2 Korinthianys 3 - An Bibel Kernewek 20234 (Kernewek Kemmyn)

Menystrys a'n Kevambos Nowydh

¹ A dhallethyn ni omgommendya arta? Poken eus dhyn edhomm, dell eus dhe re, a lytherow a gommendyans dhywgh po dhiworthowgh?

² Hwi yw agan lyther, skrifys yn agan kolonnow, aswonnys ha redys gans oll,

³ ha diskwedhys owgh hwi dhe vos lyther Krist, der agan menystrans; nyns owgh hwi skrifys der ynk, mes gans Spyrys an Duw bew, a-der yn leghyon a ven mes yn leghyon hag yw kolonnow a gig.

⁴ Dre Grist yma dhyn fydhyans a'n par na orth Duw.

⁵ Nyns on ni gwiw dhyn agan honan dhe rekna travyth a'gan honan, mes agan gwiwder yw a Dhuw,

⁶ neb a'gan gwrug gwiw dhe vos menystrys a gevambos nowydh, a-der a lytherenn mes a spyrys; rag an lytherenn a ladh, mes an spyrys a vewha.

⁷ Lemmyn mar teuth an menystrans a ankow yn golewder, grevys yn leghyon a ven, ma na allas mebyon Ysrael hwithra war fas Moyses drefenn golewder y fas, ow tremena dhe-ves dell esa,

⁸ pygemmys moy yn golewder a dheu menystrans an Spyrys?

⁹ Rag mars esa golewder y'n menystrans a dhampnasyon, pyseul dhe voy y hwra an menystrans a ewnder palshe yn golewder.

¹⁰ Yn hwir, an pyth a'n jeva golewder kyns ny'n jeves golewder lemmyn y'n mater ma drefenn an golewder splanna agesso.

¹¹ Rag mar teuth dre wolewder an pyth esa ow tremena dhe-ves, pyseul dhe voy yn golewder yma'n pyth a dhur.

¹² Ytho, a-ban eus dhyn govenek a'n par na, ni a ober gans hardhder meur;

¹³ nyns on ni kepar ha Moyses, neb a worra kudhlenn war y fas, ma na hwitthra mebyon Ysrael war dhiwedh an pyth esa ow tremena dhe-ves.

¹⁴ Mes kaleshes o aga howsesyow. Rag bys y'n jydh hedhyw an keth kudhlenn a worta war an redyans a'n kevambos koth; nyns yw kemmerys dhe-ves, drefenn nag yw defendys dhe-ves saw unnsel yn Krist.

¹⁵ Mes bys hedhyw, pan yw Moyses redys, kudhlenn a wrowedh war aga holonnow;

¹⁶ mes den pan dreyl dhe'n Arloedh, an gudhlenn yw kemmerys dhe-ves.

¹⁷ Lemmyn an Arloedh yw an Spyrys; ha plepynag usi Spyrys an Arloedh, ena rydhses yma.

¹⁸ Mes, heb kudhlenn war agan fas, hag ow kweles golewder an Arloedh kepar hag yn gweder-mires, yth eson ni oll ow pos chanjys bys y'n keth imaj, dhiworth golewder dhe wolewder kepar ha dhiworth an Arloedh, an Spyrys.