2 Makkabeyon 14 - An Bibel Kernewek 20234 (Kernewek Kemmyn)

Alkimus a Gews Erbynn Yudas

¹ Teyr blydhen a-wosa, ger a dheuth dhe Yudas ha'y dus, Demetrius mab Selewkus dhe woelya bys yn porth Tripolis gans lu krev ha lu lestri,

² ha kemmeres an pow, ha ladha Antioghus ha'y withyas Lysias.

³ Lemmyn neb unn Alkimus, re bia arghoferyas seulabrys mes re omdhefolas a'y vodh y honan yn termyn an dibarth, a aswonnis nag esa fordh dhodho bos saw po dhe dhos arta dhe'n alter sans,

⁴ hag ev eth dhe vyghtern Demetrius y'n vlydhen kans hag unnek ha dew-ugens, ow ri dhodho kurun owr ha palmwydhenn, hag ynwedh nebes an skorr oliv usys y'n tempel. Y'n jydh na ny gewsis a-dro dh'y dowlow.

⁵ Mes ev a gavas chons dhe vos pella gans y dowl foll pan veu gelwys gans Demetrius dhe guntelles an konsel le may feu govynnys orto a-dro dhe omdhalgh ha mynnasow an Yedhewon. Ev a worthybis:

⁶ ‘Yma re a'n Yedhewon gelwys Hasideanys, ha'ga hapten Yudas Makkabeus, usi ow pesya breseli ha rebellya, ha ny asons an wlaskor bos yn kres.

⁷ Ytho my re worras a-denewen enor ow hendasow – my a styr an arghoferyaseth – ha dos lemmyn omma,

⁸ yn kynsa drefenn bos gwir breder genev rag bernyow an myghtern, ha nessa bos bern dhymm ynwedh rag ow heswlasoryon. Rag dre follneth an re a gampoellis yma agan kenedhel dhien yn anfeus nag yw byghan.

⁹ Drefenn ty dhe aswonn, a vyghtern, manylyon an mater ma, preder a'gan pow ha'gan kenedhel gweskys a bub tu, gans an kuvder grassyes a dhiskwedhydh dhe beub.

¹⁰ Rag hedre vewo Yudas, ny yll an governans kavoes kres.’

¹¹ Wosa ev dhe leverel hemma, remenant a gowetha an myghtern, neb o eskarek dhe Yudas, a faglas Demetrius uskis hwath moy.

¹² Distowgh ev a dhewisis Nikanor, re bia mester an olifanses, orth y apoyntya avel governour Yudi, ha'y dhannvon yn-rag

¹³ gans gorhemmynn dhe ladha Yudas ha skattra an dus esa ganso, ha dhe wul Alkimus arghoferyas an tempel meur.

¹⁴ An Jentilys der oll Yudi, re fisa a-rag Yudas, a hesyas dhe junya gans Nikanor, ow tybi anfeus ha terroesow an Yedhewon dhe styrya sewena dhedha aga honan.

Nikanor a Wra Kres gans Yudas

¹⁵ Pan glewas an Yedhewon a dhevedhyans Nikanor hag a guntelles an Jentilys, i a skoellyas pri war aga fennow ha pysi dhodho Ev neb a fastyas y bobel y honan bys vykken hag a venten y ertach y honan pup-prys der omdhiskwedhyans.

¹⁶ Orth gorhemmynn an hembrenkyas, i eth yn-rag alena distowgh ha metya gansa yn batel y'n dre Adasa.

¹⁷ Simon, broder Yudas, a dhyerbynnsa lu Nikanor, ha sowdhenys veu; nos veu, ha ny wrussa an eskar son.

¹⁸ Byttegyns pan glewas Nikanor a golonnekter Yudas ha'y dus ha'ga bravder yn batel rag aga bro, ny vedhas ervira an mater dre skoellya goes.

¹⁹ Ytho ev a dhannvonas Posidonius, Theodotus, ha Mattathias dhe wul kres.

²⁰ Wosa i dhe hwithra an kynnigow yn leun, an hembrenkyas a's derivas dhe'n bobel, ha dell heveli y fons a'n keth brys, hag i a assentyas dhe'n kevambos.

²¹ I a apoyntyas dydh dhe omvetya yn priva. Charett a dheuth yn-rag a'n dhew lu; esedhow a enor a veu gorrys yn aga le;

²² Yudas a worras gwer ervys parys yn tylleryow lesus dhe lesta trayson tromm a barth an eskerens; ytho i a synsis an omgusulyans yn kres.

²³ Yth esa Nikanor ow kortos yn Yerusalem ha ny wrug dregynn, mes ev a dhannvonas dhe-ves routhow an dus re omguntellsa.

²⁴ Ev a withas Yudas prest yn y wolok; ev a gavsa sergh dhe'n gour a'y golonn.

²⁵ Ev a ynnias warnodho demmedhi ha dineythi fleghes; ytho Yudas a dhemmedhis, ha bewa yn kosel, ha previ bewnans kemmyn.

Nikanor a Dreyl Erbynn Yudas

²⁶ Mes pan welas Alkimus an bodh da yntredha, ev a gemmeras an kevambos re bia gwrys ha mos dhe Demetrius. Ev a leveris dhodho bos Nikanor dislel dhe'n governans, rag ev dhe apoyntya an braser na erbynn an wlaskor, Yudas, dh'y siwya avel koweth an myghtern.

²⁷ An myghtern a sorras, hag provokys gans kuhudhansow fals an den legrys na, ev a skrifas dhe Nikanor ow leverel y vos drok-pes gans an kevambos hag ow korhemmynna dhodho dannvon Makkabeus dhe Antiogh avel prisner heb lettya.

²⁸ Pan dheuth an messaj ma dhe Nikanor, ev o troblys ha keudhys bos res dhodho dilea aga akordyans, kyn na wrussa an gour kamm.

²⁹ Drefenn na yllys enebi an myghtern, ev a viri orth chons dhe gowlwul hemma dre serneth.

³⁰ Mes Makkabeus, ow kweles bos Nikanor moy stroeth yn y dhyghtyans ganso hag orth y vetya moy ankortes dell via y us, a erviras na dheuth an stroethter ma a'n gwella skilys. Ytho ev a guntellas niver da a'y wer hag omgudha dhiworth Nikanor.

³¹ Pan aswonnis Nikanor y vos lettys dre dowl an gour, ev eth dhe'n tempel meur ha sans pan esa an oferysi owth offrynna aga sakrifisow usadow, ha gorhemmynna orta delivra dhodho an gour.

³² Pan dosons ti na aswonnens le mayth esa an den a hwilens,

³³ ev a ystynnas y leuv dhyghow war-tu ha'n sentri, ha ti yndellma: ‘Mar ny dhelivrowgh dhymm Yudas avel prisner, my a denn dhe'n leur an sentri ma a Dhuw, ha my a derr an alter dhe'n dor, ha drehevel omma tempel splann dhe Dionysus.’

³⁴ Wosa leverel an geryow ma, ev eth dhe-ves. Ena an oferysi a ystynnas aga diwleuv war-tu ha nev ha gelwel warnodho neb usi pup-prys ow tefendya agan kenedhel, y'n geryow ma:

³⁵ ‘A Arloedh a bup-tra, kyn na' fydh edhomm a dravyth, ty re beu pes da y fo tempel dha annedhva yn agan mysk;

³⁶ Ytho lemmyn, A Arloedh sans a bub sansoleth, gwith andhefolys an chi ma bys vykken re beu purhes a-gynsow.’

Mernans Razis

³⁷ Neb unn Razis, onan a'n henavogyon a Yerusalem, a veu kuhudhys dhe Nikanor avel gour a gara y geswlasoryon hag a vri pur dha, ha rag y vodh da ev a veu gelwys tas an Yedhewon.

³⁸ Yn prysyow kyns pan nag esa myska gans an Jentilys, ev re bia kuhudhys a Yedhowieth, hag ev re beryllsa fest yn tiwysyk korf ha bewnans rag yedhowieth.

³⁹ Nikanor, ow mynnes diskwedhes an kasadewder a'n jevo rag an Yedhewon, a dhannvonas moy es pymp kans souder dh'y dhalghenna;

⁴⁰ rag ev a dybi y trolla terroes warnedha orth aga dalghenna.

⁴¹ Pan esa an soudoryon ogas dhe sesya an tour ha terri yn freudh porth an klos, i a worhemmynnis bos degys tan ha'n darasow leskys. Ha kyrghynnys a bub tu, Razis a goedhas war y gledha y honan,

⁴² ow pos gwell ganso merwel yn nobyl ages koedha yn diwleuv peghadoryon ha godhevel outrayow anwiw dh'y enesigeth nobyl.

⁴³ Mes yn toemmder an omladh ny weskis yn ewn, ha'n routh ow fyski a-ji der an porthow. Ev a boenyas yn kolonnek war-vann war an fos, hag omdewlel yn hardh yn-nans bys y'n routh.

⁴⁴ Mes dell gildennsons yn uskis, spas a igoras hag ev a goedhas yn kres an spas gwag.

⁴⁵ Hwath yn few hag enowys dre gonnar, ev a sevis, ha'y woes a frosas yn-rag ha kynth o sevur y woliow ev a boenyas der an routh; hag ow sevel war garrek serth,

⁴⁶ lemmyn heb goes vytholl, ev a skwardyas y golodhyon yn-mes ha'ga thewlel orth an routh, ow kelwel war an Arloedh a vewnans hag a spyrys aga daskorr dhodho arta. Homm o maner y vernans.