Lavarow Koth 11 - An Bibel Kernewek 20234 (Kernewek Kemmyn)

¹ Fals vantol yw tra gasadow dhe'n Arloedh, mes poes ewn yw y dhelit.

² Pan dheu goeth, ena y teu meth, mes gans tus uvel yma furneth.

³ Glander an re ewnhynsek a's kevarwoedh, mes kammder an re fals a's distru.

⁴ Nyns eus prow a rychys yn dydh a sorr, mes ewnder a dhelirv a ankow.

⁵ Ewnder an re heb blam a wra aga fordh dhe vos kompes, mes an tebelwas a goedh der y dhroktra y honan.

⁶ Gwiryonder an re ewnhynsek a's delirv, mes an falswesyon yw maglennys gans aga lust.

⁷ Pan verow tebelwas, y wovenek a dheu dhe goll, ha govenek an re dhidhuw a dheu dhe vann.

⁸ An den gwiryon yw delivrys a boenvos ha'n tebelwas a dheu a-bervedh ynno yn y le.

⁹ Gans y anow an den didhuw a vynn distrui y gentrevek, mes an re wiryon yw delivrys gans godhvos.

¹⁰ Pan a hi yn ta gans an re wiryon, an sita a lowenha, ha pan a an debeles dhe vann yma garmow a lowender.

¹¹ Dre vennath an re ewnhynsek sita yw ughelhes, mes domhwelys yw gans ganow an debeles.

¹² Neb a dhispres y gentrevek a fyll a skians, mes gour a gonvedhes a bes tawesek.

¹³ Neb a gerdh a-derdro avel hwedhler a dhiskudh kevrinyow, mes neb yw lel yn spyrys a with tra yn kudhys.

¹⁴ Yn tyller ma nag eus gidyans, an bobel a fyll, mes yn palster a gonseloryon yma sawder.

¹⁵ Neb a re goestel rag estren a berth dregynn a'y wosa, mes neb a skon goestla yw saw.

¹⁶ Benyn a ras a's teves enor, ha tus dhibita ny wayn marnas rychys.

¹⁷ Gour yw kuv a wra dader dhodho y honan, mes neb yw fell a dhre trobel dh'y gig y honan.

¹⁸ Tebelwas a dhendil gober ansertan, mes neb a has ewnder a'n jeves pewas sur.

¹⁹ Neb yw fyrv yn ewnder a vew, mes holya droktra a led dhe ankow.

²⁰ Tus a golonn dreus yw tra gasadow dhe'n Arloedh, mes an re a fordhow divlam yw y dhelit.

²¹ Bydh sur, ny vydh tebelwas heb kessydhyans, mes an re wiryon a vydh delivrys.

²² Avel bysow a owr yn troen hogh yw benyn deg heb doethter.

²³ Hwans an re wiryon a dhiwedh pup-prys yn dader, govenek an debeles yn sorr.

²⁴ Unn den a re heb lett, ha devedhys yw hwath moy rych, onan arall a skon a ri hag a berth esow.

²⁵ Den hel a dhegemmer blonek, ha neb a dhowrha a vydh dowrhes.

²⁶ Tus a volleth neb a syns greun dhodho y honan, mes yma bennath war benn neb a's gwerth.

²⁷ Neb a hwila dader yn fen a gyv favour, mes droktra a dheu dhe neb a'n hwila.

²⁸ Neb a drest yn y rychys a goedh, mes an re wiryon a sewen avel del glas.

²⁹ Neb a dhre trobel war y deylu a erit gwyns, ha'n den foll a vydh gwas dhe'n den fur.

³⁰ Froeth an den gwiryon yw gwydhenn a vewnans, mes neb a wayn enevow yw fur.

³¹ Mars yw an den gwiryon rewardys war an norvys, kemmys moy an tebelwas ha'n peghador!