1 Thessalonianys 4 - An Bibel Kernewek 20234 (Kernewek Kemmyn)

Bewnans Plegadow dhe Dhuw

¹ Wor'tiwedh ytho, a vreder, ni a'gas pys ha keski y'n Arloedh Yesu, kepar dell dhegemmersowgh dhiworthyn ni fatell goedh dhywgh kerdhes ha plegya dhe Dhuw, kepar dell gerdhowgh dhe wir, may palshahowgh dhe voy.

² Rag hwi a woer an gorhemmynnow a resen dhywgh der an Arloedh Yesu.

³ Rag hemm yw bodh Duw, agas sansheans, hwi dhe omwitha rag fornikasyon,

⁴ dhe wodhvos pubonan ahanowgh fatell wittho y gorf y honan yn sansoleth hag enor,

⁵ heb passhyon drokhwans kepar ha'n Jentilys na aswonn Duw;

⁶ heb treuspassya na gul kamm dh'y vroder na'y doella y'n dra ma, rag bos an Arloedh dialor yn oll an taklow ma, kepar dell leversyn dhywgh kyns ha desta.

⁷ Rag ny'gan gelwis Duw dhe vostedhes, mes yn sansoleth.

⁸ Rakhenna, neb a skon, ny wra skonya mab-den mes Duw a re y Spyrys Sans dhywgh ynwedh.

⁹ A-dro dhe gerensa a'n vreder, ny'gas beus edhomm my dhe skrifa dhywgh, rag hwi re beu dyskys gans Duw dhe gara an eyl y gila,

¹⁰ ha dhe wir, hwi a wra hemma rag an vreder oll der oll Makedonia. Mes ni a'gas pys, a vreder, may palshahowgh dhe voy,

¹¹ ha strivya yn freth dhe vos kosel, ha gul agas taklow hwi, hag oberi gans agas diwla hwi, kepar dell worhemmynnsyn dhywgh,

¹² may kerthowgh gans onester a-rag an re a-ves, ha ma na vo edhomm dhywgh a dravyth.

Devedhyans an Arloedh

¹³ Ny vynnyn hwi dhe vos heb godhvos, a vreder, a-dro dhe'n re a gosk, ma na vewgh grevys kepar ha'n re erell heb govenek.

¹⁴ Rag mar krysyn Yesu dhe verwel ha dasserghi, yndella ynwedh, dre Yesu, Duw a dhre ganso an re re goskas.

¹⁵ Hemma a leveryn dhywgh dre er an Arloedh: ni, neb a vew ha neb yw gesys bys yn devedhyans an Arloedh, ny wren mos mann kyns an re re goskas.

¹⁶ Rag an Arloedh y honan gans kri gorhemmynn, gans lev arghel, ha gans hirgorn Duw, a dhiyskynn dhiworth nev, ha'n re varow yn Krist a sev yn kynsa.

¹⁷ Ena ni, neb yw yn few, neb yw gesys, a vydh kemmerys war-barth gansa yn kommol dhe vetya an Arloedh y'n ayr; hag yndella pup-prys y fydhyn gans an Arloedh.

¹⁸ Ytho, kennerthewgh an eyl y gila gans an geryow ma.