Job 26 - An Bibel Kernewek 20234 (Kernewek Kemmyn)

Gorthyp Job

¹ Ena Job a worthybis:

² ‘Assa weressys an dus heb nerth! Assa sawsys an vregh heb krevder!

³ Pana gusul re brofsys dhe dhen heb furneth, ha diskwedhes dhodho palster a dhoethter!

⁴ Piw a lostleveris dhodho an geryow ma? Ha piw re dheuth y spyrys a-dhiworthis?

⁵ ‘Spyrysyon an re varow a-woeles a gren, an dowrow ha'n re yw trigys ynna.

⁶ Noeth yw ifarn a-rag Duw, Abaddon yw heb kudhans.

⁷ Ev a ystynn ebron an kledh a-ugh an wagva, hag ev a greg an bys war dravyth.

⁸ Ev a vayl an dowrow yn y gommol tew, ha nyns yw an gommolenn folsys yn-danna.

⁹ Ev a gudh enep an loer leun, hag a ystynn y gommol warnedhi.

¹⁰ Ev a worras an worwel war enep an dowrow, orth an or yntra golow ha tewlder.

¹¹ Kolovenyow nev a gren, ow perthi marth drefenn y geredh.

¹² Ev a goselhas an mor der y nerth; der y dhoethter ev a vrewis Rahab.

¹³ Der y anall an nevow eth ha bos teg; y dhorn a wanas an sarf slynk.

¹⁴ Ha nyns yw an re ma marnas emlow y fordhow; hag ass yw isel an hwystrenn a glewyn anodho! Piw a yll konvedhes taran y nerth?’