2 Kroniklys 7 - An Bibel Kernewek 20234 (Kernewek Kemmyn)

Solomon a Saker an Tempel

¹ Pan worfennas Solomon y bysadow, tan a dhiyskynnas a nev hag a loskas an offrynn leskys ha'n sakrifisow; ha glori an Arloedh a lenwis an tempel.

² Ny ylli an oferysi entra dhe ji an Arloedh, drefenn glori an Arloedh dhe lenwel chi an Arloedh.

³ Pan welas oll mebyon Ysrael an tan ow tiyskynna ha glori an Arloedh war an tempel, i a omblegyas war an leur ha'ga fas dhe'n dor, hag a wordhyas hag a ros grasow dhe'n Arloedh ow leverel, ‘Rag ev yw da, rag y dregeredh a dhur bys vykken.’

⁴ Ena an myghtern hag oll an bobel a offrynnas sakrifisow a-rag an Arloedh.

⁵ Myghtern Solomon a offrynnas avel sakrifis dew vil warn ugens a ojyon, ha hweg ugens mil dhavas. Yndella an myghtern hag oll an bobel a sakras chi Duw.

⁶ An oferysi a sevis yn aga thylleryow apoyntys, ha'n Levysi ynwedh, gans daffar menestrouthi an Arloedh, a wrug Davydh an myghtern rag ri grasow dhe'n Arloedh – rag y dregeredh a dhur bys vykken – peskweyth may profyas Davydh gormola dredha. A-dal dhedha an oferysi a sonas hirgern, hag oll Ysrael a'ga sav.

⁷ Solomon a sakras kres an klos esa a-rag chi an Arloedh, hag ena ev a offrynnas an offrynnow leskys ha blonek an offrynnow kres, drefenn na ylli an alter a vrons a wrug Solomon synsi an offrynn leskys ha'n offrynn greun ha'n blonek.

⁸ Y'n termyn na Solomon a ordenas goel seyth dydh, hag oll Ysrael ganso, kuntelles fest bras, a Lebo-hamath dhe nans Ejyp.

⁹ Y'n nawves dydh i a ordenas kuntelles solem; rag i re solempnyas sakrans an alter seyth dydh ha'n goel seyth dydh.

¹⁰ Y'n tressa dydh warn ugensves a'n seythves mis ev a dhannvonas an bobel dhe-ves dh'aga threvow, lowenek ha heudh aga holonn, drefenn an dader a dhiskwedhas an Arloedh dhe Davydh ha dhe Solomon ha dh'y bobel Ysrael.

¹¹ Yndella Solomon a worfennas chi an Arloedh ha chi an myghtern; hag ev a gowlwrug pup-tra a dheuth yn y vrys dh'y wul yn chi an Arloedh hag yn y ji y honan.

Duw a Omdhiskwedh dhe Solomon an Nessa Prys

¹² Ena an Arloedh a omdhiskwedhas dhe Solomon y'n nos, ha leverel dhodho, ‘My re glewas dha bysadow, ha my re dhewisas an tyller ma ragov vy ow honan avel chi sakrifis.

¹³ Pan dhegeav an nevow bys ma nag eus glaw, po gorhemmynn dhe'n lokust may tevorryo an tir, po dhannvon kleves ynter ow fobel,

¹⁴ mar omuvelha ow fobel yw henwys gans ow hanow, ha pysi ha hwilas ow fas ha treylya dhiworth aga fordhow drog, ena my a glew a nev, ha my a av dhedha aga fegh ha yaghhe aga thir.

¹⁵ Lemmyn ow dewlagas a vydh igor ha'm diwskovarn a attend an pysadow a vydh gwrys y'n tyller ma.

¹⁶ Rag my re dhewisas hag a sakras an chi ma, rag may fo ow hanow ena bys vykken; ow dewlagas ha'm kolonn a vydh ena bynitha.

¹⁷ Ha ty mar kerdhydh, par dell gerdhi dha das Davydh, ow kul herwydh pup-tra re worhemmynnis vy dhis, hag ow kwitha oll ow ordenansow ha'm breusow,

¹⁸ my a fast dha vyghterneth, par dell wrugavy kevambos gans dha das Davydh ow leverel, “Nevra ny fyll dhis gour dhe rewlya yn Ysrael.”

¹⁹ ‘Mes mar treylydh a-denewen ha gasa ow ordenansow ha'm gorhemmynnow re worris a-ragos, ha mones ha servya duwow erell ha'ga gordhya,

²⁰ ena my a'th tiwreydh dhiworth an tir a res vy dhis; ha'n chi ma a sakris rag ow hanow my a dewl yn-mes a'm golok, ha my a'n wra henlavar ha ges yn mysk oll an poblow.

²¹ Ha'n chi ma, lemmyn ughelhes, pubonan a dremena dresto a'n jevydh skruth hag a lever, “Prag y hwrug an Arloedh tra a'n par ma dhe'n tir ma ha dhe'n chi ma?”

²² Ena y leverir, “Drefenn i dhe asa an Arloedh Duw aga thasow, neb a's dros yn-mes a bow Ejyp, hag i a lenas orth duwow erell, ha'ga gordhya ha'ga servya, ha rakhenna ev a dhros oll an terroes ma warnedha.” ’