1 Kroniklys 27 - An Bibel Kernewek 20234 (Kernewek Kemmyn)

An Rannow Breselek

¹ Homm yw rol an Ysraelysi, pennow teyluyow, kaptenyon milyow ha kansow ha'ga soedhogyon a servya an myghtern yn pup-tra ow tochya dhe'n rannow a dho a-ji hag e yn-mes mis wosa mis dre der oll misyow an vlydhen. Pub rann a's tevo peswar mil wour warn ugens.

² Yashobeam mab Zabdiel a'n jevo charj a'n kynsa rann y'n kynsa mis; yth esa peswar mil warn ugens yn y rann.

³ Ev o diyskynnyas Peres ha penn oll kaslewydhyon an lu rag an kynsa mis.

⁴ Doday an Aghoghyas a'n jevo charj a'n rann rag an nessa mis; Mikloth o ledyer y rann; yn y rann yth esa peswar mil warn ugens.

⁵ An tressa kaslewydh, rag an tressa mis, o Benaya, mab Yehoyada an arghoferyas; ev o an ledyer, hag yn y rann yth esa peswar mil warn ugens.

⁶ Hemm yw an Benaya neb o kasor yn mysk an deg warn ugens ha dres an deg warn ugens; Ammizabad y vab a'n jevo charj a'y rann.

⁷ An peswora, rag an peswora mis, o Asahel broder Yoab, ha'y vab Zebadia war y lergh; yn y rann yth esa peswar mil warn ugens.

⁸ An pympes, rag an pympes mis, o an kaslewydh Shamhuth, an Yzraghyas; hag yn y rann yth esa peswar mil warn ugens.

⁹ An hweghves, rag an hweghves mis, o Ira mab Ikkesh an Tekoyas; yn y rann yth esa peswar mil warn ugens.

¹⁰ An seythves, rag an seythves mis, o Heles an Pelonyas, a vebyon Efraym; yn y rann yth esa peswar mil warn ugens.

¹¹ An ethves, rag an ethves mis, o Sibbekay an Hushathyas, a deylu Zeragh; yn y rann yth esa peswar mil warn ugens.

¹² An nawves, rag an nawves mis, o Abiezer an Anathothyas, a'n Benyaminysi; yn y rann yth esa peswar mil warn ugens.

¹³ An degves, rag an degves mis, o Maharay an Netofathyas a deylu Zeragh; yn y rann yth esa peswar mil warn ugens.

¹⁴ An unnegves, rag an unnegves mis, o Benaya an Pirathyas, a vebyon Efraym; yn y rann yth esa peswar mil warn ugens.

¹⁵ An dewdhegves. rag an dewdhegves mis, o Helday an Netofathyas, a deylu Othniel; yn y rann yth esa peswar mil warn ugens.

Pennsevigyon an Loethow

¹⁶ Dres loethow Ysrael, an pennsevik rag an Rewbenysi o Eliezer mab Zikri; rag an Simeonysi, Shefatia mab Maaka;

¹⁷ rag Levi, Hashabia mab Kemuel; rag Aron, Sadok;

¹⁸ rag Yuda, Elihu, onan a vreder Davydh; rag Yssakar, Omri mab Mighal;

¹⁹ rag Zebulun, Yshmaia mab Obadia; rag Naftali, Yeremoth mab Azriel;

²⁰ rag Efraym, Hoshea mab Azazia; rag hanter-loeth Manasse, Yoel mab Pedaya;

²¹ rag hanter-loeth Manasse yn Gilead, Iddo mab Zekaria; rag Benyamin, Yaasiel mab Abner;

²² rag Dan, Azarel mab Yeroham. An re ma o pennsevigyon loethow Ysrael.

²³ Mes ny niveras Davydh an re yn-dann ugens bloedh, rag an Arloedh re ambossa gul Ysrael mar bals avel ster an nevow.

²⁴ Yoab mab Seruya a dhallathas nivera mes ny worfennas; sorr a goedhas war Ysrael ragdho, ha ny veu an niver gorrys yn Kroniklys myghtern Davydh.

Soedhogyon Tresorva an Myghtern

²⁵ War dresorvaow an myghtern yth esa Azmaveth mab Adiel; ha war dresorvaow y'n powdir, y'n sitys, y'n trevow hag y'n touryow yth esa Yonathan mab Uzzia;

²⁶ war an re esa ow konis an dor yth esa Ezri mab Kelub;

²⁷ war an gwinlannow yth esa Shimei an Ramathyas; ha war askorr an gwinlannow rag dorgellow an gwin yth esa Zabdi an Shifmyas.

²⁸ War an olewbrennyer ha'n sykaminwydh y'n Shefela yth esa Baal-hanan an Gederyas; war withvaow an oyl yth esa Yoash.

²⁹ War an greow a beuri yn Sharon yth esa Shitray an Sharonyas; ha war an greow y'n nansow yth esa Shafat, mab Adlay.

³⁰ War an kowrvergh yth esa Obil an Yshmaelyas; war an kasegi-asen yth esa Yeghdeya an Meronothyas;

³¹ war an flokkys yth esa Yaziz an Hagryas. Oll an re ma a'n jevo charj a bythow myghtern Davydh.

³² Yonathan, ewnter Davydh, o kusulyer, gour fur, ha skriba; hag yth esa Yehiel mab Hakmoni gans mebyon an myghtern.

³³ Ahithofel o kusulyer an myghtern, ha Hushay an Arkyas o koweth an myghtern.

³⁴ War-lergh Ahithofel, Yehoyada mab Benaya, hag Abiathar o kusulyoryon an myghtern. Yoab o kaslewydh lu an myghtern.