Yona 2 - The Holy Bible In Alur (Lur) Revised Orthography

Rwo mi Foc pa Yona

¹ Yona lund urwo ni Yehova Mungu pare kud i cind i rec.

² Man ewacu kumae, Alwong’o Yehova kum masendi para, Man eloko ira lembe; Kud i cind i liel alwong’o,

³ Man iwinjo dwanda. Kum ibola i ka ma thuth, i adunde mi nam, Man pi tieka gbur; Mukura peri ceke ku vira peri gikadhu kud i wia.

⁴ Man awacu kumae, Jubaya woko kud i weng’i; Ento abineno kendo yo ba hekalu peri ma leng’.

⁵ Pi dupa utieka gbur, cil kum ng’eyong’ec; Nam utieka gbur; Uthworo mi nam ugapre i wia.

⁶ Aloro piny the gudi; Ng’om kud ukol pare giciko bang’a nja: Ento iting’o kwo para malu kud i vur, E Yehova Munguna.

⁷ Ka cwinya voc i ia, apoi pi Yehova; E rwo para mondo i beng’i, i hekalu peri ma leng’.

⁸ Ju m’uneno ba gin ma ie nanu mi ndra Gikuno kisa migi gigi.

⁹ Ento abimio lam iri ku dwal mi foyofoc; Man abiculo maeno m’ang’olo. Both en e pa Yehova.

¹⁰ E Yehova wacu ni rec, man eng’ogo Yona wi ng’om m’uthwo.