2 Myghternedh 6 - An Bibel Kernewek 20234 (Kernewek Kemmyn)

Marthus Penn an Voel

¹ Mebyon an brofoesi a leveris dhe Elisha, ‘Mir lemmyn, an tyller le may trigyn genes yw re vyghan ragon.

² Deun, ni a'th pys, dhe'n Yordan, ha kemmeres pub gour keber, ha gwren tyller ena may hyllyn triga ynno.’ Ev a worthybis, ‘Kewgh.’

³ Ena onan anedha a leveris, ‘Bedhes plegadow dhis dos gans dha wesyon.’ Ev a worthybis, ‘My a wra mos.’

⁴ Ytho, ev eth gansa. Ha pan dheuthons dhe'n Yordan i a droghas gwydh.

⁵ Mes, hag onan ow kul keber dhe goedha, penn an voel a goedhas y'n dowr; ev a armas ha leverel, ‘Soweth, a vester! Rag chevisys veu.’

⁶ Gour Duw a leveris, ‘Ple koedhas?’ Hag ev a dhiskwedhas dhodho an tyller. Ev a droghas gwelenn, ha'y thewlel di, ha henna a wrug dhe'n horn neuvella.

⁷ Yn-medh ev, ‘Kemmer e.’ Hag ev a ystynnas y leuv ha'y gemmeres.

Lettys yw Omsettyans Aram

⁸ Pup-prys pan esa myghtern Aram ow kwerrya erbynn Ysrael ev a omgusulya gans y wesyon, ow leverel y fedha y gamp yn neb tyller po arall.

⁹ Mes gour Duw a dhannvonas messaj dhe vyghtern Ysrael, ow leverel, ‘Bydh war na dremenydh an tyller na; rag yma Aram ow mos ena.’

¹⁰ Myghtern Ysrael a dhannvonas messaj dhe'n tyller a gewsis gour Duw a-dro dhodho. Moy ages unn po diwweyth ev a'n gwarnyas; yth ev a veu hewoel ena.

¹¹ Ytho pur droblys o kolonn myghtern Aram drefenn hemma; ev a elwis y wesyon ha leverel dhedha, ‘A ny dhiskwedhowgh dhymm piw ahanan usi ow skoedhya myghtern Ysrael?’

¹² Hag onan a'y wesyon a leveris, ‘Denvyth, ow arloedh, a vyghtern. Mes Elisha, an profoes usi yn Ysrael, a lever dhe vyghtern Ysrael an geryow a gewsydh y'th chambour.’

¹³ Ev a leveris, ‘Ke ha hwilas le may ma ev, may hylliv dannvon tus dh'y sesya.’ Leverys veu dhodho, ‘Yma ev yn Dothan.’

¹⁴ Rakhenna ev a dhannvonas di mergh ha charettow ha lu bras; hag i a dheuth y'n nos ha kyrghynna an sita.

¹⁵ Pan sevis gwas gour Duw myttin a-varr, ha mos yn-mes, otta, yth esa lu ow kyrghynna an sita, gans mergh ha charettow. Y was a leveris dhodho, ‘Ellas, ow mester! Pandr'a wren?’

¹⁶ Ev a worthybis, ‘Na borth own, rag an re usi genen yw moy ages an re usi gansa.’

¹⁷ Ena Elisha a bysis, ha leverel, ‘ARLOEDH, my a'th pys, igor y dhewlagas may hallo gweles.’ Ha'n Arloedh a igoras dewlagas an gour yowynk, hag ev a welas; leun o an menydh a vergh ha charettow a dan oll a-dro dhe Elisha.

¹⁸ Ha pan dheuth Aram er y bynn, Elisha a bysis an Arloedh ha leverel, ‘Gwask an bobel ma, my a'th pys, gans dellni.’ Hag ev a's gweskis gans dellni, herwydh ger Elisha.

¹⁹ Elisha a leveris dhedha, ‘Nyns yw homma an fordh, ha nyns yw homma an sita. Siwyewgh vy, ha my a wra agas dri dhe'n gour a hwilowgh.’ Hag ev a's hembronkas dhe Samaria.

²⁰ Kettell dheuthons bys yn Samaria, Elisha a leveris, ‘A Arloedh, igor dewlagas an dus ma may hallons gweles.’ Ha'n Arloedh a igoras aga dewlagas hag i a welas; hag ottensi yn kres Samaria.

²¹ Myghtern Ysrael a leveris dhe Elisha pan y's gwelas, ‘Ow thas, a wrav aga ladha? A wrav aga ladha?’

²² Hag ev a worthybis, ‘Na wredh. A vynnydh ladha an re a gemmersys prisners dre dha gledha ha dha warak? Sett bara ha dowr a-ragdha may hallons dybri hag eva, ha mos dh'aga mester.’

²³ Ytho ev a bareusis gwledh veur ragdha; ha wosa i dhe dhybri hag eva, ev a's dannvonas dhe-ves, hag i eth dh'aga mester. Ha ny dheuth bagasow Aram dhe diredh Ysrael na fella.

Esedhva Ben-hadad war Samaria

²⁴ Wosa hemma Ben-hadad, myghtern Aram, a guntellas oll y lu hag yskynna ha gul esedhva war Samaria.

²⁵ Yth esa divoetter bras yn Samaria hag yth esens ow kul an esedhva warnedhi bys may feu penn asen gwerthys a beswar-ugens bath a arghans, ha kwarter kab a gawgh kelemmi a bymp bath a arghans.

²⁶ Y feu myghtern Ysrael ow tremena war an fos, pan grias benyn dhodho, ‘Gweres, ow arloedh, myghtern!’

²⁷ Yn-medh ev, ‘Mar ny'th weres an Arloedh ple hallav kavoes gweres ragos? Dhiworth an leur-drushya po dhiworth an winwask?’

²⁸ An myghtern a leveris dhedhi, ‘Pandr'a hwer dhis?’ Hi a worthybis, ‘An venyn ma a leveris dhymm, “Roy dha vab jy may hyllyn y dhybri hedhyw, ha ni a dheber ow mab vy a-vorow.”

²⁹ Ytho ni a vrojyas ow mab ha'y dhybri. Ternos my a leveris dhedhi, “Roy dha vab may hyllyn y dhybri.” Mes hi re gudhsa hy mab.’

³⁰ Pan glewas an myghtern geryow an venyn, ev a skwardyas y dhillas. Pan esa ow tremena war an fos, an bobel a viras, hag otta, ev a'n jevo yskar a-bervedh nessa dh'y groghen.

³¹ Hag ev a leveris, ‘Re wrello Duw yndella dhymm ha moy ynwedh, mar pes penn Elisha mab Shafat war y dhiwskoedh hedhyw.’

³² Mes Elisha a esedhas yn y ji hag yth esa an henavogyon owth esedha ganso. An myghtern re dhannvonsa gour, mes kyns an gannas dhe dhos, Elisha a leveris dhe'n henavogyon, ‘A welowgh fatell dhannvonas an mab a voldrer ma nebonan rag kemmeres dhe-ves ow fenn? Mirewgh, pan dheu an gannas, degeewgh an daras ha'y synsi fast er y bynn. A nyns yw son treys y vester war y lergh?’

³³ Pan esa hwath ow kewsel orta, otta, an myghtern a dheuth yn-nans dhodho ha leverel, ‘Dhiworth an Arloedh yw an trobel ma. Prag y tal dhymm gortos an Arloedh pella?’