Yohana 1 - The Holy Bible In Alur (Lur) Revised Orthography

Lembe Doko Kum

¹ Ku kwong’a Lembe nuti, Lembe de bedo ku Mungu, Lembene de en e Mungu.

² Ku kwong’a eni ba Mungu.

³ Gin ceke cwire ni kume; man gin moko mbe m’ucwire ma kucwire ni kume ngo.

⁴ Kwo bedo i ie; man kwone en e der mi dhanu.

⁵ Der urieny i mudho; mudho de ng’eye ngo.

⁶ Ng’atu acel, ma Mungu oro ubino, ma nyinge Yohana.

⁷ Ng’atuni bino pi nyuth, kara enyuth lembe mi der, kara dhanu ceke giyi ni kume.

⁸ En e der ungo, endre ebino kara enyuth lembe mi der.

⁹ Maeni en e der andha, ma menyo dhanu ceke kubang’gi m’ubino i ng’om.

¹⁰ Yang’ eni i ng’om, ng’om de cwire ni kume, e ng’om re ma kung’eye ngo.

¹¹ Ebino ba pare ma dhe, man ju ma gi pare ma dhene re gijole ngo.

¹² Ento ju m’ujole ceke, emio igi tego ma gidoko ko nyithindho pa Mungu, ni ju ma giyio nyinge:

¹³ m’unyole, ku rimo ngo, kadok ku yeny mi kum, kadok ku yeny mi dhanu de ngo, endre pa Mungu.

¹⁴ Man Lembe doko kum, ebedo de i kindwa (man waneno dwong’ne, dwong’ ma calu pa nyodo ma kulong’ pa Wego), m’epong’ ku bero ku lemandha de.

¹⁵ Yohana nyutho lembe pire, ekok akoka, ewacu kumae, Maeni en e ng’atu m’ayero pire kumae, Ng’atu m’ubino i ng’eya esaga: kum en e ng’atu ma kwong’a ira,

¹⁶ kum wan ceke wagamu kum gin m’epong’ ko, man bero wi bero.

¹⁷ Kum cik umire ni kum Musa; bero ku lemandha bino ni kum Yesu Kristu.

¹⁸ Ng’atu moko mbe ma foduneno Mungu nindo moko; Wode kulong’, m’eni i kor Wego, enyuthe.

Lembe ma Yohana Jabaputisi Unyutho

¹⁹ Maeni lembanyutha pa Yohana, kinde ma Juyahudi gioro julam ku Julawi m’uai Yerusalem i bang’e nipenje kumae, In i ng’a?

²⁰ Man etuco, ekwero ngo: etuco kumae, An a Kristu ngo.

²¹ Gipenje de kumae, Ka kumeno ang’o? In i Elia? E ewacu kumae, An a en ungo. Die in i jabila? Edwoko lembe kumae, Ungo.

²² Ka kumeno giwacu ire kumae, In i ng’a? kara wadwok lembene ni ju m’uorowa. Iwacu ang’o piri giri?

²³ Ewacu kumae, An a dwand ng’atu moko m’ukok akoka i yamba kumae, Wutir yo pa Rwoth, calu Isaya ma jabila wacu.

²⁴ Man joni gi ju ma Jufarisayo gioro gi.

²⁵ Gipenje de, man giwacu ire kumae, Ka kumeno tek in i Kristu ngo, kadok Elia de ngo, kadok jabila de ngo, imio baputisi nedi?

²⁶ Yohana dwoko lembe igi, ewacu kumae, Amio baputisi i pi: ng’atu acel ucungo i kindwu ma wung’eyo ngo,

²⁷ ma en e ng’atu m’ubino i ng’eya, ma thondh wara pare an aromo ngo ya agony.

²⁸ Gin maeni timbre i Bethabara, ma loka Yordan, ka ma Yohana mio ie baputisi.

Nen, Nyathi Rombo pa Mungu

²⁹ Urwone eneno Yesu bebino i bang’e, man ewacu kumae, Nen, Nyathi Rombo pa Mungu, ma kabu dubo m’i ng’om woko!

³⁰ Maeni en e ng’atu m’a yero pire kumae, Ng’atu m’ubino i ng’eya juketho esaga: kum en e ng’atu ma kwong’a ira.

³¹ Man ang’eye ngo; ento kara enyuthre ni Israel, kum lembe nini abino ku mio baputisi i pi.

³² Yohana de nyutho lembe, ewacu kumae, Aneno Tipo ai i polo loro piny pamir akuru; ebedo de i wie.

³³ Man ang’eye ngo: ento ng’atu m’uora nimio baputisi i pi, ewacu ira kumae, Ng’atu ma tek ibineno Tipo beloro i wie man ebedo i wie, en e ng’atu m’umio baputisi i Tipo Maleng’.

³⁴ E aneno, man anyutho nia maeni en e Wod Mungu.

Julub ma Kwong’ane

³⁵ Urwone kendo Yohana cungo, ku juario ma kind julubne;

³⁶ man eneno Yesu kan ewotho, ewacu kumae, Nen, Nyathi Rombo pa Mungu!

³⁷ Man julubne ario giwinjo kan eyero, e gilubo ng’ei Yesu.

³⁸ Yesu lokre de, man eneno gilubo ng’eye, man ewacu igi kumae, Wuyenyo ang’o? E giwacu ire kumae, Rabbi, (thelembene, ka juloke, Japonji,) ibedo kani?

³⁹ Ewacu igi kumae, Wubin, e wubineno. Ka kumeno gibino gineno de ka m’ebedo i ie; man gibedo gikugi ceng’ maeno: nwang’u saa calu mir apaje.

⁴⁰ Acel ma kind juarione m’uwinjo Yohana bewacu, m’ulubo ng’eye de, en e Andrea, m’umin Simon Petro.

⁴¹ Elar enwang’u umin ma dhe ma Simon, e ewacu ire kumae, Wanwang’u Masia (thelembene, ka juloke, Kristu).

⁴² Ekele ba Yesu. Yesu neno bang’e, man ewacu kumae, In i Simon ma wod Yona: jubilwong’i Kefa (thelembene ka juloke, Petro).

Yesu Lwong’o Filipo ku Nathanael

⁴³ Urwone eyenyo ecidh i Galilaya, e enwang’u Filipo: man Yesu wacu ire kumae, Luba.

⁴⁴ Nwang’u Filipone en e ng’atu ma Bethsaida, mir adhura ma thugi Andrea ku Petro.

⁴⁵ Filipo nwang’u Nathanael, man ewacu ire kumae, Wanwang’u ng’atu ma Musa goro pire i cik ku jubila, en e Yesu ma Nazareti, ma wod Yusuf.

⁴⁶ Nathanael uwacu ire kumae, Gin moko ma ber copo ai i Nazareti? Filipo wacu ire kumae, Bin inen.

⁴⁷ Yesu neno Nathanael ubebino i bang’e, man ewacu pire kumae, Nen, Jaisraeli mandha ma abombi mbe i ie!

⁴⁸ Nathanael uwacu ire kumae, Ing’eya nenedi? Yesu loko lembe ewacu ire kumae, Ka fodi Filipo kulwong’i ngo, m’ini ther ulam ca, nwang’u aneni.

⁴⁹ Nathanael uloko lembe kumae, Japonji, in i Wod Mijngu; in i Ubimo mir Israel.

⁵⁰ Yesu loko lembe ewacu ire kumae, Kum awacu iri nia aneni ther ulam ni, iyio? ibineno giki ma dit ma sagu maeni.

⁵¹ Man ewacu ire kumae, Andhandha, awacu iwu, Wubineno polo yabre, man malaika pa Mungu m’ubeidho m’ubeloro de wi Wod dhanu.