Yohana 19 - The Holy Bible In Alur (Lur) Revised Orthography

¹ Pilato lund ugamu Yesu, efode de.

² Asikari de kiedo jamkermiwic mir ukudho, giroyo i wie, gironye de ku kendi m’uluga;

³ man gibino i bang’e, giwacu kumae, Moth iri Ubimo mi Juyahudi! Gipade de ku cing’gi.

⁴ Pilato wok woko kendo man ewacu igi kumae, Nen, akele woko i beng’wu, kara wung’ei nia anwang’u dubo moko ngo i ie.

⁵ Yesu lund uwok woko, m’ekendo jamkermiwic mir ukudho ku kendi m’uluga. Pilato wacu igi kumae, Wunen ng’atuni!

⁶ Ka kumeno ka julam ma dongo kud asikari ginene, gikok, giwacu kumae, Gure, gure! Pilato wacu igi kumae, Wugame wun, wugure: kum anwang’u dubo moko ngo i ie.

⁷ Juyahudi giloko lembe ire kumae, Cik mwa nuti, man ku cik maeno maku etho, kum ekethre gire ni Wod Mungu.

⁸ Ka kumeno ka Pilato winjo lembe maeni, lworo nege m’usagu;

⁹ man emondo i Odtiti kendo, epenjo Yesu kumae, Iai kani? Ento Yesu loko ire lembe moko ngo.

¹⁰ Ka kumeno Pilato wacu ire kumae, Iweco i bang’a ngo? ing’eyo ngo nia tego para nuti m’agonyi ko, man tego para nuti de m’aguri ko?

¹¹ Yesu loko lembe ire kumae, Tego peri mbe m’itimo ko gin moko i kuma, tek emire iri ku malu ngo: ka kumeno ng’atu m’uciba iri dubo pare sagu.

¹² Kum lembuni Pilato yenyo kagonye: ento Juyahudi giwoi, giwacu kumae, Tek igonyo ng’atuni, nwang’u i jarim Kaisari ngo: ku ba dhanu ceke ma kethre gire ni ubimo nwang’u ejai ni Kaisari.

¹³ Ka kumeno ka Pilato winjo lembe maeni, ewodho Yesu woko, ejany de wi kom mi pokolembe i ka ma julwong’o Ng’omathora, ento ku dhu Juebrania en e Gabatha.

¹⁴ Nwang’u en e ceng’ mi Yikopiny mi kadhukuwijo: eyenyo bedo calu en e saa mir abusiende. Man ewacu ni Juyahudi kumae, Nen, Ubimo mu!

¹⁵ Ka kumeno gikok kumae, Tere cen, tere cen, gure! Pilato wacu igi kumae, Agur Ubimo mu? Julam ma dongo giloko lembe kumae, Ubimo mwa mbe ndhu Kaisari.

¹⁶ Elund emie igi ya gigure.

Maram Juguro Ko Yesu wi Yen M’athara

¹⁷ Ka kumeno gigamu Yesu: e ewok woko, m’ebielo yen m’athara ire gire, i ka ma julwong’o Karupokowic, ma julwong’o ku dhu Juebrania Golgotha:

¹⁸ gigure kakeca, ku jumange ario, acel yo ku, acel ke yo ku, man Yesu ke ni i diere.

¹⁹ Man Pilato goro ramblembe bende, man ekethe wi yen m’athara. Lembene gore kumae, YESU MA NAZARETI, UBIMO MI JUYAHUDI.

²⁰ Ka kumeno dhanu dupa ma kind Juyahudi gisomo ramblembe maeni, kum ka ma juguro ie Yesune ni ceng’ni kud adhura; man egore ku dhu Juebrania, man ku dhu Jurumi, man ku dhu Juyunani.

²¹ Ka kumeno julam ma dongo mi Juyahudi giwacu ni Pilato kumae, Kud igor kumae, Ubimo mi Juyahudi: ento nia ewacu kumae, An a Ubimo mi Juyahudi.

²² Pilato loko lembe kumae, Gin m’adaru goro adaru goro ndhu.

²³ E kan asikari gidaru guro Yesu, gigamu kendi pare gipoko ie ang’wen, ku bang’ asikari ceke ng’atuman ku maka pare; ku jabia bende: nwang’u jabiane kawang’ kwocne mbe, jutheko cwie i wie cik piny.

²⁴ Ketho giwacu i kindgi kumae, Ku wayecue ayeca, ento dong’ wagoyue ku jara, ketho wanwang’ ka won: kara lembagora pa Mungu timbre kakare, m’uwacu kumae, Gipoko kendi para i kindgi, Man gigoyo jabia para de ku jara.

²⁵ Asikari gilund gitimo gin maeni. Ento min mire cungo the yen m’athara pa Yesu, ku nyamin min de, ma Mariamu ma ci Klopa, giku Mariamu ma Magdalene.

²⁶ Ka kumeno ka Yesu neno min mire, ku jalub m’emara cungo, ewacu ni min kumae, Dhaku, nen wodi!

²⁷ Elund ewacu ni jalub kumae, Nen meru! Ugambre i saa maeni jalub udwoke i ot pare.

Tho pa Yesu

²⁸ Yo ng’ei maeni, Yesu m’ung’eyo nia kawono gin ceke thum, kara lembagora pa Mungu timbre kakare, ewacu kumae, Rieu unega.

²⁹ Nwang’u juketho picwa pong’ tabu kakeca: e giketho ucoi pong’ ku picwa wi tiend alagi, gikethe kum dhoge.

³⁰ Ka Yesu jolo picwa, ewacu kumae, Ethum: e ekulo wie, man eweko cwinye kadhu.

Jucobo Ng’et Yesu

³¹ Ka kumeno, kum ceng’ maeni ceng’ mi Yikopiny, Juyahudi lund upenjo Pilato nia jutur tiendgi, juter gi cen, kara avujgi kud ubed kor yen m’athara ceng’ sabatu (kum ceng’ sabatu maeno ceng’ ma dit).

³² Ka kumeno asikari gibino gituro tiend ng’atu ma kwong’ane, ku pa wadi de ma jugurogi gikude;

³³ ento ka gibino ba Yesu; gineno de nia edaru tho, gituro tiende ngo:

³⁴ ento acel m’i kind asikari cobo ng’ete ku tong’, e ndhu ndhu nica rimo ku pi de thwogre.

³⁵ E ng’atu m’uneno enyutho lembe, nyutholembe pare de en e andha: eng’eyo de nia eyero andha kara wun bende wuyi.

³⁶ Kum gin maeni timbre, kara lembagora pa Mungu timbre kakare kumae, Jubituro cogone acel de ngo.

³⁷ Lembagora mange de pa Mungu wacu kumae, Gibineno ng’atu ma gicobo.

Kuny pa Yesu

³⁸ Yo ng’ei gin maeni Yusuf ma Arimathayo, ma jalub Yesu, ento nyalwe ni lworo mi Juyahudi, epenjo Pilato ya ekab avuj Yesu: Pilato de yio ire. Ka kumeno ebino ekabu avuje.

³⁹ Nikodemo bende bino, en e ng’atu m’ubino i bang’e ku kwong’a ku diewor, m’ebekelo mo ma liu ma ng’wice ng’ar m’uribre kud udok, ma yenyo romo mukero pier ang’wen wi abic.

⁴⁰ Kum kumeno giting’o kum Yesu, giriwo ku bongu ma nwang’ kud udok ma ng’wice ng’ar, calu kura kuny mi Juyahudi.

⁴¹ Nwang’u podho nuti ka ma jugure ie; man lic! ma nyen m’aroka i cana nuti i podhone ma fodi juyiko ng’atu moko i ie ngo.

⁴² Gilund giyiko Yesu kakeca (kum liel m’aroka i cana ni ceng’ni) kum en e ceng’ Yikopiny mi Juyahudi.