Zekaria 1 - The Holy Bible In Alur (Lur) Revised Orthography

Lwong’o Nidwogo ba Yehova

¹ I dwi mir aborane, i rundi mir arionde pa Dario, lembe pa Yehova bino ba Zekaria ma wod Berekia, ma wod Ido, ma jabila, m’uwacu kumae,

² Yehova thungo dit ni wegwu.

³ Ka kumeno wac igi kumae, Yehova mir udul uwacu kumae: Wudwog i bang’a, Yehova mir udul uwacu, e abidwogo i beng’wu, Yehova mir udul uwacu.

⁴ Kud wubed calu kwaruwu, ma jubila ma kwong’a gilwong’o i bang’gi, giwacu kumae, Yehova mir udul uwacu kumae, Wudwog kawono kud i yo mu ma rac, man kud i giratima mu ma rac: ento giwinjo ngo, kadi giciko ithgi de ngo ira, Yehova wacu.

⁵ Kwaruwu, gini kani? jubila de, gibedo mi nja?

⁶ Ento lembe para ku cik para, m’ang’olo ni jutic para ma jubila, ginwang’u kwaruwu ngo? man gilokri giwacu kumae, Calu i Yehova mir udul upido ya etim iwa, calku yo mwa, man calku giratima mwa, e etimo kumeca i bang’wa.

Ginmawokiwang’ pa Jabila pi Riuni

⁷ I ceng’ pier ario wi ang’wende mi dwi apar wi acende, ma en e dwi Cebat, i rundi mir arionde pa Dario, lembe pa Yehova bino ba Zekaria ma wod Berekia, ma wod Ido, ma jabila, m’uwacu kumae,

⁸ Aneno ku diewor, man, nen, ng’atu moko bewotho ku wi riuni ma kwar, man ecungo kind yen m’adundo the tipo; man i ng’eye riuni nuti, ma kwar, ku m’athobi, ku ma tar.

⁹ Alund awacu kumae, E rwoth para, maeni ang’o? Man malaika m’uweco kuda wacu ira kumae, Abinyutho iri nia maeni ang’o.

¹⁰ Man ng’atu m’ucungo kind yen m’adundo loko lembe man ewacu kumae, Maeni ju ma Yehova orogi giwoth kun ku kun i kind ng’om.

¹¹ Man giloko lembe ni malaika pa Yehova m’ucungo i kind yen m’adundone, giwacu kumae, Wawotho kun ku kun i kind ng’om, man, nen, ng’om ceke bedo ling’, man epoto.

¹² Malaika pa Yehova lund uloko lembe man ewacu kumae, E Yehova mir udul, nindo bibedo rokani ma kisa binegi ie ngo kum Yerusalem kud adhura mi Yuda, ma ng’ecwiny unegi i kume rundi pier abiro?

¹³ E Yehova loko lembe ni malaika ma waweco wakude ku lembe ma ber, en e lembe mi juk.

¹⁴ Ka kumeno malaika ma waweco wakude wacu ira kumae, Koki, wac kumae, Yehova mir udul uwacu kumae: Ngiri nega kum Yerusalem man kum Sayuni ku ngiri ma dit.

¹⁵ Man adhunjo dit ni thek ma gibedo abeda kum naka adhunjo nyanok, man ginyayu masendi.

¹⁶ Ka kumeno Yehova wacu kumae: Adwogo Yerusalem ku kisa; ot para bigombre i ie, Yehova mir udul uwacu, man jubitelo thol wi Yerusalem.

¹⁷ Kok kendo, wac kumae, Yehova mir udul uwacu kumae: Adhura para bipong’ hau ku mierolembe; man Yehova bijuko Sayuni, man fodi ebigoyo wi Yerusalem.

Ginmawokiwang’ pa Jabila pi Tung ku Jubodho

¹⁸ E ating’o wang’a malu, man aneno, man, nen, tung ang’wen.

¹⁹ E awacu ni malaika m’uweco kuda kumae, Maeni ang’o? Man eloko lembe ira kumae, Maeni tung m’uketho Yuda mba, kud Israel, man Yerusalem.

²⁰ Man Yehova nyutho ira jubodho mir umbu ang’wen.

²¹ Alund awacu kumae, Maeni gibino timo ang’o? Man ewacu kumae, Maeni tung m’ulalu Yuda, ketho ya ng’atu moko ting’o wie malu ngo; ento maeni gibino kara ginyai ndiri i igi, kara giredh tung mi thek piny, m’uting’o tung’gi malu kum ng’om mi Yuda kara gikethe.