Yoel 3 - The Holy Bible In Alur (Lur) Revised Orthography

Pokolembe pa Yehova wi Thek

¹ Kum, nen, i ceng’ maeca, man i nindo maeca, kan abidwoko ng’eca mi Yuda man Yerusalem

² abicoko thek ceke, man abikelogi piny i poga pa Yehocafat; man abipoko lembe i wigi keca pi dhanu para man pi camupacu para Israel, ma gilalu i kind thek; man gipoko ng’om para,

³ e gigoyo jara pi dhanu para, man gimio nyathin ma nico pi won asara, giloko nyathin ma nyaku de ku pigulok, kara gimadhi.

⁴ Eyo, man wun ang’o ira, E Turo, man Sidon, ku ng’om ceke mi Filistia? wubiculo ira? man tek wuculo ira, abidwoko cul mu i wiwu tho man pio.

⁵ Kum wugamu mola ma tar para ku mola ma kwar para, man wutero gin para ma ber ma pire tek de i hekalu mu,

⁶ man wuloko nyithindho pa Yuda ku nyithindho mi Yerusalem ni wot Juyunani, kara wucorgi bor cen ku kieu migi;

⁷ nen, abithubogi kud i ka ma wuloko gi i ie, man abidwoko cul mu i wiwu giwu;

⁸ man abiloko wotwu ku nyigwu i cing’ nyithindho pa Yuda, man gibilokogi ba dhanu mi Ceba, ni thek ma bor ngbir; kum Yehova yero lembe maeni.

⁹ Wurwei lembe maeni i kind thek; wuyik ali; wuthub dhanu ma jutego; wek dhanu ceke mir ali gicor ceng’ni, wek giidh malu.

¹⁰ Wucany kwer mu ni palamularu, man uligu ni tong’: wek ju ma ng’ic giwac kumae, An a tek.

¹¹ Wutim pio, man wubin, wu thek ceke m’utieko piny gbur, man wucokru giwu karacelo: keth dhanu peri ma tek gilor piny keca, E Yehova.

¹² Wek thek giyauri gigi, man giidh ba poga Yehocafat; kum abijany keca nipoko lembe wi thek ceke m’utieko piny gbur.

¹³ Wuketh pala i ie; kum mwoka cek: wubin, wuyok; kum pany mir ulok upong’, jambic ubethakni; kum dubo migi dit.

¹⁴ Udul dhanu, udul dhanu i poga mi kethocwiny! kum ceng’ pa Yehova ni ceng’ni i poga mi kethocwiny.

¹⁵ Ceng’ ku dwi giyutho, man cero gong’o rieny migi.

Both pa Yuda

¹⁶ Man Yehova birundo kud i Sayuni, man ebiting’o dwande kud i Yerusalem; man polo ku ng’om biyengre: ento Yehova bibedo ni kapondo ni dhanu pare, man ka ma tek ni nyithindho mir Israel.

¹⁷ Ka kumeno wubing’eyo nia an a Yehova Mungu mu, m’abedo i Sayuni got para ma leng’: Yerusalem bilund bedo leng’, man juwirok moko bikadhu kud i kinde kendo ngo.

¹⁸ Man ebitimbre i ceng’ maeca, nia gudi bitono pigulok ma lim lim, man ungulu gudi bimolo cak man kulo ceke mi Yuda bimolo pi; man kulo mi pi bidhenjre kud i ot pa Yehova, man ebidwoko poga mi Citim ng’ic.

¹⁹ Misiri bibedo ni udhuru, man Edom bibedo langa mir udhuru, kum rop m’utimbre kum nyithindho pa Yuda, kum gioyo rimo m’umbe dubo i ng’om migi.

²⁰ Ento Yuda bibedo mi nja, man Yerusalem ugambre kum dhanum’utuk cil kum dhanum’utuk.

²¹ Man abilonyo rimo migi, ma fodi alonyo ngo: kum Yehova bedo i Sayuni.