Yohana 18 - The Holy Bible In Alur (Lur) Revised Orthography

Jucibo Yesu man Jumake

¹ Ka Yesu daru yero lembe maeni ecidho ku julubne loka kulo Kedron, ka ma podho ni i ie, m’emondo i ie, en ku julubne.

² Nwang’u Yuda bende m’ucibe, eng’eyo kakeca: kum Yesu gibegicokri keca ku julubne wang’ udul.

³ Ka Yuda gamu udul asikari, kud asikari mange de m’uai ba julam ma dongo ku Jufarisayo de, elund ebino kakeca ku thala ku ridhro ku jamtho de.

⁴ Ka kumeno Yesu, m’ung’eyo gin ceke ma bibino i wie, ewok woko, man ewacu igi kumae, Wuyenyo ng’a?

⁵ Giloko ire lembe kumae, Yesu ma Nazareti. Yesu wacu igi kumae, An a en. Yuda bende, m’ucibe, gicungo gikugi.

⁶ Ka kumeno kan ewacu igi kumae, An a en, gidok ku ng’eigi, gipodho i ng’om.

⁷ Elund epenjogi kendo kumae, Wuyenyo ng’a? man giwacu kumae, Yesu ma Nazareti.

⁸ Yesu loko lembe kumae, Adaru wacu iwu nia an a en; ka kumeno tek wuyenyo an, wuwek joni gicidh migi:

⁹ kara lembe m’eyero timbre kakare kumae, Ju maeni m’imio ira acel de mbe m’i kindgi m’urwinyo ira.

¹⁰ Nwang’u Simon Petro m’e won palamularu ewodhe, egoyo ko jamiru pa jalam ma dit, ethumo ithe ma yor acwic bir cen. Nwang’u nying’ jamirune Malko.

¹¹ Ka kumeno Yesu wacu ni Petro kumae, Roi palamularu i ukorone: kikombe ma Wego mio ira ni, kud amadhi?

Yesu i Wang’ Jalam ma Dit

¹² Ka kumeno udul asikari ku jego ma dit, man asikari mi Juyahudi, gimaku Yesu gitwie de,

¹³ gilar gipeye ba Ana; kum en e jalkwaru Kayafa, ma en e jalam ma dit rundi maeno.

¹⁴ Nwang’u Kayafa en e ng’atu m’umio poro thelembe ni juyahudi, nia en e ber ya ng’atu acel utho pi dhanu.

Petro Kwero Yesu

¹⁵ Nwang’u Simon Petro lubo ng’ei Yesu, ku jalub mange de. Nwang’u jalub maeni ging’eiri ku jalam ma dit, man gimondo giku Yesugi i pondot pa jalam ma dit;

¹⁶ ento Petro cungo yo woko dhugola. Kum kumeno jalub mange, ma ging’eiri ku jalam ma dit, ecidho woko eweco ba ng’atu ma kuro dhugola, man ekelo Petro i ie.

¹⁷ Nyaku ma kuro dhugola lund uwacu ni Petro kumae, In bende in i ng’atu ma kind julub ng’atuni? Ewacu kumae, An ungo.

¹⁸ Nwang’u jumiru kud asikari de gicungo keca, ma gidaru vuko mac mi cukmac; kum koyo nuti; gioyo mac de: man Petro bende gicungo gikugi ebemuro kume.

Jalam ma Dit Upenjo Yesu

¹⁹ Jalam ma dit ulund upenjo Yesu pi julubne, ku ponji pare de.

²⁰ Yesu loko lembe ire kumae, Adaru yero kele ni ng’om; abedaponjo i kacokri, i hekalu de, ka ma Juyahudi ceke gibegicokri i ie; man ayero gin moko lwe ngo.

²¹ Ipenja nedi? penj ju m’uwinja, pi lembe m’ayero igi; nen, joni ging’eyo lembe m’ayero.

²² E kan edaru yero maeni, ng’atu acel m’i kind asikari m’ucungo keca epadu Yesu ku cinge, ewacu kumae, Iloko lembe kumeno ni jalam ma diti?

²³ Yesu loko lembe ire kumae, Tek adaru yero raci, nyuth karacne: ento tek dre ke, ipada nedi?

²⁴ Ka kumeno Ana ore atwia ba Kayafa ma jalam ma dit.

Petro Kwero Yesu Kendo

²⁵ Nwang’u Simon Petro cungo acunga ebemuro kume. Ka kumeno giwacu ire kumae, In bende i ng’atu acel m’i kind julubne? Ekwero, ewacu de kumae, An ungo.

²⁶ Ng’atu acel ma kind jumiru pa jalam ma dit, ma wadi ng’atu ma Petro thumo ithe, uwacu kumae, Aneni wukude ngo i podho?

²⁷ Petro lund ukwero kendo: e ndhu ndhu nino kulok ukok.

Yesu i Wang’ Pilato

²⁸ Gilund gipeyo Yesu ku ba Kayafa gicidho kude Odtiti: man en e pir kugweno; ento gin re gimondo ngo i Odtiti, kara ku gicidri, endre gicam kadhukuwijo.

²⁹ Ka kumeno Pilato wok woko i bang’gi, ewacu kumae, Wukelo adote ang’o kum ng’atuni?

³⁰ Giloko lembe giwacu ire kumae, Tek ng’atuni jadub lembe ngo, kuno di jukele ngo i beng’i.

³¹ Ka kumeno Pilato wacu igi kumae, Wugame wun, wupok lembe i wie calku cik mu. Juyahudi wacu ire kumae, Cik uyio iwa ngo ya waneg ng’atu moko:

³² kara lembe pa Yesu timbre kakare, m’eyero, m’enyutho ko maram ebitho ko.

³³ Ka kumeno Pilato mondo kendo i Odtiti, man elwong’o Yesu, epenje de kumae, In i Ubimo mi Juyahudi?

³⁴ Yesu loko lembe kumae, Iwacu lembuni giri, kadi jumange yero pira iri?

³⁵ Pilato loko lembe kumae, An a Jayahudi? Thek mu giwu ku julam ma dongo gikeli i bang’a: itimo ang’o?

³⁶ Yesu dwoko lembe kumae, Ker para en e mi ng’ombuni ngo: tek ker para en e mi ng’ombuni, kuno di jumiru para gikiedo, kara ku jumia ni Juyahudi: ento kawono ker para en e ma keni ngo.

³⁷ Pilato lund uwacu ire kumae, Kara in i ubimo? Yesu loko lembe kumae, Iyero dhe nia an a ubimo. Junyola pi maeni, man abino i ng’om de pi maeni, kara anyuth pi lemandha. Ku ba dhanu ceke ma mi lemandha winjo dwanda.

³⁸ Pilato penje kumae, Lemandha en e ang’o? Kan edaru yero lembe maeni, ewok woko kendo ba Juyahudi, man ewacu igi kumae, Anwang’u dubo moko ngo i ie.

Jung’olo Tho wi Yesu

³⁹ Ento en e kurawu, ya agony iwu ng’atu acel i kadhukuwijo: ka kumeno wuyenyo agony iwu Ubimo mi Juyahudi?

⁴⁰ Gilund gikok kendo, giwacu kumae, Ng’atuni ngo, ento Baraba. Nwang’u Barabane en e jayek.