Job 19 - An Bibel Kernewek 20234 (Kernewek Kemmyn)

Gorthyp Job dhe Bildad

¹ Ena Job a worthybis:

² ‘Pes termyn y fynnowgh tormentya ow enev, ha'm brewi gans geryow?

³ Hwi re'm keredhis dekkweyth; a nyns owgh methek a omsettya orthiv?

⁴ Ha hwath mars yw gwir my dhe gammwul, ow hammwrians a bes genev vy ow honan.

⁵ Ha hwath mar moghhowgh agas honan er ow fynn, ha pledya ow meth er ow fynn;

⁶ godhvydhewgh lemmyn Duw dhe'm domhwel, ha'm kyrghynna gans y roes.

⁷ ‘Otta, my a gri “Freudh!”, mes nyns ov klewys; my a gri rag gweres mes nyns eus gwirvreus.

⁸ Ev re geas ow fordh ma na allav tremena, hag ev re settyas tewlder war ow hynsyow.

⁹ Ev re bilyas ow glori a-dhiworthiv, ha kemmeres an gurun dhiworth ow fenn.

¹⁰ Ev a'm distru war bub tu, ha gyllys ov, hag ev re gemmeras ow govenek yn-mes kepar ha gwydhenn.

¹¹ Ev re enowis y sorr er ow fynn, hag ev a'm syns avel onan a'y eskerens.

¹² Y bagasow a dheu war-barth, ha krugya aga gweyth-esedhva er ow fynn, ha gul kamp a-dro dhe'm tylda.

¹³ ‘Ev re worras ow breder pell a-dhiworthiv, ha'm kowetha yw kowl estrenhes a-dhiworthiv.

¹⁴ Ow neshevin re omwithas dhiworthiv, ha'm kowetha re'm ankovas.

¹⁵ An godrigoryon y'm chi ha'm maghtethyon a'm syns dhe vos estren. Alyon ov vy yn aga dewlagas.

¹⁶ My a elwis dhe'm gwas, ha ny'm gorthybis; kyn y'n konjoris gans ow ganow.

¹⁷ Hegas yw ow anall dhe'm gwreg, ha flerys ov dhe'm breder ow honan.

¹⁸ Fleghes yowynk ynwedh a'm kas; pan savav i a wra ges ahanav.

¹⁹ Oll ow hothmans a'm aborr ha'n re a garen re dreylyas er ow fynn.

²⁰ Ow eskern re lenas orth ow kroghen ha'm kig, my re skapyas gans kroghen ow dyns.

²¹ Kemmerewgh pita orthiv, kemmerewgh pita orthiv, hwi ow howetha; rag leuv Duw re'm tochyas.

²² Prag y hwrewgh, kepar ha Duw, ow helghya, heb kavoes lowr a'm kig?

²³ ‘Unnweyth a pe ow geryow skrifys lemmyn! Unnweyth a pens gravys yn lyver!

²⁴ Unnweyth a pens kervys gans pluvenn a horn ha plomm y'n garrek bys vykken!

²⁵ Rag my a woer ow dasprenyas dhe vos yn few, hag ev dhe sevel wortiwedh war an dor;

²⁶ ha wosa ow kroghen dhe vos distruys yndella, hwath y'm kig my a wel Duw:

²⁷ neb a welav ow honan, ha'm dewlagas a vir orto, a-der arall. Ow diwloneth a glamder y'm askra.

²⁸ ‘Mes mar leverowgh, “Fatell wren ni y helghya rag y kevir gwreydhenn an mater ynno ev y honan”,

²⁹ kemmerewgh own a'n kledha, rag sorr a dhre kessydhyansow an kledha, hag ena hwi a woer bos breus.’