2 Kroniklys 14 - An Bibel Kernewek 20234 (Kernewek Kemmyn)

Asa a Reyn

¹ Yndella Abia a goskas gans y dasow, hag i a'n ynkleudhyas yn sita Davydh. Y vab Asa a reynyas yn y le. Yn y dhydhyow an tir a'n jevo powes deg blydhen.

² Asa a wrug an pyth o da hag ewn yn golok an Arloedh y Dhuw.

³ Ev a gemmeras dhe-ves an alteryow estren ha'n tylleryow ughel, ev a dorras an peulveyn hag a droghas dhe'n dor an Asherim.

⁴ Ev a worhemmynnis dhe Yuda hwilas an ARLOEDH, Duw aga thasow, ha bos gostydh dhe'n lagha ha'n gorhemmynn.

⁵ Ynwedh ev a gemmeras dhe-ves, dhiworth oll sitys Yuda an tylleryow ughel ha'n alteryow a ynkys. Ha'n wlaskor a's tevo powes yn-danno.

⁶ Ev a dhrehevis sitys kerys yn Yuda ha'n tir a'n jevo powes. Ny veu bresel er y bynn y'n blydhynyow na, rag an Arloedh a ros dhodho kres.

⁷ Ev a leveris dhe Yuda. ‘Drehevyn an sitys ma, ha'ga hyrghynna gans fosow ha touryow, yetys ha barrys. Yma an tir dhyn hwath, drefenn ni dhe hwilas an Arloedh agan Duw; ni re'n hwilas hag ev re ros dhyn kres a bub tu.’ Ytho i a dhrehevis ha seweni.

⁸ Asa a'n jevo lu a dri hans mil a Yuda, ervys gans skoesow ha guwow, ha dew kans, peswar-ugens a vilyow a gasoryon a Benyamin, ervys gans skoesow ha guwow. Oll a'n re ma o kasoryon grev.

Omsettyans gans Ethiopia

⁹ Zeragh an Ethiopyas a dheuth er aga fynn gans lu a vilvil gasor ha tri hans charett, hag ev a dheuth bys Maresha.

¹⁰ Asa eth yn-mes rag metya ganso, hag i a arayas aga honan rag batel yn nans Sefatha ryb Maresha.

¹¹ Asa a grias dhe'n Arloedh y Dhuw, ‘A Arloedh, nyns eus dihevelepter ragos yntra gweres an re grev ha'n re wann. Gweres ni, A Arloedh agan Duw, rag ni a drest ynnos, hag yn dha hanow ni re dheuva erbynn an routh ma. A Duw, na dryghes den marwel er dha bynn.’

¹² Yndella an Arloedh a weskis an Ethiopysi a-rag Asa hag a-rag Yuda, ha'n Ethiopysi a fias dhe'n fo.

¹³ Asa ha'n pobel ganso a's helghyas bys Gerar, ha'n Ethiopysi a goedhas bys ma nag o nebonan gesys yn few; rag aga bos brewys a-rag an Arloedh ha'y lu. I a dhug dhe-ves preydh meur.

¹⁴ I a weskis oll an sitys yn kyrghynn Gerar, rag yth esa own an Arloedh warnedha. I a ravnas oll an sitys, rag yth esa meur a breydh ynna.

¹⁵ Ynwedh i a omsettyas orth tyldow an re a's tevo chatel, hag i a dhegi dhe-ves deves pals ha kowrvergh. Ena i a dhehwelis dhe Yerusalem.