Breusysi 15 - An Bibel Kernewek 20234 (Kernewek Kemmyn)

Samson a Feth an Filistysi

¹ Wosa pols, yn prys trevas an gwaneth, Samson eth dhe vires y wreg, ow toen ganso gevrik. Yn-medh ev, ‘My a'm beus hwans dhe entra yn chambour ow gwreg.’ Mes ny ros hy thas kummyas dhodho a entra.

² Hy thas a leveris, ‘My a brederis, ty dh'y hasa; ytho my a's res dhe'th koweth. A nyns yw hy yowynka hwoer tekka agessi? Tann hi yn hy le.’

³ Samson a leveris dhedha, ‘An prys ma, pan wrav dregynn dhe'n Filistysi, y fydhav heb blam.’

⁴ Yndella Samson eth hag a gachyas tri hans lowarn, hag ev a gavas faglennow; hag ev a dreylyas an lewern lost dhe lost ha gorra faglenn yntra pub dew lost.

⁵ Wosa gorra tan y'n faglennow, ev a asas an lewern dhe wari yn ys a'n Filistysi, hag a loskas an manalow ha'n ys, kekeffrys ha'n gwinlannow ha kelliow an olewbrennyer.

⁶ Ena an Filistysi a wovynnas, ‘Piw a wrug hemma?’ Hag yn-medhons, ‘Samson, deuv an Timnyas, drefenn ev dhe gemmeres y wreg ha'y ri dh'y goweth.’ Ytho an Filistysi a dheuth yn-bann hag a's loskas hi ha'y thas.

⁷ Samson a leveris dhedha, ‘Mars yw hemma an pyth a wrewgh, my a de na hedhav kyns my dhe dyli dial warnowgh.’

⁸ Ev a's gweskis dhe'n dor, klun ha mordhos gans ladhva veur, hag ev eth yn-nans ha triga y'n fols yn karrek Etam.

⁹ Ena an Filistysi a dheuth yn-bann hag a gampyas yn Yuda hag a omlesas yn Lehi.

¹⁰ Gwer Yuda a leveris, ‘Prag yth owgh hwi devedhys yn-bann er agan pynn?’ I a leveris, ‘Devedhys on rag kelmi Samson, rag gul dhodho poran dell wruga dhyn ni.’

¹¹ Ena tri mil wour a Yuda eth yn-nans dhe'n fols yn karrek Etam, hag i a leveris dhe Samson, ‘A ny wodhes bos an Filistysi rewloryon warnan? Ytho pandr'a wruss'ta dhyn?’ Ev a worthybis, ‘Par dell wrussons dhymmo, yndella re wrug vy dhedha.’

¹² I a leveris dhodho, ‘Ni re dheuth yn-nans rag dha gelmi, rag ma'th ryllyn yn leuv an Filistysi.’ Samson a worthybis dhedha, ‘Tewgh dhymm nag omsettyowgh er ow fynn agas honan.’

¹³ I a leveris dhodho, ‘Na omsettyn, ni a'th kelm hepken ha'th ri yn aga leuv; ny'th ledhyn.’ Yndella i a'n kolmas gans diw lovan nowydh, ha'y dhri yn-bann a'n garrek.

¹⁴ Pan dheuth dhe Lehi, an Filistysi a dheuth gans garmow dhe vetya ganso; ha spyrys an Arloedh a fyskas warnodho ha'n lovanow esa war y dhiwvregh eth ha bos avel garrow lin gans tan, ha'y rawyow a deudhis dhiworth y dhiwdhorn

¹⁵ Ena ev a gavas challa yr a asen, hag ev a ystynnas y leuv ha'y synsi, ha gansa ev a ladhas mil wour.

¹⁶ Ha Samson a leveris, ‘Gans challa asen, kalsow war galsow; gans challa asen my re ladhas mil wour.’

¹⁷ Wosa leverel hemma, ev a dewlis dhe-ves an challa, ha'n tyller na a veu henwys Ramath-lehi.

¹⁸ Y'n prys na ev a'n jevo syghes bras, hag ev a elwis war an Arloedh, ow leverel, ‘Ty re wrontyas an trygh meur ma dre leuv dha was. A dal dhymm merwel rag syghes ha koedha yn leuv an re antrodreghys?’

¹⁹ Yndella Duw a folsas igor an pans usi yn Lehi, ha dowr a dheuth anodho, ha'y spyrys a dhasvewas. Ytho henwys o En-hakkore, usi yn Lehi bys y'n jydh hedhyw.

²⁰ Hag ev a vreusi Ysrael yn dydhyow an Filistysi ugens blydhen.