Dewteronomi 33 - An Bibel Kernewek 20234 (Kernewek Kemmyn)

Bennath war an Loethow

¹ Homm yw an vennath may hwrug Moyses, den Duw, benniga mebyon Ysrael gensi kyns y vernans.

² Ev a leveris: An Arloedh a dheuth dhiworth Sinay, ha tardha warnedha dhiworth Seir; ev a splannas dhiworth menydh Paran, hag ev a dheuth gans degow a vilyow a syns; ha tan a flammyas dhiworth y leuv dhyghow.

³ Sur ev a gar an poblow; yma oll y syns y'th leuv; hag i a esedh orth dha dreys, ow tegemmeres dha eryow.

⁴ Moyses a worhemmynnis lagha dhyn, perghennogeth kuntellyans Yakob.

⁵ Ev o myghtern yn Yeshurun pan omguntellas pennow an bobel, loethow Ysrael war-barth.

⁶ Bewes Rewben ha na verwes, na'y wer bos boghes.

⁷ Homm yw an vennath rag Yuda; hag y leveris: Klew, Arloedh, lev Yuda, ha dro ev dh'y bobel. Gans y dhiwleuv ev a strivyas ragdho y honan. Bydh gweres erbynn y eskerens.

⁸ Rag Levi, y leveris: Bedhes dha Thummim ha'th Urim gans dha wour sans, neb a brevsys orth Massa, ha neb a strivsys ganso orth dowrow Meriba;

⁹ neb a leveris dh'y das ha dh'y vamm, Ny wrugavy y weles; ha ny wrug vri a'y vreder, na aswonn y vebyon y honan; rag i a withas dha lavar, ha'th kevambos i a synsis.

¹⁰ I a dhysk dha vreusow dhe Yakob, ha'th lagha dhe Ysrael. I a worr ynkys y'th tewfrik, hag offrynn kowlleskys war dha alter.

¹¹ Bennik, Arloedh, oll y nerth ha bydh pes da a ober y dhiwla. Brew diwglun an re a sev er y bynn, ha'n re a'n kas, ma na saffons arta.

¹² Rag Benyamin, y leveris: Meurgerys an Arloedh, ev a drig yn sawder rybdho; ev a'n goskeus oll an jydh, ha trigys vydh ynter y dhiwskoedh.

¹³ Rag Yosep, y leveris: Bennigys gans an Arloedh yw y bow, gans gluth drudh an ebron, ha gans an downderyow ow krowedha a-woeles;

¹⁴ gans gwella frut an howl, ha gans gwella askorr an misyow;

¹⁵ gans gwella askorr an menydhyow koth, ha gans gwella rohow an breow heb diwedh;

¹⁶ gans gwella rohow an tir ha'y leunder, ha'n favour a neb eus trigys y'n bos. Re dheffo dhe benn Yosep, war grogen an pryns yn mysk y vreder.

¹⁷ Y veuredh yw haval dh'y darow kynsa-genys, ha'y gern yw kern bual. Gansa ev a gorn poblow war-barth, bys pennow an norvys. Yth yns i an degow a vilyow a Efraym, Yth yns i an milyow a Manasse.

¹⁸ Rag Zebulun, y leveris: Lowenha, Zebulun, pan edh yn-mes, ha ty, Yssakar, y'th tyldow.

¹⁹ I a elow poblow dhe'n venydh, hag ena sakrifia sakrifisow ewnder; rag i dhe dhena war balster an moryow, ha war an tresoryow kudhys y'n tewes.

²⁰ Rag Gad, y leveris: Benniges yw neb a ledanha tir Gad; ev a blatt avel lew, ev a skward bregh, ha krogen maga ta.

²¹ Ev a dhewisas an gwella tir ragdho y honan, rag an rann apoyntys ena dhe'n rewler; ev a dheuth gans pennow an bobel, ev a gowlwruk ewnder an Arloedh, ha'y vreusow gans Ysrael.

²² Rag Dan, y leveris: Dan yw kolen lew; ev a lamm dhiworth Bashan.

²³ Rag Naftali, y leveris: A Naftali, gwalghys gans favour, ha leun a vennath an Arloedh: erit an howlsedhes ha'n dhyghowbarth.

²⁴ Rag Asher, y leveris: Asher yw benniges dres an vebyon erell; bedhes faverys gans y vreder, ha troghya y droes yn oyl.

²⁵ Horn ha brons yw dha ebilyer; herwydh dha dhydhyow, yndella y fydh dha nerth.

²⁶ Nyns eus nagonan avel an Duw a Yeshurun, usi ow marghogeth dre nev dhe'th weres, hag yn y veuredh war an kommol.

²⁷ Duw heb diwedh yw skovva, hag a-woeles yma an breghow heb diwedh. Ev a fes an eskar a-ragos, hag ev a lever, ‘Distru!’

²⁸ Ysrael a drig yn sawder; y honan oll yw fenten Yakob, yn tir a ys ha gwin nowydh, y nevow ynwedh a dhever gluth.

²⁹ Gwynn dha vys, Ysrael! Piw yw avelos? pobel selwys gans an Arloedh, an skoes a'th weres, kledha dha veuredh. Dha eskerens a dheu dhis ow fekla, ha ty a drett war aga heynow.