1 Myghternedh 16 - An Bibel Kernewek 20234 (Kernewek Kemmyn)

¹ Ger an Arloedh a dheuth dhe Yehu mab Hanani erbynn Baasha, ow leverel.

² ‘A-ban y'th trehevis yn-mes a'n doust ha gul dhis bos rewler war ow fobel Ysrael, ha ty dhe gerdhes yn fordh Yeroboam, ha gul dhe'm pobel Ysrael pegha, orth ow frovokya dhe sorr gans aga feghow,

³ ytho my a gemmer dhe-ves henedh Baasha ha'y ji, ha my a wra dhe'th chi bos haval dhe ji Yeroboam mab Nebat.

⁴ An keun a dheber neb a verow a ji Baasha y'n sita; ha neb a verow y'n gwelyow ydhyn a'n ayr a's deber.’

⁵ Gwriansow erell Baasha, an pyth a wrug ha'y nerth, a nyns yns i skrifys yn lyver kovadhow myghternedh Ysrael?

⁶ Baasha a goskas gans y dasow, hag a veu ynkleudhys yn Tirsa; ha'y vab Ela a dheuth war y lergh.

⁷ Ger an Arloedh a dheuth ynwedh dre leuv an profoes Yehu mab Hanani erbynn Baasha ha'y ji, ha drefenn oll an drog a wrug yn golok an Arloedh, orth y brovokya dhe sorr gans ober y dhiwleuv, ow pos haval dhe ji Yeroboam, hag ynwedh drefenn ev dh'y dhistrui.

Ela a Reyn war Ysrael

⁸ Y'n hweghves blydhen warn ugens a Asa myghtern Yuda, Ela mab Baasha a dhallathas reynya war Ysrael yn Tirsa; ev a reynyas diw vlydhen.

⁹ Y was Zimri, kaslewydh hanter y jarettow, a vrasas er y bynn. Pan esa yn Tirsa, ev a evas ha bos medhow yn chi Arsa, rennyas y ji yn Tirsa,

¹⁰ Zimri a dheuth a-ji ha'y weskel ha'y ladha, y'n seythves blydhen warn ugens a Asa myghtern Yuda, ha reynya yn y le.

¹¹ Pan dhallathas reynya, kettell esedhsa war an tron, ev a ladhas oll chi Baasha; ny asas dhodho nagonan a bis erbynn fos, naneyl a'y deylu nag a'y gowetha.

¹² Yndellma Zimri a dhistruis oll chi Baasha, herwydh ger an Arloedh a gewsis erbynn Baasha dre leuv an profoes Yehu,

¹³ drefenn oll peghosow Baasha ha peghosow y vab Ela a wrussons, ha may hwrug dhe Ysrael aga gul, ow provokya an Arloedh, Duw Ysrael dhe sorr gans aga idolyow koeg.

¹⁴ Gwriansow erell Ela, pup-tra a wrug ev, a nyns yns i skrifys yn lyver kovadhow myghternedh Ysrael?

Zimri a Reyn war Ysrael

¹⁵ Y'n seythves blydhen warn ugens a Asa myghtern Yuda, Zimri a reynyas seyth dydh yn Tirsa, Hag yth esa an bobel ow kampya erbynn Gibbethon, tre filistek,

¹⁶ ha'n bobel esa ow kampya a glewas bos leverys, ‘Zimri re vrasas, hag ev re ladhas an myghtern’; ytho oll Ysrael a wrug Omri, kaslewydh an lu, myghtern war Ysrael an jydh na y'n kamp.

¹⁷ Ytho Omri eth yn-bann a Gibbethon, hag oll Ysrael ganso, hag i a wrug esedhva war Tirsa.

¹⁸ Pan welas Zimri bos kemmerys an sita, ev eth yn tour chi an myghtern; ev a loskas chi an myghtern warnodho y honan gans tan hag a verwis,

¹⁹ drefenn an peghosow a wrug ev, ow kul drog yn golok an Arloedh, ow kerdhes yn fordh Yeroboam, ha rag an pegh re wrug, ow kul dhe Ysrael pegha.

²⁰ Gwriansow erell Zimri, ha'n bras a wrug, a nyns yns i skrifys yn lyver kovadh myghternedh Ysrael?

Reyn Omri war Ysrael

²¹ Ena pobel Ysrael a veu rynnys yn diw rann; hanter an bobel a holyas Tibni mab Ginath, dh'y wul myghtern, ha hanter a holyas Omri.

²² Mes an bobel a holyas Omri a dryghis war an bobel a holyas Tibni mab Ginath; ytho Tibni a verwis, hag Omri a dheuth ha bos myghtern.

²³ Y'n unnegves blydhen warn ugens a Asa myghtern Yuda, Omri a dhallathas reynya war Ysrael; ev a reynyas dewdhek blydhen, hwegh anedha yn Tirsa.

Samaria an Bennsita Nowydh

²⁴ Ev a brenas menydh Samaria a-dhiworth Shemer a dhew dalent a arghans; ev a geras an menydh, ha gelwel an sita a dhrehevis, Samaria, war-lergh hanow Shemer, perghennek an menydh.

²⁵ Omri a wrug an pyth o drog yn golok an Arloedh; ev a wrug moy drog ages oll y ragresegydhyon.

²⁶ Rag ev a gerdhas yn fordh Yeroboam mab Nebat, hag y'n peghosow may hwrug dhe Ysrael aga gul, ow provokya an Arloedh, Duw Ysrael, dhe sorr gans aga idolyow koeg.

²⁷ An hwarvosow a wrug Omri, ha'n nerth a dhiskwedhas, a nyns yns i skrifys yn lyver kovadhow myghternedh Ysrael?

²⁸ Omri a goskas gans y dasow, hag a veu ynkleudhys yn Samaria; hag Ahab y vab a dheuth war y lergh.

Ahab a Reyn war Ysrael

²⁹ Y'n etegves blydhen warn ugens a Asa myghtern Yuda, Ahab mab Omri a dhallathas reynya war Ysrael; Ahab mab Omri a reynyas war Ysrael yn Samaria diw vlydhen warn ugens.

³⁰ Ahab mab Omri a wrug drog yn golok an Arloedh moy ages oll y ragresegydhyon.

Ahab a Dhemmedh Yezebel

³¹ Ha par dell ve tra skav ragdho kerdhes yn peghosow Yeroboam mab Nebat, ev a gemmeras avel y wreg Yezebel myrgh Ethbaal myghtern an Sidonysi, hag ev eth ha servya Baal, ha'y wordhya.

³² Ev a dhrehevis alter rag Baal yn chi Baal, hag a dhrehevis yn Samaria.

³³ Ahab a wrug Ashera ynwedh. Ahab a wrug moy dhe brovokya an Arloedh, Duw Ysrael, ages oll myghternedh Ysrael esa kyns.

³⁴ Yn y dhydhyow Hiel a Bethel a dhrehevis Yeriko; ev a worras hy selveyn orth kost Abiram y gynsa-genys, ha settya hy yetow yn-bann orth kost y yowynka mab Segub, herwydh ger an Arloedh, a gewsis der Yoshua mab Nun.