Eksodus 1 - An Bibel Kernewek 20234 (Kernewek Kemmyn)

Mebyon Ysrael yw Dyghtys Fell yn Ejyp

¹ Ha'n re ma yw henwyn mebyon Ysrael neb a dheuth a-ji dhe Ejyp gans Yakob; pubonan a dheuth gans y vayni.

² Rewben, Simeon, Levi ha Yuda,

³ Yssakar, Zebulun ha Benyamin,

⁴ Dan ha Naftali, Gad hag Asher.

⁵ Hag oll an enevow ow tos a vordhos Yakob a veu deg den ha tri-ugens; ha Yosep, yth esa ev yn Ejyp.

⁶ Ha Yosep a verwis, ha'y vreder oll, hag oll an henedh na,

⁷ ha mebyon Ysrael a dhug frut, hesya a wrussons ha palshe, ha galloesek dres eghenn ens, ha'n tiredh o lenwys gansa.

⁸ Hag y sevis war Ejyp myghtern nowydh na aswonnsa Yosep,

⁹ hag ev a leveris dh'y bobel, ‘Mirewgh, pobel mebyon Ysrael yw niverussa ha galloesekka ageson.

¹⁰ Dewgh, gwren yn fur gansa ma na liesplekhahons, hag y hyll hwarvos, bresel mar teffo, i ynwedh dhe junya gans an re a'gan kas, hag omladh er agan pynn, ha diank a'n tir.’

¹¹ Ha warnedha i a ordenas mestrysi hwel rag aga arwaska gans beghyow poes, hag i a dhrehevis sitys-gwithva rag Faro, Pithom ha Rameses;

¹² ha dhe voy y's arwasksons, dhe voy i a balshas, hag i a omlesas, ha divlaster a's tevedha drefenn mebyon Ysrael;

¹³ hag Ejyp a wrug dhe vebyon Ysrael servya yn harow,

¹⁴ ha gul aga bewnans hwerow yn gwasonieth kales, yn pri, hag yn brykkys, hag yn pub eghenn a wonis y'n gwel; oll aga gonis ynno may hwrussons dhedha servya o garow.

¹⁵ Ha myghtern Ejyp a gewsis orth an gwelivedhesow ebrow (anedha onan o henwys Shifra ha'y ben Pua),

¹⁶ ha leverel, ‘Pan wryllowgh an Ebrowesow dhe dhineythi, ha mires war an dhew ven, mar pydh mab – gwrewgh dhodho bos gorrys dhe'n mernans; ha mar pydh myrgh, gesewgh hi dhe vewa.’

¹⁷ Ha'n gwelivedhesow a borthas own a Duw, ha ny wrussons par dell gewssa dhedha myghtern Ejyp, mes gwitha an vebyon yn few;

¹⁸ ha myghtern Ejyp a elwis war an gwelivedhesow, ha leverel dhedha, ‘Prag y hwrussowgh an dra ma, ha gwitha an vebyon yn few?’

¹⁹ Ha'n gwelivedhesow a leveris dhe Faro, ‘Rag nyns yw an Ebrowesow avel benynes Ejyp, rag i yw buan ha kyns an gwelivedhesow dhe dhos dhedha, i re dhineythis.’

²⁰ Ha Duw a wrug da dhe'n gwelivedhesow, ha'n bobel a gressyas hag o pur alloesek.

²¹ Ha dell hwarva, drefenn an gwelivedhesow dhe berthi own a Dhuw, ev a wrug dhedha teyluyow,

²² ha Faro a worhemmynnis dhe oll y bobel, ow leverel, ‘Pub maw a vydh genys – tewlewgh ev y'n Nil, ha pub myrgh gwithewgh hi yn few.’