Ywak 3 - The Holy Bible In Alur (Lur) Revised OrthographyJugeno Kony ni kum Kisa pa Mungu 1 An a dhanu m’uneno masendi kud uluth mi kwinyo pare. 2 Etelo wia man eketho awotho i mudho, i der ungo. 3 Andha eloko cinge i kuma kendo kendo ceng’ du. 4 Etio ring’kuma ku dendkuma; eturo cogona. 5 Egomo i kuma, man etieka kud ulecu man olo. 6 Eketho abedo i ka ma col, calu ju m’utho con. 7 Etieka ku gang’, kara kud awok woko; edwoko nyoro para pek. 8 Eyo, kinde m’aywak, man alwong’o kony, eciko ba rwo para. 9 Eciko yo para ku gang’ mi kidi m’apaya; egondo yo para. 10 Ebedo ira calu wai m’ubekanu adhi, calu umvor i ka ma kende. 11 Eloko yo para cen, man eyeca nziki nziki; eketho abedo a kenda. 12 Egomo atum pare, man eketha calu girakila ni athero. 13 Ekila i piera kud athero m’i tubu pare. 14 Adoko ni jamng’iero ni dhanu para ceke, ku wer migi ceng’ du. 15 Epong’a kud ulecu, man eromo kuma kud adra. 16 Eturo laka bende ku kidi ma tek; euma ku vuru. 17 Man ecoro ng’eyong’ec para cen ku kwiocwiny; wia wil kum mierolembe. 18 Man awacu kumae, Tegona rwinyo, man genogen para de rwinyo ku ba Yehova. 19 Poi kum masendi para ku wundo para, adra kud ulecu. 20 Ng’eyong’ec para poi i kumgi asu, man egung’ yor i ia. 21 Apoi kum lembe maeni; ka kumeno abedo ku genogen. 22 En e kum mer mi bero pa Yehova nia ku wathum, kum ngisi pare rem ungo. 23 Gi nyen ku ba rupiny ku ba rupiny; bedo mandha peri e dit. 24 Yehova en e makapiny para, ng’eyong’ec para wacu; ka kumeno abigeno gen ni kume. 25 Yehova e ber ni ju m’ukure, ni ng’eyong’ec m’uyenye. 26 E ber ya dhanu gen man ekur yo pi both pa Yehova. 27 E ber ni dhanu ya eyei mberembere i aradu pare. 28 Wek ebed e kende man ebed ling’, kum ekethe i wie. 29 Wek eketh dhoge i utur, tek kuno nyo genogen nuti. 30 Wek emi limbe ni ng’atu m’ugoye; wek epong’ ku cac. 31 Kum Rwoth bibayu mi nja ngo. 32 Kadok ekelo can, ento ngisi binege calkud udul mer mi bero pare. 33 Kum enyayu can ungo ku i adundene de, kadok sendo nyithi dhanu. 34 Ma nia enyon jukol ceke m’i ng’om the tielo, 35 Ma nia elok ng’ol mi dhanu cen i nyim wang’ Ng’atu ma Malu Ngbir, 36 Redho dhanu i lembe pare, Rwoth yio ngo. 37 Ng’a m’uwacu, man etimbre kakare, ma Rwoth kung’olo re ngo? 38 Gin ma ber ku gin ma rac wok kud i dhu Ng’atu ma Malu Ngbir ungo? 39 Pirang’o dhanu ma kwo kayu ywaki, pi masendi mi dubo pare en e dhanu? 40 Wek waponj yo mwa wamul, man walokra kendo ba Yehova. 41 Wek wating’ adundewa ku cingwa ba Mungu i polo. 42 Wakadhu ku wi cik man wajai; iweko woko ngo. 43 Iumbri ku ng’ecwiny man iriemowa; inego, ngisi negi ngo. 44 Iumbri kud afuru, kara rwo kud ukadhi. 45 Idwokowa ni susu man cilo i kind kodhidhanu. 46 Judegi mwa ceke ng’amu dhoggi lac i kumwa. 47 Lworo man vur uwok i kumwa, jigo wi piny man nyoth. 48 Wang’a molo kulo mi pi piny, kum nyoth pa nya dhanu para. 49 Piwang’a core piny, man ecok ungo, ma kajikne mbe, 50 Maram Yehova bineno ko piny, man enen kud i polo. 51 Wang’a sendo ng’eyong’ec para, kum nyir mir adhura para ceke. 52 Giriema rac calu winyo, gi ju ma gi judegina ma lembe mbe. 53 Githumo kwo para woko i vur, man gibolo kidi i kuma. 54 Pi mol i wia; awacu kumae, Juthuma cen. 55 Alwong’o nyingi, E Yehova, kud i vur ma thuth. 56 Iwinjo dwanda; kud ipan ithi ni yuyo para, kum ywak para. 57 Icoro ceng’ni i ceng’ m’alwong’i; iwacu kumae, Lworo kud unegi. 58 E Rwoth, icungo kum lembe mi ng’eyong’ec para; iwaru kwo para. 59 E Yehova, ineno gin ma jutimo i kuma rac; pok lembe para. 60 Ineno culokwor migi ceke ku lembrieko migi ceke i kuma. 61 Iwinjo cac migi, E Yehova, ku lembrieko migi ceke i kuma, 62 Dendhu ju m’uketho wang’gi i kuma, ku lembrieko migi i kuma ceng’ du. 63 Nen bedopiny migi, ku ai malu migi; an a wer migi. 64 Ibiculo kwor i kumgi, E Yehova, calku tic m’i cing’gi. 65 Ibimio igi abinga mir adunde, en e kwong’ peri i kumgi. 66 Ibiriemogi ku ng’ecwiny, man ibinyothogi the polo pa Yehova. |
The Holy Bible In Alur (Lur), Revised Orthography © United Bible Societies, 1970.
Bible Society of the Democratic Republic of Congo