Yohana 8 - The Holy Bible In Alur (Lur) Revised Orthography

¹ Ento Yesu eidho wi got Zeituni.

² Pir kugweno ebino kendo i hekalu, dhanu ceke de gibino i bang’e; man ebedo piny eponjogi.

³ Jugorcik ku Jufarisayo de gikelo dhaku ma jurube m’ebegiere swa; e ka gikethe i diere,

⁴ giwacu ire kumae, Japonji, dhaku maeni jurube wi gier, kpa wi gier.

⁵ Nwang’u i cik re Musa ng’olo iwa ya waneg wagi ma kumeni acanya ku kidi; ka kumeno in ke iwacu ang’o pire?

⁶ E giwacu maeni, ma gibidhe ko, kara ginwang’ agobe i wie. Ento Yesu gung’ piny, man egoro wi ng’om ku lwete.

⁷ Ento ka gipenje asu, etingre malu, ewacu igi kumae, Ng’atu ma dubo mbe kude i kindwu ci, dong’ ekwong’ canye ku kidi.

⁸ Egung’ piny kendo, man egoro wi ng’om ku lwete.

⁹ E gin, ka giwinjo lembe maeni, giwok woko acel acel uthekre kum jadit, cil kum m’udong’ cen: man Yesu dong’ kende, ku dhaku, ma ni i diere.

¹⁰ E Yesu tingre malu, man ewacu ire kumae, Dhaku, gini kani? ng’atu moko mbe m’upoko lembe i wii raci?

¹¹ E ewacu kumae, Ng’atu moko mbe Rwoth. E Yesu wacu kumae, An bende apoko lembe rac i wii ngo: cidh i yo peri; ugambre kawono kud idong’ idub kendo.)

Yesu, Der mi Ng’om

¹² Yesu lund uyero igi kendo, ewacu kumae, An a der m’i ng’om; ng’atu m’ulubo ng’eya biwotho i mudho ngo, ento ebibedo ku der mi kwo.

¹³ Ka kumeno Jufarisayo wacu ire kumae, Inyutho lembe piri giri; nyutholembe peri en e andha ngo.

¹⁴ Yesu dwoko lembe ewacu igi kumae, Kadok anyuth lembe pira gira, nyutholembe para en e andha; kum ang’eyo ka m’aai i ie, ku ka m’acidho i ie de; ento wun wung’eyo ngo ka m’aai i ie, kadi ka m’acidho i ie de.

¹⁵ Wupoko lembe calku kum; an apoko lembe kum ng’atu moko ngo.

¹⁶ Eyo tek apoko lembe, pokolembe para en e andha: kum an a kenda ngo, ento waku Wego m’uora.

¹⁷ Eyo man i cik mu egore kumae, ya nyutholembe mi juario en e andha.

¹⁸ An a ng’atu m’ubenyutho lembe pira gira, Wego m’uora de benyutho lembe pira.

¹⁹ Ka kumeno giwacu ire kumae, Wuru nikani? Yesu loko lembe kumae, Wung’eya ngo, kadok Vwa de: dok wung’eya kuno di wung’eyo Vwa bende.

²⁰ Eyero lembuni i kakanpiny, kinde m’eponjo i hekalu: man ng’atu moko mbe m’umake; kum saa pare fokuwok ungo.

Ka M’acidho i ie Wucopo Bino Ngo

²¹ Ka kumeno ewacu igi kendo kumae, Aai woko man wubiyenya, e wubitho i dubo mu: ka m’acidho i ie wucopo bino ngo.

²² Ka kumeno Juyahudi giwacu kumae, Ebinegre gire, kum ewacu kumae, Ka m’acidho i ie, wucopo bino ngo?

²³ E ewacu igi kumae, Wun wuai piny; an aai malu: wun wu mi ng’om maeni; an a mi ng’om maeni ngo.

²⁴ Ketho awacu iwu nia wubitho i dubo mu: kum tek wuyio ngo nia an a en, wubitho i dubo mu.

²⁵ Ka kumeno giwacu ire kumae, In i ng’a? Yesu wacu igi kumae, Cil maeno bende m’ayero iwu ku kwong’a.

²⁶ Giki dupa ni kuda m’ayer apok de piwu: ento ng’atu m’uora en e andha; man gin m’awinjo i bang’e, e ayero ginde ni ng’om.

²⁷ Ging’eyo ngo nia eyero igi pi Wego.

²⁸ Ka kumeno Yesu wacu kumae, Ka wudaru ting’o Wod dhanu malu wubilund ng’eyo nia an a en man nia atimo gin moko gira ngo, endre ayero gin maeni calu Wego ponja ko.

²⁹ Man ng’atu m’uora eni karacelo kuda; eweka kenda ngo, kum atimo gin maeno thiri thiri ma nyayu mutoro i ie.

³⁰ Kan eyero gin maeni, dhanu dupa giyio ire.

Lemandha Bigonyowu

³¹ Ka kumeno Yesu wacu ni Juyahudi maeno m’uyie kumae, Tek wubedo i lem para, nwang’u wu julubna mandha;

³² man wubing’eyo lemandha, e lemandhane bigonyowu.

³³ Giloko lembe ire kumae, Wan wa kodhi Ibrahim, fodi wabedo ng’eca pa ng’atu moko ngo: iwacu nenedi, Wubigonjru?

³⁴ Yesu loko lembe igi kumae, Andhandha awacu iwu, Ku ba dhanu ceke ma timo dubo en e jamiru mi dubo.

³⁵ Man jamiru bedo i ot nja ngo: wod e ma bedo mi nja.

³⁶ Ka kumeno tek Wod bigonyowu, wubibedo agonya andha.

³⁷ Ang’eyo nia wu kodhi Ibrahim; ento wuyenyo ka nega, kum ka lembe para mbe i iwu.

³⁸ Ayero gin m’aneno ba Vwa: wun bende wutimo gin ma wuneno ba wegwu.

Wegwu ma Wonabali

³⁹ Giloko lembe giwacu ire kumae, Wegwa en e Ibrahim. Yesu wacu igi kumae, Tek wu nyithindho pa Ibrahim kuno di wutimo tic pa Ibrahim.

⁴⁰ Ento kawono wuyenyo ka nega an m’a ng’atu m’ayero iwu lemandha, m’awinjo ba Mungu: maeni Ibrahim utimo ngo.

⁴¹ Wutimo tic pa wegwu. Giwacu ire kumae, Junyolowa ku tarwang’ ungo; Wegwa acel, en e Mungu.

⁴² Yesu wacu igi kumae, Dok Mungu en e Wegwu, kuno di wumara: kum aai ba Mungu abino eni; kum abino gira ngo, ento eora en.

⁴³ Nedi wung’eyo wec para ngo? en e kum wucopo winjo lembe para ngo.

⁴⁴ Wun wu pa wegwu ma wonabali, e wuyenyo wutim awanya ma rac pa wegwu. Cil ku kwong’a en e janek, man ecungo ngo i lemandha, kum lemandha mbe i ie. Kan eyero ndra, eyero kum gin m’ebedo ko: kum en e jandra, man e won ndrane.

⁴⁵ Ento kum ayero lemandha, wuyia ngo.

⁴⁶ Ng’a ma ni i kindwu m’utuco wia kum dubo? Tek ayero lemandha wuyia ngo nedi?

⁴⁷ Ng’atu ma en e pa Mungu ewinjo lembe pa Mungu: kum lembe nini wuwinjo ngo, kum wu pa Mungu ngo.

Ma fodi Jukunyolo Ibrahim Ungo, Nwang’u Anuti

⁴⁸ Juyahudi giloko lembe giwacu ire kumae, Wayero dre ngo nia i Jasamaria, man pajogi ni ii?

⁴⁹ Yesu loko lembe kumae, Pajogi mbe i ia; ento ayungo Vwa, man wun re ma wuketho abedo umbe yung.

⁵⁰ Ento ayenyo kadwong’ para gira ngo: ng’atu acel nuti m’ubeyenyo m’ubepoko lembe de.

⁵¹ Andhandha, ayero iwu kumae, Tek ng’atu moko woro lem para, ebineno tho ki ngo.

⁵² Juyahudi wacu ire kumae, Kawono wapoing’eyo nia pajogi ni ii. Ibrahim utho ku jubila bende; man iwacu kumae, Tek ng’atu moko woro lem para, ebibilo tho ki ngo.

⁵³ In i dit ma sagu wegwa Ibrahim, m’utho? man jubila bende tho: ikethri ni ng’a?

⁵⁴ Yesu loko lembe kumae, Tek ayungra gira, nwang’u dwong’ para en e gin moko ngo: en e Vwa e m’uyunga: ma wuwacu pire, nia en e Mungu mu;

⁵⁵ man wung’eye ngo: ento ang’eye; man tek awacu ya ang’eye ngo, abibedo jandra calu wun: ento ang’eye, man aworo lem pare.

⁵⁶ Wegwu ma Ibrahim anyong’a nege kum ebineno ceng’ para: man enene, anyong’a nege de.

⁵⁷ Ka kumeno Juyahudi giwacu ire kumae, Rundi peri fodi pier abic ungo, man ineno Ibrahimu?

⁵⁸ Yesu wacu igi kumae, Andhandha, awacu iwu, Ku kwong’a ma fodi jukunyolo Ibrahim ungo, nwang’u anuti.

⁵⁹ Gilund giting’o kidi nik gicanye ko: ento Yesu pale gire, man ewok ku i hekalu.