Diskwedhyans 17 - An Bibel Kernewek 20234 (Kernewek Kemmyn)

An Hora Veur ha'n Best

¹ Hag onan a'n seyth el gans an seyth fiol a dheuth dhe gewsel orthiv, ow leverel, ‘Deus, my a vynn diskwedhes dhis breus an hora veur yw esedhys war lies dowr,

² ha gensi myghternedh an norvys re wrug fornikasyon, ha trigoryon an nor re omvedhwis dre win hy fornikasyon.’

³ Hag ev a'm dug a-bervedh yn difeyth y'n spyrys, ha my a welas benyn esedhys war best rudh, leun a henwyn blasfemus, gans seyth penn ha deg korn.

⁴ Ha'n venyn o gwiskys yn purpur ha pann kogh, ha kudhys gans owr ha men drudh ha perlys, gans hanaf owrek yn hy dorn, leun a'n taklow kasadow hag avlan a'y fornikasyon.

⁵ Ha war hy thal o skrifys hanow, yw mysteri, ‘Babylon vras, mamm oll horys ha taklow kasadow an nor.’

⁶ Ha my a welas an venyn, medhow der woes an syns ha dre woes mertheryon Yesu. Ha marth meur dres eghenn a veu genev pan y's gwelis.

⁷ Hag yn-medh an el dhymm, ‘Prag y feu marth genes? My a vynn leverel dhis mysteri an venyn ha'n best a's deg, ha ganso an seyth penn ha'n deg korn.

⁸ An best a welsys a veu, ha nyns yw; hag ev a vydh owth yskynna yn-mes a'n pytt diwoeles, ha mos a wra dhe dhiswrians. Hag y fydh marth dhe drigoryon an norvys, na veu skrifys aga hanow y'n lyver a vewnans dhiworth gwrians an bys, pan welons an best, rag yth o, ha nyns yw, hag y fydh.

⁹ ‘Ottomma styryans rag an re fur. An seyth penn yw seyth menydh le may ma an venyn esedhys.

¹⁰ Seyth myghtern yns i keffrys: pymp a goedhas, onan yw, ha'n arall ny dheuth hwath, ha pan dheffo, y koedh dhodho gortos berr dermyn.

¹¹ Ha'n best hag a veu, ha nyns yw, ev ynwedh yw an ethves, hag yw avel onan a'n seyth; hag yth a dhe dhiswrians.

¹² Ha'n deg korn a welsys yw deg myghtern na dhegemmeras gwlaskor bys lemmyn mes i a dhegemmer galloes avel myghternedh rag unn our gans an best.

¹³ An re ma a's teves unn brys hag i a re aga nerth ha'ga galloes dhe'n best.

¹⁴ An re ma a wra gwerrya erbynn an Oen, ha'n Oen a wra aga thryghi: drefenn y vos Arloedh arlydhi, ha Myghtern myghternedh, ha'n re usi ganso yw gelwys, ha dewisys, ha len.’

¹⁵ Hag yn-medh ev dhymm, ‘An dowrow a welsys le may ma an hora esedhys yw poblow ha routhow, ha kenedhlow ha tavosow.

¹⁶ Ha'n deg korn a welsys ha'n best: an re ma a wra kasa an hora ha'y gul gwastys ha noeth hag a wra dybri hy hig ha'y leski gans tan.

¹⁷ Rag Duw re worras yn aga holonn kollenwel bodh y vrys, ha bos unnverhes, ha ri aga gwlaskor dhe'n best erna vo kowlwrys geryow Duw.

¹⁸ Ha'n venyn a welsys yw an sita vras, a's teves galloes war vyghternedh an norvys.’