An Gan a Ganow 1 - An Bibel Kernewek 20234 (Kernewek Kemmyn)

¹ An Gan a Ganow, dhe Solomon.

An Kynsa Kan

² Re ammo ev dhymm gans ammow y anow – rag gwell yw dha gerensa ages gwin.

³ Ethenn dha oylys yw da, dha hanow yw avel oyl dinewys; rakhenna gwyrghesow re'th karas.

⁴ Tenn vy war dha lergh – poenya a wren! An myghtern re'm kyrghas a-bervedh yn y jambouryow, Heudhik on ni ha ni a lowenha ynnos; ni a govha dha gerensa moy ages gwin, yn ewn i re'th karas!

⁵ Du ov vy, ha teg, A vyrghes Yerusalem, kepar ha tyldow Kedar, kepar ha kroglennow Solomon.

⁶ Na vir orthiv rag ow bos nebes du, rag an howl re'm loskas. Serrys orthiv o mebyon ow mamm, y hwrussons dhymm bos gwithyades an gwinlannow, ow gwinlann ow honan ny wrug vy hy gwitha.

⁷ Deriv dhymm, ty garadow ow enev, ple hwre'ta peski an deves, ple hwre'ta gul dhedha growedha y'n hanter-dydh, rag prag yth ov vy avel benyn kudhys gans vayl, ryb greow dha gowetha?

⁸ Mar ny wodhes, ty dekka yn mysk benynes, ke yn hyns war-lergh olow an flokk, ha pask dha vynnow ryb tyldow an vugeledh.

⁹ My a'th kehevel, ow huv kolonn, orth kasek yn mysk charettow Faro.

¹⁰ Teg yw dha dhiwvogh gans kadonyow a degennow, dha gonna gans tergh a gregyn.

¹¹ Ni a wra garlontow a owr dhiso, gans bannaghow a arghans.

¹² Pan esa an myghtern orth y voes, yth esa ow spiknard ow ri y ethenn.

¹³ Yth yw ow harer dhymm avel yalgh a vyrr, a'y growedh ynter ow diwvronn.

¹⁴ Ow huv kolonn yw dhymm avel tyskenn a vleujennow henna, yn gwinlannow En-gedi!

¹⁵ Otta! teg os, ow huv kolonn, Otta, teg os, kelemmi yw dha dhewlagas.

¹⁶ Otta, teg os, ow huv kolonn, hegar yn hwir. Gwyrdh yw agan gweli.

¹⁷ Kederwydh yw kebrow agan chiow, agan styllyow yw prenn meryw.