2 Thessalonianys 2 - An Bibel Kernewek 20234 (Kernewek Kemmyn)

An Den Dilagha

¹ Ni a'gas pys a vreder, a-dro dhe dhevedhyans agan Arloedh Yesu Krist ha'gan kuntellyans war-barth dhodho,

² na vewgh kryghyllys skav yn-mes a'gas brys nag amovys dre spyrys, na dre lavar, na dre lyther kepar ha pan ve dhiworthyn ni, ow terivas bos devedhys dydh an Arloedh.

³ Na wres denvyth agas toella yn fordh vytholl; rag ny yll an jydh na dos mar ny dheu an nagh kyns oll, ha'n den dilagha yw diskwedhys, mab an diswrians,

⁴ neb a omsett hag omdhrehevel a-ugh pup-tra yw henwys Duw, po yw gordhys, mayth esedh yn tempel Duw, ow teklarya ev y honan dhe vos Duw.

⁵ A ny berthowgh kov my dhe dherivas dhywgh an taklow ma, ha my hwath genowgh hwi?

⁶ Ha hwi a woer pyth yw an fronn lemmyn, may fo diskwedhys yn y dermyn.

⁷ Rag kevrin an fara dilagha a ober seulabrys. Mes ny wra an fronn lettya marnas poran y'n eur ma, bys mayth ello dhe-ves.

⁸ Hag ena an den dilagha a vydh diskudhys, neb a wra an Arloedh Yesu y dhistrui gans anall y anow, ha'y dhiswul dre diskwedhyans y dhevedhyans,

⁹ ha'y dhevedhyans a vydh herwydh oberyans Satnas, gans oll galloes ha toknys ha marthusyon fals,

¹⁰ ha gans pub toell a anewnder troha'n re usi ow mos dhe goll, rag ny dhegemmersons kerensa an gwir, may fens selwys.

¹¹ Ha rakhenna Duw a dhannvon dhedha kammdybyans krev, may kryssons an gow,

¹² may fo breusys pub den oll na wrug krysi an gwir, mes a gavas plesour yn kammhynseth.

Dewisys rag Selwyans

¹³ Mes y koedh dhyn grassa dhe Dhuw pup-prys yn agas kever, a vreder meurgerys gans an Arloedh, rag Duw a'gas dewisas y'n dalleth rag selwyans dre sansheans an spyrys ha kryjyans y'n gwir.

¹⁴ Dhe hemma ev a'gas gelwis ynwedh der agan aweyl dhe gavoes splannder agan Arloedh Yesu Krist.

¹⁵ Ytho, a vreder, sevewgh fast ha synsewgh an hengovyow a dhys'sowgh genen dre lavar po dre lyther.

¹⁶ Ha'gan Arloedh Yesu Krist y honan, ha Duw agan Tas, a wrug agan kara ha ri dhyn konfort heb worfenn ha govenek da dre ras,

¹⁷ re gennertho ha krevhe agas kolonn yn pub gwrians da ha pub ger da.