Job 27 - An Bibel Kernewek 20234 (Kernewek Kemmyn)

Job a With y Lander

¹ Job a gemmeras y areth yn-bann arta, ow leverel:

² ‘Dell vew Duw, neb re gemmeras dhe-ves ow gwirvreus, ha'n Ollgalloesek, neb re wrug dhe'm enev bos hwerow,

³ hedre vo anall ynnov hag yma spyrys Duw y'm dewfrik,

⁴ ny gews ow diwweus anewnder, ha ny lever ow thaves toell.

⁵ Pell bedhes dhiworthiv leverel agas bos ewn; bys pan dremenniv ny naghav ow glander.

⁶ My a syns fast ow gwiryonsys ha ny'n gasav nevra; ny wra ow holonn ow heredhi hedre viv yn few.

⁷ ‘Re bo ow eskar kepar ha'n drogoberer, ha re bo ow erbynner kepar ha'n tebelwas.

⁸ Rag py govenek eus dhe'n drogoberer pan yw treghys dhe'n dor, pan gemmer Duw y vewnans dhe-ves?

⁹ A wra Duw klewes y gri pan dheu ahwer warnodho?

¹⁰ A wra ev kavoes delit y'n Ollgalloesek? A wra ev pysi Duw pup-prys?

¹¹ ‘My a'gas dysk a-dro dhe leuv Duw; ny gudhav an pyth usi gans an Ollgalloesek.

¹² Otta, hwi oll re welas hemma agas honan; prag y kewsewgh ytho kemmys flows?

¹³ ‘Homm yw rann an drogoberer gans Duw, ha'n ertach a dhegemmer turans dhiworth an Ollgalloesek:

¹⁴ Mars yw lieshes y fleghes, yth yw rag an kledha; ha dh'y askorr nyns eus lowr dhe dhybri.

¹⁵ An re yw gesys a vydh dres dhe'n bedh gans an pla, ha ny vydh gwedhwesow owth oela ragdha.

¹⁶ Kyn krug ev arghans kepar ha'n doust, ha darbari dillas kepar ha pri,

¹⁷ an pyth a grug ev an den gwiryon a'n gwisk, ha'n den ankablus a gevrenn an arghans.

¹⁸ An chi a dhrehav yw kepar ha gwias kevnis, kepar ha krow gwrys gans goelyador.

¹⁹ Ev a wrowedh gans rychys, mes ny wra henna na fella; pan iger y dhewlagas gyllys yw pup-tra oll.

²⁰ Browaghow a dheu dresto kepar ha liv; korwyns a'n kib dhe-ves y'n nos.

²¹ Gwyns an est a'n drehav ha gyllys yw ev; ev a'n hwyth yn-mes a'y le,

²² ha hurlya er y bynn heb truedh; hag ev a fi dhe'n fo dhiworth y nerth.

²³ An gwyns a dak y dhiwla er y bynn yn ges ha hwibana orto yn-mes a'y le.