ro dhiworth an Arloedh.

¹⁵ Sygerneth a dewl yn kosk down, ha'n enev diek a berth nown.

¹⁶ Neb a with an gorhemmynn a with y enev; neb a dhispres y fordhow a verow.

¹⁷ Neb yw grassyes orth an voghosogyon a re kendon dhe'n Arloedh, hag ev a re dhodho attal y ober.

¹⁸ Kessydh dha vab hedre vo govenek, na sett dha golonn war y vernans.

¹⁹ Den a gonnar meur a dal an spal, rag mara'n delivrydh, re vydh ty dh'y wul arta.

²⁰ Goslow orth kusul ha degemmer dyskybleth, rag ma' fo furneth rag an termyn a dheu.

²¹ Lies yw an towlow a-ji dhe golonn gour, mes porpos an Arloedh, henna a sev.

²² An pyth a vynnir y gavoes yn den yw tregeredh, ha den boghosek yw gwell ages gour gowek.

²³ Own an Arloedh a led dhe vewnans; neb a'n jeves ev a bowes attes, ny vydh ev ow perthi dregynn.

²⁴ An diek a worr y leuv y'n skudell, ha ny vynn ev dri y leuv arta dh'y anow.

²⁵ Gwask skornyer ha'n den sempel a dhysk doethter; keredh den a gonvedhes, hag ev a'n jevydh godhvos.

²⁶ Neb a arvedh y das, ha herdhya y vamm dhe-ves, yw mab a wra meth hag a dhre mewl.

²⁷ Mar astelydh, ow mab, goslowes orth dyskans, ena yth edh yn stray dhiworth geryow godhvos.

²⁸ Dustunier koeg a wra ges orth gwirvreus, ha ganow an debeles a lenk anewnder

²⁹ Dampnyans yw parys rag skornyoryon, ha skorjya rag keyn fellyon.