Ezekiel 28 - An Bibel Kernewek 20234 (Kernewek Kemmyn)

Profoesans erbynn Myghtern Tyr

¹ Ger an Arloedh a dheuth dhymm, ow leverel:

² Mab den, lavar dhe bennsevik Tyr, Yndellma y lever an Arloedh Duw: Drefenn goeth dha golonn, ty a lever, ‘My yw duw, owth esedha war dron duwow yn kolonn an moryow.’ Mes den osta a-der duw, kyn settydh dha golonn avel kolonn duw.

³ Otta ty yw furra ages Daniel, ha nyns eus kevrin kudhys dhiworthis.

⁴ Gans dha furneth ha'th konvedhes ty re wrug rychys ragos dha honan, ha kuntell owr hag arghans y'th tresorvaow.

⁵ Gans dha furneth vras ha'th kenwerth ty re ynkressyas dha rychys ha'th kolonn re beu drehevys drefenn dha rychys.

⁶ Rakhenna yndellma y lever an Arloedh Duw: Drefenn ty dhe settya dha golonn avel kolonn duw,

⁷ rakhenna, awottavy ow tri estrenyon er dha bynn, an fella a'n kenedhlow; i a denn aga kledhedhyow erbynn tekter dha furneth ha defola dha splannder.

⁸ I a'th tre yn-nans dhe'n pytt, ha ty a verow del verow an re yw ledhys yn kolonn an moryow.

⁹ A leverydh hwath, ‘My yw duw’, yn golok an re a'th ladh? Mes ty yw den a-der duw y'n leuv an re a'th ladh.

¹⁰ Ty a verow del verow an re antrodreghys yn leuv estrenyon; rag my re gewsis, yn-medh an Arloedh Duw.

Galargan war Vyghtern Tyr

¹¹ Ger an Arloedh a dheuth dhymm, ow leverel:

¹² Mab den, drehav galargan war vyghtern Tyr, ha lavar dhodho, Yndellma y lever an Arloedh Duw: Ty o an sel a berfydhder, leun a furneth, perfydh yn tekter.

¹³ Yth eses yn Eden, lowarth Duw; pub men drudh o dha gudhans, rubi, topaz, ha gwyrven, owrven, onyks, ha yasper, saffir, garnet, ha beryl. Ober a owr o dha settyansow ha'th gravyansow ynnos; y'n jydh may feus formys y fons parys.

¹⁴ Gans cherub untys avel gwithyas my a'th settyas; yth eses war venydh sans Duw ow kerdhes yn mysk meyn a dan.

¹⁵ Ty o divlam yn oll dha fordhow a-dhia'n jydh may feus formys bys pan veu anewnder kevys ynnos.

¹⁶ Yn lanwes dha genwerth i a lenwis an kres ahanas gans garowder, ha ty a beghas. Ytho my a'th tewlis avel tra ansans dhiworth menydh Duw, ha'n cherub esa ow kwitha a'th chasyas yn-mes dhiworth kres an meyn a dan.

¹⁷ Dha golonn o goethus y'th tekter, ty a dhefolas dha furneth drefenn dha splannder. Ytho my a'th tewlis dhe'n dor, my a'th worras a-rag myghternedh, dhe vires warnas gans skorn.

¹⁸ Y'th lies kammhynseth, yn anewnder dha genwerth, ty a dhisakras dha sentris. Ytho my a dhros tan yn-mes dhiworthis; ev a'th tybris, ha my a'th treylyas dhe lusu war an dor yn golok pubonan a'th welas.

¹⁹ Oll an kenedhlow a'th aswonnis a gemmeras skruth orthis; ty re dheuth dhe browagh tromm ha ny vydhydh nevra namoy.

Profoesans erbynn Sidon

²⁰ Ger an Arloedh a dheuth dhymm, ow leverel:

²¹ Mab den, treyl dha fas troha Sidon, ha profoes er hy fynn,

²² ha lavar, Yndellma y lever an Arloedh Duw: Otta, yth esov er dha bynn, A Sidon, ha my a vydh enorys a-berth ynnos. I a woer my dhe vos an Arloedh pan wrav breusow ynni, ha my a vydh sanshes ynni.

²³ My a dhannvon plag ynni ha goes yn hy stretys. An re ledhys a goedh a-berth ynni, gans an kledha er hy fynn a-derdro. Ena i a woer my dhe vos an Arloedh.

²⁴ Ny'n jevydh chi Ysrael na fella spedhas dh'aga gwana na spern dh'aga fystiga yn mysk oll aga hentrevogyon, a wre aga despitya. Ena i a woer my dhe vos an Arloedh Duw.

Bennath war Ysrael y'n Termyn a Dheu

²⁵ Yndellma y lever an Arloedh Duw: Pan guntellav chi Ysrael dhiworth an poblow le mayth esens skattrys, my a vydh sanshes ynna yn golok an kenedhlow. Ena i a drig war aga thiredh aga honan, a res vy dhe'm gwas Yakob.

²⁶ I a drig ynno yn sawder, ha drehevel chiow, ha plansa gwinlannow; i a drig yn sawder pan wrav breusow war oll aga hentrevogyon a's dispres. Ena i a woer my dhe vos an Arloedh aga Duw.